மாநில நெடுஞ்சாலையில் உள்ள 'டாஸ்மாக்' கடைகளை அகற்ற உத்தரவு?

by kshanmuganathan Tue Jan 13, 2015 7:27 am

'மது அருந்த விட்டு, வாகனங்கள் ஓட்டுவதால் ஏற்படும் விபத்துகளால், தேசிய நெடுஞ்சாலை, மாநில நெடுஞ்சாலை என, தனித்தனியாக பிரித்து பார்க்க முடியாது' என, சுப்ரீம் கோர்ட் கூறியுள்ளதால், தமிழகத்தில், மாநில நெடுஞ்சாலையில் உள்ள, 'டாஸ்மாக்' கடைகளை மூட வேண்டிய அவசியம் ஏற்பட்டுள்ளது.

தமிழகத்தில், 6,830 டாஸ்மாக் கடைகள் உள்ளன. இந்த கடைகளில், அரசு நிர்ணயித்துள்ள விலையில், நாள்தோறும் சராசரியாக, 70 கோடி ரூபாய் மதிப்பிலான, மது வகைகள் விற்பனையாகின்றன. மொத்தம் உள்ள டாஸ்மாக் கடைகளில், தேசிய நெடுஞ்சாலை, 504; மாநில நெடுஞ்சாலையை ஒட்டி, 1,500 கடைகள் உள்ளன. 'குடித்து விட்டு வாகனம் ஓட்டுவதால் ஏற்படும் விபத்துகளை தடுக்க, தேசிய நெடுஞ்சாலை மற்றும் நகரின் முக்கிய சாலைகளை ஒட்டியுள்ள, 'டாஸ்மாக்' கடைகளை அகற்ற வேண்டும்' என, சென்னை, உயர் நீதிமன்றத்தில், 2013 துவக்கத்தில் வழக்கு தொடரப்பட்டது. இதையடுத்து, 'தேசிய நெடுஞ்சாலையில் உள்ள, 504 டாஸ்மாக் மதுபான கடைகளை, மார்ச், 31ம் தேதிக்குள் மூட வேண்டும்' என, தமிழக அரசுக்கு, உயர் நீதி மன்றம் உத்தரவிட்டது. பின், 'டாஸ்மாக் கடைகளை அகற்ற, கூடுதல் அவகாசம் அளிக்க வேண்டும்' என, தமிழக அரசின் சார்பில், சுப்ரீம் கோர்ட்டில் மனு தாக்கல் செய்யப்பட்டது. இந்த வழக்கு, அதே ஆண்டு மே மாதம், சுப்ரீம் கோர்டில் விசாரணைக்கு வந்தது.

அப்போது, 'தேசிய நெடுஞ்சாலையில் உள்ள, டாஸ்மாக் கடைகளை, ஆக., 14ம் தேதிக்குள் அகற்ற வேண்டும்' என, சுப்ரீம் கோர்ட் கால அவகாசம் வழங்கியது. இதையடுத்து, தேசிய நெடுஞ்சாலையில் இருந்த, 504 டாஸ்மாக் கடைகளும், வேறு இடங்களுக்கு மாற்றப்பட்டன. இந்நிலையில், இந்த வழக்கு, சுப்ரீம் கோர்ட்டில், நேற்று விசாரணைக்கு வந்தது. நீதிபதி கெஹர் தலைமையிலான, 'பெஞ்ச்' விசாரித்தது.

அப்போது, 'பெஞ்ச்' வெளியிட்ட உத்தரவு:

நெடுஞ்சாலைகளில், குடித்து விட்டு வாகனம் ஓட்டுவதால், தொடர்ந்து விபத்து ஏற்படுகிறது. இதை கட்டுப்படுத்த வேண்டும் என்பதற்காக தான், நெடுஞ்சாலைகளில், மதுபான கடைகள் இருக்கக் கூடாது என்ற கோரிக்கை எழுந்துள்ளது. எனவே இந்த விஷயத்தில், தேசிய நெடுஞ்சாலை, மாநில நெடுஞ்சாலை என, தனித்தனியாக பிரித்து பார்க்க முடியாது. இதனால், மாநில அரசின் நிலைப்பாடு குறித்து கொள்கை ரீதியிலான முடிவு எடுக்க வேண்டியது அவசியம். இதுதொடர்பாக முடிவு எடுத்து, பிப்., 17ம் தேதி, அதை கோர்ட்டில் சமர்ப்பிக்க வேண்டும். அதன் பின், இறுதி முடிவு எடுக்கப்படும். இவ்வாறு,'பெஞ்ச்' உத்தரவிட்டுள்ளது. இதனால், தேசிய நெடுஞ்சாலையில் இருந்த டாஸ்மாக் கடைகளை அகற்றியது போல், மாநில நெடுஞ்சாலைகளில் உள்ள கடைகளையும் அகற்ற வேண்டிய அவசியம் ஏற்பட்டுள்ளது.