"பாகிஸ்தான் முழுவதும் மின்சாரம் துண்டிப்பு: பயங்கரவாதிகள் சதி வேலை'

பாகிஸ்தான் முழுவதும் சனிக்கிழமை நள்ளிரவு முதல் ஏற்பட்ட மின் துண்டிப்புக்கு பயங்கரவாதிகளின் சதி வேலையே காரணம் என அதிகாரிகள் தெரிவித்தனர்.

சனிக்கிழமை நள்ளிரவு முதல் ஏற்பட்ட மின் துண்டிப்பைத் தொடர்ந்து, நாட்டின் பெரும்பாலான பகுதிகள் இருளில் மூழ்கின. ஞாயிற்றுக்கிழமை இரவு, தேசிய மின்பாதையில்

7,500 மெகாவாட் மின்சாரம் சேர்க்கப்பட்டதைத் தொடர்ந்து, பல்வேறு பகுதிகளில் மின்சார விநியோகம் இயல்பு நிலைக்குத் திரும்பத் தொடங்கியது.

இந்த சம்பவத்தின் பின்னணியில் பயங்கரவாதிகளின் சதி வேலை இருந்தது தற்போது தெரிய வந்துள்ளது. இது தொடர்பாக, தேசிய நீர் மற்றும் மின்சாரத் துறைச் செயலர் யூனிஸ் தாகா கூறுகையில், சிபி, குவெட்டா ஆகிய நகரங்களின் இடையே மின் தொடர்பை அளித்து வரும் மின் விநியோக கோபுரங்கள் சனிக்கிழமை நள்ளிரவு தகர்க்கப்பட்டது.

இதையடுத்து, சிந்து மாகாணத்தில் உள்ள குட்டு மின் உற்பத்தி நிலையத்தில் மின் அழுத்தம் அதிகரித்து, தொடர்பு துண்டிக்கப்பட்டன. இதைத் தொடர்ந்து, ஞாயிற்றுக்கிழமை அதிகாலையில், நாடு முழுவதும் மின் தொடர்பு பாதிக்கப்பட்டது.

இதனை சரி செய்ய, அன்று மாலைக்குள், 7,500 மெகாவாட் அளவிலான மின்சாரம் தேசிய மின் பாதையில் சேர்க்கப்பட்டது. அதன் பிறகுதான், நாடு முழுவதும் மின் தொடர்பு இரவு முதல் இயல்பு நிலைக்குத் திரும்பத் தொடங்கியது
======
-தினமணி