பெட்ரோல், டீசல் விலை லிட்டருக்கு ரூ.2 குறைய வாய்ப்பு

புதுடில்லி : சர்வதேச சந்தையில் கடந்த 6 ஆண்டுகளில் இல்லாத அளவிற்கு கச்சா எண்ணெய்யின் விலை கடுமையாக சரிந்து வருவதால் பெட்ரோல், டீசல் விலை மேலும் குறையும் நிலை ஏற்பட்டுள்ளது. பெட்ரோல், டீசல் விலை லிட்டருக்கு ரூ.2 குறைக்கப்பட உள்ளதாக தகவல்கள் வெளியாகி உள்ளன. கடந்த ஆண்டு ஜூன் மாதம் முதல் கச்சா எண்ணெய் விலை 60 சதவீதம் குறைந்துள்ளது.
அமெரிக்கா மற்றும் ரஷ்யாவைச் சேர்ந்த எண்ணெய் நிறுவனங்கள் பல, சர்வதேச எண்ணெய் சந்தைக்குள் நுழைந்திருப்பதால் போட்டியை சமாளிப்பதற்காக கச்சா எண்ணெய் விலையை ஒபெக் அமைப்பு குறைத்து வருகிறது. சர்வதேச சந்தையில் தற்போது ஒரு பேரல் கச்சா எண்ணெய் விலை 45 டாலர்களாக உள்ளது. இதன் காரணமாக இந்திய அரசும் பெட்ரோல், டீசல் விலையை அவ்வப்போது குறைத்து வருகிறது. கடந்த ஆண்டு ஆகஸ்ட் மாதத்திற்கு பின் பெட்ரோல் விலை லிட்டருக்கு ரூ.12.27ம், அக்டோபர் மாதம் முதல் டீசல் விலை லிட்டருக்கு ரூ.8.46ம் குறைக்கப்பட்டுள்ளது. தற்போது கச்சா எண்ணெய் விலை சரிவு தொடர்வதால் அடுத்த கட்டமாக ஜனவரி 15ம் தேதி முதல் பெட்ரோல், டீசல் விலையை மேலும் குறைக்க மத்திய அரசு திட்டமிட்டுள்ளது.
கச்சா எண்ணெய் விலை குறைவால் நாட்டின் பணவீக்கம், எண்ணெய் இறக்குமதி அளவு குறையவும் வாய்ப்புள்ளது. இதனால் மண்ணெண்ணை மற்றும் சமையல் எரிவாயுவிற்கு வழங்கப்படும் மானியத்தின் அளவும் குறைக்கப்படலாம். இந்த நிலை தொடரும் பட்சத்தில் பட்ஜெட்டில் வரி உயர்வு கணிசமாக குறையும் என எதிர்பார்க்கப்படுகிறது.
சர்வதேச சந்தையில் அமெரிக்க டாலருக்கு எதிராக இந்தியா ரூபாயின் மதிப்பு வலுப்பெற்று வருவதும் பெட்ரோல், டீசல் விலை குறைக்கப்படுவதற்கு முக்கிய காரணமாக அமைந்துள்ளது. 80 சதவீதத்திற்கும் அதிகமான இந்திய இறக்குமதியாளர்கள் கச்சா எண்ணெய்யை டாலர் மதிப்பிலேயே வாங்குவதால், டாலரின் மதிப்பு குறைந்து வருவதால் இந்தியாவில் பெட்ரோல், டீசல் விலை குறைவதற்கு காரணம் என பெட்ரோலிய திட்டக்குழு தெரிவித்துள்ளது.