இலங்கையின் முன்னாள் அதிபர் ராஜபக்சேநாட்டின் பொது நிதியைத் தவறாகப் பயன்படுத்தியதாக குற்றம்சாட்டி முறைப்படி புகார் பதிவு செய்யப்பட்டுள்ளது’

கொழும்பு: இலங்கையின் முன்னாள் அதிபர் ராஜபக்சே, குடும்பத்தினர் பொது நிதியை தவறாக பயன்படுத்தியதாக ஊழல் தடுப்பு கமிஷனில் ஆளும் கட்சி புகார் அளித்திருப்பது பரபரப்பை ஏற்படுத்தி உள்ளது. இலங்கை அதிபர் தேர்தலில் ராஜபக்சே தோல்வி கண்டார். புதிய அதிபராக மைத்ரி பால சிறிசேன பதவி ஏற்றார். இதைத் தொடர்ந்து, ராஜபக்சே மீது பல்வேறு குற்றச்சாட்டுகள் அடுக்கடுக்காக கூறப்பட்டு வருகின்றன. அவரது ஆட்சியின் போது, ராஜபக்சேவின் மகன்கள், சகோதரர்கள் பல்வேறு ஊழலில் ஈடுபட்டதாகவும், பல பெண்களை பலாத்காரம் செய்ததாகவும் புகார்கள் குவிகின்றன. ஆனாலும், முந்தைய ஆட்சியாளர்கள் மீது பழிவாங்கும் நடவடிக்கை எடுப்பதில் ஆர்வம் காட்டாமல், நாட்டின் வளர்ச்சிப் பணிகளில் மட்டுமே அரசு கவனம் செலுத்தும் என அதிபர் சிறிசேன கூறியிருந்தார். அவரது முன்னிலையில் புதிய அமைச்சரவை நேற்று முன்தினம் பதவி ஏற்றது. இந்த நிலையில், ஆளும் கட்சி கூட்டணியில் இடம்பெற்றுள்ள இடதுசாரி கட்சியான ஜனதா விமுக்தி பெரமுனா (ஜேவிபி), லஞ்சம் மற்றும் ஊழல் தடுப்பு கமிஷனில் நேற்று புகார் மனு ஒன்றை அளித்தது.

இது குறித்து, ஜேவிபியின் நாடாளுமன்ற உறுப்பினர் விஜிதா ஹேரத் அளித்த பேட்டியில், ‘முன்னாள் அதிபர் மகிந்தா ராஜபக்சே, அவரது சகோதரர்களான முன்னாள் அமைச் சர் பசில் ராஜபக்சே, நாடாளுமன்ற உறுப்பினர் நாமல் ராஜபக்சே, முன்னாள் பாதுகாப்பு செயலர் கோத்தபய ராஜபக்சே, முன்னாள் மத்திய வங்கியின் ஆளுநர் அஜித் நிவாட் கப்ரால் மற்றும் முன்னாள் அமைச்சர்கள் என 12 பேர் மீது, நாட்டின் பொது நிதியைத் தவறாகப் பயன்படுத்தியதாக குற்றம்சாட்டி முறைப்படி புகார் பதிவு செய்யப்பட்டுள்ளது’ என்றார். இதுகுறித்து முழு விசாரணை நடத்தப்பட வேண்டும் என்றும், அதுவரை ராஜபக்சே மற்றும் குடும்பத்தினர் வெளிநாடு தப்பிச் செல்லாத வகையில் கண்காணிக்க வேண்டும் என்றும் ஜேவிபி கட்சி அரசுக்கு கோரிக்கை விடு த்துள்ளது. இது குறித்து ராஜபக்சேவிடம் கேட்ட போது, ‘வெளிநாட்டுக்கு தப்பிச் செல்ல மாட்டேன். என் மீதான குற்றச்சாட்டுகளை எதிர்த்து சட்டரீதியாக போராடுவேன்’ என கூறியிருப்பதாக தகவல்கள் வெளியாகி உள்ளன