சேலத்தில் ஒரே நாளில் 9 போலி டாக்டர்கள் கைது; எஸ்.எஸ்.எல்.ஸி., படித்தவர்கள் சிகிச்சை அளித்தது அம்பலம்

ஆத்தூர் : பத்தாம் வகுப்பு படித்து விட்டு, சேலம் மாவட்டத்தில் மருத்துவம் பார்த்த, போலி டாக்டர்கள்,9 பேரை போலீஸார் கைது செய்தனர்.

சேலம் மாவட்டத்தில், ஆத்தூர், தலைவாசல், ஓமலூர் பகுதிகளில், போலி டாக்டர்கள் எண்ணிக்கை அதிகரித்துள்ளது. அங்கீகரிக்கப்பட்ட டாக்டர்களிடம், உதவியாளராக பணிபுரிந்த நபர்களும், சித்தா, ஆயுர்வேத மருத்துவமனை மற்றும் மெடிக்கல் வைத்தும், "போலி' டாக்டர்கள், பொதுமக்களுக்கு, ஊசி, மருந்து, மாத்திரை கொடுத்து சிகிச்சை அளிப்பதாக, புகார் எழுந்தது.மாவட்ட கலெக்டர் மகரபூஷணம், "போலி' டாக்டர்களை கண்டறிந்து, நடவடிக்கை எடுக்கும்படி உத்தரவிட்டார். நேற்று, மாவட்ட எஸ்.பி., சக்திவேல் தலைமையில், ஆத்தூர் டி.எஸ்.பி., காசிநாதன், இன்ஸ்பெக்டர்கள் ஆத்தூர் ரவிச்சந்திரன், தலைவாசல் விஸ்வநாதன் உள்ளிட்ட போலீஸார், ஆத்தூர் மற்றும் தலைவாசல் பகுதியில், ஆய்வு பணி மேற்கொண்டனர்.

ஆத்தூர் வ.உ.சி., நகரில், "சிகாமணி' கிளினிக் வைத்திருந்த, முல்லைவாடி, கம்பன் தெருவை சேர்ந்த ராமநாதன், 43, மஞ்சினி "முத்து' மெடிக்கல், முத்துக்குமார், 33, ஆத்தூர் பழைய பஸ் ஸ்டாண்டில், "சுபம்' மருத்துவமனை, சுரேஷ், 31, ஆகிய மூன்று பேரை, போலீஸார் கைது செய்தனர்.தலைவாசல் அருகே, சிறுவாச்சூர் கிராமத்தில், "ராமு' மெடிக்கல் உரிமையாளர் ராமர், 65, சக்குபாய் மெடிக்கல் உரிமையாளர் கண்ணுசாமி, 45, என, மொத்தம், 5 போலி டாக்டர்களை போலீஸார் கைது செய்தனர்.இதில், ராமநாதன் என்பவர் ப்ளஸ் 2 வரையும், மற்றவர்கள், எஸ்.எஸ்.எல்.ஸி., வரையும் படித்துள்ளனர். சித்த மருத்துவம் என்ற பெயரில், அலோபதி மருத்துவ சிகிச்சை அளித்தது தெரியவந்தது. கடந்த, 2006, சட்டசபை தேர்தலில், கண்ணுசாமி மனைவி கீதா, தே.மு.தி.க., சார்பில், கெங்கவல்லி தொகுதி வேட்பாளராக போட்டியிட்டார் என்பது குறிப்பிடத்தக்கது. இவர்கள் மீது, ஆத்தூர் மற்றும் தலைவாசல் போலீஸார், இந்திய மருத்துவ சட்டம் உள்பட மூன்று பிரிவுகளில், வழக்கு பதிவு செய்தனர்.

*ஓமலூர் மற்றும் சுற்றுவட்டார பகுதியில், டாக்டர் எனக்கூறி, சிலர் ஆங்கில மருத்துவம் பார்ப்பதாக புகார் எழுந்தது. ஓமலூர் இன்ஸ்பெக்டர் செந்தில்குமார், அரசு மருத்துவமனை அலுவலர் வளர்மதி ஆகியோர், நேற்று ஓமலூர், தர்மபுரி மெயின் ரோட்டில் உள்ள அமர்தலிங்கம் மருத்துவமனைக்கு சென்று ஆய்வு மேற்கொண்டனர்.பத்துக்கும் மேற்பட்ட அறைகளுடன், நவீன படுக்கை வசதிகளுடன் கூடிய மருத்துவமனையின், நுழைவு வாயிலில் டாக்டர் முத்துசாமி, எம்.பி.பி.எஸ்., ஆர்த்தோ மருத்துவர் என, சிறிய அளவிலான பெயர் பலகை மட்டும் வைக்கப்பட்டிருந்தது. மருத்துவமனைக்கு உள்ளே சென்ற அதிகாரிகள், உள் நோயாளிகளுக்கு மருத்துவம் பார்த்துக் கொண்டிருந்த நபரிடம், "இங்கு டாக்டர் முத்துசாமி யார்?' என கேட்டனர்.அப்போது, அந்த நபர், தன் பெயர் முத்துசாமி என்றும், நான் தான் இங்கு டாக்டர் எனவும் தெரிவித்தார். அவரது மருத்துவ சான்றிதழை காண்பிக்குமாறு போலீஸார் கேட்டனர். அப்போது, முன்னுக்குப் பின் முரணாக பேசிய அவர், தன் பெயர் ரவிச்சந்திரன் என்றும், டாக்டர் முத்துசாமி வெளியில் சென்றுள்ளதாகவும் தெரிவித்தார்.

இதையடுத்து, டாக்டர் முத்துசாமியை வரவழைத்த போலீஸார், அவரிடம் விசாரணை நடத்தினர். விசாரணையில் டாக்டர் முத்துசாமி, சேலம் ஸ்வர்ணபுரியில் வசித்து வருவதாகவும், ஓய்வுபெற்ற ஆர்த்தோ மருத்துவர் என்றும் தெரிவித்தார். சனிக்கிழமை மட்டும், மாலை, 4 மணியிலிருந்து, 6 மணி வரை இந்த மருத்துவமனையில் மருத்துவம் பார்த்து செல்வதாகவும், எழுத்து மூலமாக தெரிவித்தார். இதையடுத்து, சேலம் சுகாதாரப் பணிகள் இணை இயக்குனர் டாக்டர் விஜயலட்சுமி, சேலம் மருத்துவ கண்காணிப்பாளர் மாதேஸ்வரன் ஆகியோர் தலைமையிலான குழுவினர், கல்வி சான்றிதழ் மற்றும் மருத்துவமனையை ஆய்வு செய்தனர். அப்போது, மருத்துவமனை நடத்துவதற்கு தகுதியான எந்த படிப்பையும் அவர் படிக்கவில்லை என்பதும், ஆங்கில வைத்தியம் பார்ப்பதற்கான தகுதியில்லாதவர் எனவும், 15 ஆண்டுகளாக இந்த மருத்துவமனையை நடத்தி வந்ததும் தெரியவந்தது. இதையடுத்து மருத்துவமனையில் இருந்த மருந்து மற்றும் மாத்திரகளை பறிமுதல் செய்த போலீஸார், ரவிச்சந்திரனை கைது செய்தனர்.

ஓமலூர் அடுத்த டேனிஸ்பேட்டையில், அதே பகுதியை சேர்ந்த பூபதி, 58, என்பவர், ஹோமியோபதி மருத்துவம் மட்டுமே படித்துவிட்டு, ஆங்கில வைத்தியம் பார்த்ததாக புகார் வந்தது. தீவட்டிபட்டி போலீஸார் பூபதியை கைது செய்தனர்.சேலம் மாவட்டம், தம்மம்பட்டி அருகே, செந்தாரப்பட்டி பேரூராட்சி, பஜனை மடத் தெருவை சேர்ந்தவர் சிவராஜ், 53. பி.எஸ்.ஸி., படித்த இவர், தனது வீட்டின் ஒரு பகுதியில், மருத்துவமனை அமைத்து, நோயாளிகளுக்கு ஊசி போட்டு, மருந்து, மாத்திரை வழங்கி, அலோபதி சிகிச்சை அளித்து வந்தார். நேற்று, தம்மம்பட்டி போலீஸார், போலி டாக்டர் சிவராஜை கைது செய்தனர்.வாழப்பாடி அருகே, வெள்ளாளகுண்டம் கிராமம், குறும்பர் தெருவை சேர்ந்த, கிரி, 43, என்பவர், ப்ளஸ் 2 வரை படித்துள்ளார். இவர், அதே பகுதியில், "வசந்தன் கிளினிக்' என, தனியாக நடத்தி வந்தார். அலோபதி சிகிச்சை அளித்து வந்த, "போலி' டாக்டர் கிரி என்பவரை, வாழப்பாடி போலீஸார் கைது செய்தனர்.

சேலம் மாவட்டத்தில், ஆத்தூரில் மூன்று பேர், தலைவாசல் பகுதியில், இருவர், தீவட்டிப்பட்டி, தம்மம்பட்டி, வாழப்பாடி மற்றும் ஓமலூரில் தலா, ஒரு போலி டாக்டர் உள்ளிட்ட, 9 பேர் நேற்று ஒரே நாளில் கைது செய்யப்பட்டனர். தொடர்ந்து, போலி டாக்டர்கள் வேட்டை, இன்றும் நடக்கும் என போலீஸார் தெரிவித்துள்ளனர். குறிப்பாக, மேட்டூர், சங்ககிரி டிவிசனில், பெரிய அளவில், சோதனை நடத்தப்பட உள்ளதாக போலீஸ் வட்டார தகவல்கள் தெரிவித்தனர்.