அரபு நாடுகளில் தவித்த பல்லாயிரம் இந்தியர்களுக்கு உதவிய கொடையாளர்களுக்கு துபாயில் நடந்த பாராட்டு விழா

வேலை செய்வதற்காக வளைகுடா நாடுகள் என அழைக்கப்படும் அரபு நாடுகளுக்கு சென்று அங்கு எதிர்பாராத வகையில் சிக்கல்களில் தவித்த பல்லாயிரம் இந்தியர்களுக்கு உதவி செய்துள்ள இந்தியாவை சேர்ந்த கொடையாளர்கள் இருவருக்கு துபாயில் பாராட்டு விழா நடத்தி கவுரவிக்கப்பட்டது.

அரபு நாடுகள் முழுவதும் இன்று பிரபலமாக அறியப்படும் இந்தியப் பெயர், பாரத் பாய் ஜெயந்தி லால் ஷா(85).

குஜராத்தை சேர்ந்த இவர் தனது 15வது வயதில் வேலைக்காக ஏமன் நாட்டுக்கு வந்தார். 1949-ம் ஆண்டு அங்குள்ள ஒரு கப்பல் நிறுவனத்தில் வேலை செய்த அவர், பின்னர் சவுதி அரேபியாவில் வேறொரு வேலையை தேடிக் கொண்டார்.

துபாயில் உள்ள கடல் கடந்த இந்தியர்களுக்கான பேரவையின் நிறுவனராகவும், குஜராத் சமாஜத்தின் தலைவராகவும் உள்ள ஷா, வளைகுடா நாடுகளில் வசிக்கும் சக்தி வாய்ந்த மற்றும் செல்வாக்கு படைத்த நூறு இந்தியர்களில் ஒருவராக தற்போது உயர்ந்துள்ளார்.

இந்த தகுதியை பயன்படுத்தி வளைகுடா நாடுகளில் விபத்தில் மரணமடைந்த இந்திய தொழிலாளிகளின் உடல்களை இந்தியாவுக்கு அனுப்பி வைப்பது, வழக்குகளில் சிக்கி சிறையில் வாடும் இந்தியர்களின் விடுதலைக்கு உதவுவது, மோசடி ஏஜெண்ட்கள் மற்றும் சம்பளம் தராத முதலாளிகளிடம் சிக்கிக் கொள்ளும் இந்தியர்களின் தகராறுகளை தீர்த்து வைத்து, அவர்களின் விமான கட்டணத்தை ஏற்று இந்தியாவுக்கு அனுப்பி வைப்பது உள்ளிட்ட பல்வேறு உதவிகளை ஷாவும், அஷ்ரப் என்பவரும் செய்து வருகின்றனர்.

இவர்களின் கொடை குணத்தையும், இந்தியர்களுக்கு ஆற்றிவரும் தொண்டையும் போற்றும் வகையில் பாரத் பாய் ஜெயந்தி லால் ஷா மற்றும் அஷ்ரப் ஆகியோருக்கு துபாயில் பாராட்டு விழா நடைபெற்றது. ஐக்கிய அரபு எமிரேட்டுக்கான இந்திய உயர் தூதர் சீத்தாராம், துபாய்க்கான இந்திய துணை தூதர் அனுராக் பூஷன் ஆகியோர் இவ்விழாவில் சிறப்பு விருந்தினராக பங்கேற்றனர்.

இந்த விழாவில் பாராட்டப்படும் ஷாவும், அஷ்ரப்பும் அரபு நாடுகளில் வேலை செய்துவரும் இந்தியர்களுக்காக தங்களையே அர்ப்பணித்துக் கொண்டவர்கள். பாராட்டு விழா எடுத்து, கவுரவிப்பதற்கு இவர்கள் உண்மையிலேயே தகுதியானவர்கள் என இந்திய உயர் தூதர் சீத்தாராம் புகழாரம் சூட்டினார்.
-maalaimalar

பாராட்டுகள் ஷா ஐயா