மினி ஸ்டோரி - விளையாட்டு!

**ayyasamy ram** · **ayyasamy ram** Sat Jan 31, 2015 7:31 am

-

மஞ்சகுப்பம் என்னும் ஊரில் அன்று பெருமழை
பெய்தது. ஏரி, குளம், கிணறு எல்லாம் நிரம்பி
வழிந்தன. பயிர்களெல்லாம் தழைத்தன.

பிரசாத்தும், சாரதியும் நண்பர்கள். அன்று,
அவர்களுக்குப் பள்ளி விடுமுறை விடப்பட்டதால்,
இருவரும் குளத்தில் நீச்சலடிக்கச் சென்றனர்.

அவர்கள் இருவரும் சேர்ந்து தங்கள் நண்பர்களைக்
குளத்தில் நீந்திக் குளிக்க அழைத்தனர். ஆனால்,
அவர்களோ, ""அடைமழை பெய்துள்ளதால் குளத்தில்
அதிக நீர் இருக்குமென்றும், ஆழம் அதிகமாக
இருக்கும் என்றும் அதனால் குளத்தில் குளிக்கச்
செல்லக்கூடாது என்று தங்கள் பெற்றோர்
கூறியிருப்பதால் தாங்கள் வரவில்லை,'' என்றும்
கூறிவிட்டனர்.
-
பிரசாத்தும், சாரதியும் அவர்களையெல்லாம் பார்த்து,
"போங்கடா பயந்தாங்கொள்ளிகளா,'' என்று கூறி
விட்டு குளத்தில் நீந்தச் சென்றனர்.
-
இருவரும் நெடுநேரம் நீந்தினர். திடீரென்று பிரசாத்,
சாரதியை பார்த்து, ""நான் நீருக்குள் ஒளிந்து
கொள்கிறேன். என்னை நீ கண்டுபிடி,'' என்று கூறி நீரில்
மூழ்கினான்.

சாரதி நீருக்குள் உள் நீச்சல் அடித்தப்படியே பிரசாத்தை
தேடினான். பிரசாத்தைக் கண்டுபிடிக்க முடியவில்லை.
நேரமாகிக் கொண்டே போனது. சாரதிக்குப் பயம் வந்து
விட்டது.

"ஒருவேளை பிரசாத் நீருக்குள் மூழ்கி இறந்து விட்டானோ'
என நினைத்தான். அவ்வாறு அவன் நினைத்தபோது
நீருக்குள் இருந்தும், அவனுக்கு வியர்த்தது.

சாரதி மீண்டும் ஒருமுறை நீரில் மூழ்கிப் பார்த்து பிரசாத்தை
தேடினான். அவன் கிடைக்கவில்லை. உடனே சாரதி
கரைக்கு வந்து, உடை களை மாற்றிக் கொண்டு ஆட்களைக்
கூட்டி வர ஊருக்குள் ஓடினான். ஆட்கள் வந்தனர். நீருக்குள்
பாய்ந்து பிரசாத்தைத் தேடினர். இறுதியில் ஒருவர்
பிரசாத்தை தோளில் போட்டுக் கொண்டு கரையேறினார்.
-
பிரசாத் நீருக்குள் இருந்த சேற்றில் சிக்கிக் கொண்டதால்,
அவனால் அதிலிருந்து வெளியேற முடியவில்லை.
சிறிதளவு சுவாசம் இருந்தது. உடனே ஆட்கள் அவனை
மருத்துவமனையில் சேர்த்து உயிர் பிழைக்கச் செய்தனர்.
-
பிரசாத் உடல் நலத்துடன் வீட்டுக்குக் கிளம்பும் போது
மருத்துவர் அவனிடம், ""துன்பத்தில் முடியும்
விளையாட்டுகளை விடையாடாதே,'' என்று அறிவுரை
கூறி அனுப்பினார்.
-
இது பிரசாத்துக்கு மட்டுமல்ல உங்களுக்கும் தான் குட்டீஸ்!
***
==================================================
நன்றி--சிறுவர் மலர்