இன்றும், நாளையும் ஜல்லிக்கட்டு நடப்பது கேள்விக்குறி

மத்திய அரசு அறிவிப்பு வெளியாகதது, உச்ச நீதிமன்றத்தில் மனு விசாரணை எடுத்து கொள்ளப்படாதது போன்ற பிரச்னைகளால், இன்று அவனியாபுரத்திலும், நாளை பாலமேட்டிலும், ஜல்லிக்கட்டு நடப்பது கேள்விக்குறியாகி உள்ளது.

பரிசீலனை மனு:

ஜல்லிக்கட்டு நடத்த, கடந்த மே மாதம் உச்ச நீதிமன்றம் தடை விதித்தது. விலங்குகளை காட்சிப்படுத்த தடை விதிக்கும் பட்டியலில், காளை சேர்க்கப்பட்டதால், இத்தடை ஏற்பட்டது. 'இத்தீர்ப்பை, பரிசீலிக்க வேண்டும்' என, தமிழக அரசு மற்றும் ஜல்லிக்கட்டு பாதுகாப்பு நல சங்கம், ஜல்லிக்கட்டு பேரவை ஆகியவை, உச்ச நீதிமன்றத்தில் மனு செய்துள்ளன. 'பரிசீலனை மனுவை, உடனடியாக விசாரிக்க வேண்டும்' என, தமிழக அரசு சார்பில், உச்ச நீதிமன்றத்தில், அவசர மனு ஒன்று, நேற்று முன்தினம் தாக்கல் செய்யப்பட்டது. இதற்கிடையே, விலங்குகளை காட்சிப்படுத்துவதை தடை செய்யும் பட்டியலில் இருந்து, காளையை நீக்க வேண்டும் என, மத்திய வனத்துறை அமைச்சகத்திடம், தமிழக அரசு வலியுறுத்தியது. இக்கோரிக்கையை ஏற்று, மத்திய அரசின் அறிவிப்பு, நேற்று வெளியாகும். அதைக் கொண்டு, ஜல்லிக்கட்டுக்கு விதிக்கப்பட்ட தடைக்கு, உச்ச நீதிமன்றத்தில், இடைக்கால தடை பெறலாம் என, எதிர்பார்த்தனர். ஆனால், மத்திய அரசு அறிவிப்பு வெளியிடவில்லை. மேலும், தமிழக அரசு தாக்கல் செய்த, மறுபரிசீலனை மனுவும், உச்ச நீதிமன்றத்தில் விசாரணைக்கு எடுத்துக் கொள்ளப்படவில்லை.



அவனியாபுரத்தில்...:

ஜல்லிக்கட்டு மனு, இன்று விசாரணைக்கு வரலாம் என, எதிர்பார்க்கப்படுகிறது. பொதுவாக, ஆண்டு தோறும், பொங்கல் அன்று, அவனியாபுரத்திலும், மாட்டு பொங்கல் அன்று, பாலமேட்டிலும், காணும் பொங்கல் அன்று, அலங்காநல்லூரிலும் ஜல்லிக்கட்டு நடக்கும். பிரச்னை நடப்பதால், இன்றும், நாளையும் ஜல்லிக்கட்டு நடக்குமா என்பது, கேள்விக்குறியாக உள்ளது. எனவே, அலங்காநல்லூரிலாவது, ஜல்லிக்கட்டு நடத்த திட்டமிட்டு உள்ளனர். அதற்கு முன்பாவது, அனுமதி கிடைக்க வேண்டும் என, ஜல்லிகட்டு ஆர்வலர்கள் எதிர்பார்க்கின்றனர்.



பொன்.ராதாகிருஷ்ணன் நம்பிக்கை:

மதுரையிலிருந்து சென்னை வந்த மத்திய அமைச்சர் பொன்.ராதாகிருஷ்ணன், நிருபர்களுக்கு அளித்த பேட்டி: தமிழகத்தில் ஜல்லிக்கட்டு நடைபெறுவதற்காக, மத்திய வனத்துறை அமைச்சரை சந்தித்து பேசி இருக்கிறேன். கட்டாயம் போட்டி நடக்கும் என, அவர் உறுதியளித்துள்ளார். இதற்கு தேவையான அனைத்து நடவடிக்கைகளும் எடுக்கப்படும் என்றும் சொல்லியிருக்கிறார். அதனால், நல்ல முடிவு எட்டப்படும். இந்த ஆண்டு, ஜல்லிக்கட்டு நடக்கும். திருவள்ளுவரும், தமிழும் ஒரு குறிப்பிட்ட குடும்பத்திற்குத் தான் சொந்தம் என்பது போல அவர்கள் செயல்பட்டதை முறியடித்திருக்கிறோம். சொல்லப் போனால், தமிழர்களுக்கும், தமிழுக்கும் இதுவரை ஆட்சி யில் இருந்த கட்சிகள், 10 சதவீத அளவுக்கு கூட நன்மைகள் செய்தது இல்லை. ஆனால், குறுகிய காலத்திலேயே, பா.ஜ., நிறைய செய்திருக்கிறது. ஸ்ரீரங்கம் இடைத்தேர்தலில் போட்டியிட, தமிழக பா.ஜ., விருப்பமாக இருக்கிறது. இதை தலைமைக்கு சொல்லி விட்டனர். அதனால், விரைவில் தலைமை ஒப்புதல் அளிக்கும்.