ஹீரோயின் – ஒரு பக்க கதை

by **ayyasamy ram** Tue Jan 27, 2015 8:10 am

விஷத்தை குளிர்பானத்தில் ஊற்றினாள் ஷாலினி.

கதவு தட்டும் சத்தம். எழுந்தாள்.

“ஏண்டி, இப்படி அழுதுகிட்டு கிடக்குறே…
இது போனால் என்ன? அடுத்த வாய்ப்பு நல்லா வரும்’
என்றாள் அம்மா.

“இல்லேம்மா… என்னை இப்படி ஹீரோயினா நடிக்க
விடாம கெடுத்தது அந்த டைரக்டர்தான். ப்ரொடியூசர்,
மத்தவங்க எல்லாம் என்னைத்தான் ஹீரோயினா
போடணும்னு சொல்லியும் அந்த செல்வாக்கான
டைரக்டர் கேட்கலே. எனக்கு அடுத்ததாக வந்தவளை
ஹீரேயினா போடுவேன்னு சொல்லிட்டார். நான் கோபமா
வந்துட்டேன்.’

“போனா.. போகட்டும்டீ… வந்து சாப்பிட்டுவிட்டு படு…’

“இல்லேம்மா.. எனக்கு பசிக்கலே..’

கதவை படாரென மூடினாள்.

விஷம் கலந்திருந்த குளிர்பானத்தை கடகடவென குடித்தாள்.

கொஞ்ச நேரத்தில் செல்போன் ஒலித்தது. எடுத்தாள்.

“நான் டைரக்டர் சுரேஷ் பேசுறேன்’

“சார்… ஏன் சார் நடிக்க விடாம செஞ்சிட்டீங்க…’ கோபமாக கத்தினாள்.

“அதற்கு காரணம்.. உன் அழகுதான். என்னமா உடலமைப்பை
மெயின்டெய்ன் பண்றீங்க.. ஐ லவ் யூ ஷாலினி.. என்னை
கல்யாணம் செஞ்சுக்குவியா? என் வாழ்க்கைக்கே.. உன்னை
ஹீரோயினா ஆக்க விரும்புகிறேன்… சம்மதிப்பியா?..’

“ஐயோ.. இது புரியாமல் நான்… நான்…’ சொல்லிக்கொண்டே
மயக்கமடைந்து கொண்டிருந்தாள். மறுமுனையில் அதிர்ந்தான் அவன்.

===========================================

– எஸ். மகேந்திரன்
நன்றி--குமுதம்