விதி - சதி: ஜெயலலிதா கடிதம்

-

அ.தி.மு.க., வேட்பாளருக்கு ஓட்டு கேட்டு,
ஜெயலலிதா எழுதிய உருக்கமான கடிதத்தை, ஸ்ரீரங்கத்தில்
அ.தி.மு.க.,வினர் வீடு, வீடாக வினியோகம் செய்து வருகின்றனர்.

கடிதத்தில், அவர் கூறியிருப்பதாவது:
கடந்த சட்டசபைத் தேர்தலில், என்னை வெற்றி பெற வைத்து,
மூன்றாவது முறை முதல்வராக பணியாற்றும் வாய்ப்பை
வழங்கியதற்கு, முதலில் நன்றி.

கடந்த தி.மு.க., ஆட்சியில், அனைத்து துறைகளும், பாதாளத்திற்கு
கொண்டு செல்லப்பட்டன. நில அபகரிப்பு, நாள்தோறும் கொலை,
கொள்ளை, சட்டம் - ஒழுங்கு பிரச்னை என்பதுடன், மின்வெட்டால்
தமிழகமே இருள் சூழ்ந்த நிலைக்கு தள்ளப்பட்டது. அவல ஆட்சியை
தந்த தி.மு.க.,வை, உங்கள் துணையோடு வீழ்த்தி, அ.தி.மு.க.,
ஆட்சியை மீண்டும் ஏற்படுத்தி, தமிழகத்தை முன்னேற்றப் பாதையில்
கொண்டு சென்றுள்ளேன்.

தமிழக மக்களின் உரிமையை நிலை நிறுத்துவதோடு,
தமிழக மக்களின் வாழ்வு நலம் பெற, பல்வேறு திட்டங்களை
செயல்படுத்தினேன்.

மகத்தான வெற்றி:

அதை அங்கீகரிக்கும் வகையில், லோக்சபா தேர்தலில்,
அ.தி.மு.க.,விற்கு மகத்தான வெற்றியை, தமிழக மக்கள் தந்தனர்.
ஸ்ரீரங்கம் தொகுதிக்கு, தற்போது இடைத்தேர்தல் அறிவிக்கப்பட்டு
உள்ளது. இது, நீங்கள் விரும்பாத இடைத்தேர்தல் என்பதை அறிவேன். எ
ன் மீது போடப்பட்ட வழக்கின் தீர்ப்பு காரணமாக, இடைத்தேர்தல்
வந்துள்ளது. சதியும், விதியும் இணைந்து நடத்திய சதிராட்டத்தில்,
விளைந்திட்ட இடைத்தேர்தல்.ஸ்ரீரங்கம் தொகுதி வாக்காளர்களாகிய,
உங்கள் அன்பையும், பற்றையும், என்னுடன் பின்னி பிணைந்துள்ள
பாசத்தையும், இந்த இடைத்தேர்தலால் எள்ளளவும் குறைத்திட
இயலாது.

கீழமை நீதிமன்றத்தில் வழங்கப்பட்ட தீர்ப்பு இறுதியானதல்ல.
இந்த தீர்ப்பின் மீது, மேல்முறையீடு செய்யப்பட்டு, அந்த வழக்கு
நடந்து கொண்டிருக்கிறது.தற்போது நடைமுறையில் உள்ள தீர்ப்பு,
இறைவனின் திருவிளையாடல். நமக்கு சோதனை அளித்துள்ள
இறைவன், நம் நெஞ்சுரத்தை வலுப்படுத்தி, இதையே சாதனையாக
மாற்றி விடுவார் என்பதில், எனக்கு அதிக நம்பிக்கை உள்ளது.

எனினும், இந்த இடைப்பட்ட காலத்தில், தேர்தல் சட்ட விதி
முறைகளின்படி நடைபெறும், இந்த இடைத்தேர்தலில், உங்கள்
ஓட்டுகளை, அ.தி.மு.க., வேட்பாளர் வளர்மதிக்கு வழங்கிடும்படி,
இந்த கடிதம் மூலம் கேட்டுக் கொள்கிறேன்.

இயலாத நிலையில்...:

நேரில் சந்தித்து, ஓட்டு சேகரிக்க இயலாத நிலையில்,
தற்போது நான் உள்ளேன்; எனவே தான், நேரடியாக வரவில்லை.
என் மீது, அளவற்ற பற்றும், பாசமும் கொண்டுள்ள நீங்கள், உங்கள்
வீடு தேடி நானே நேரடியாக வந்து, ஓட்டு சேகரிப்பதாகக் கருதி,
உங்கள் ஓட்டுகளை, அ.தி.மு.க., வேட்பாளருக்கு வழங்கி, அவரை
மகத்தான வெற்றி பெற வைக்க வேண்டும் என, உங்களை வேண்டி
கேட்டுக் கொள்கிறேன்.

இவ்வாறு, ஜெயலலிதா தெரிவித்து உள்ளார்.

- நமது நிருபர் -தினமலர்