பிரான்ஸ் பத்திரிகை அலுவலகத்தில் துப்பாக்கிச்சூடு: 11 பேர் பலி

-

பாரீசில் பத்திரிகை அலுவலகம் மீது நடத்தப்பட்ட தாக்குதலில் சிக்கியோர் மருத்துவமனைக்கு கொண்டு செல்லப்படுகின்றனர். | படம்: ஏ.எப்.பி.
----------------------------------------------------------------
பிரான்ஸ் தலைநகர் பாரீஸில் உள்ள பத்திரிகை அலுவலகத்தில் அடையாளம் தெரியாத நபர்கள் நடத்திய துப்பாக்கிச்சூட்டில் 11 பேர் பலியானதாக அந்நாட்டு தகவல்கள் தெரிவிக்கின்றன. மேலும், இந்தச் சம்பவத்தில் 10 பேர் காயமடைந்ததாகவும் தெரிவிக்கப்பட்டுள்ளது.

தலைநகர் பாரீசில் சார்லி ஹெப்டோ என்ற அங்கதத்துக்குப் பெயர்பெற்ற பத்திரிகை இயங்கி வருகிறது. இங்கு சில அடையாளம் தெரியாத நபர்கள் திடீரென துப்பாகிச்சூடு நடத்தியுள்ளனர்.

கண்மூடித்தனமாக துப்பாக்கிச் சூட்டில் சம்பவ இடத்திலேயே 11 பேர் பலியானதாக பிரான்ஸிலிருந்து வரும் தகவல்கள் தெரிவிக்கின்றன. பலியானவர்களில் 2 போலீஸார் அடங்குவர் என்று ஏ.எப்.பி. செய்தி நிறுவனம் தெரிவித்துள்ளது.

தாக்குதலைத் தொடர்ந்து பாரீஸ் நகரம் முழுவதும் போலீஸார் குவிக்கப்பட்டுள்ளனர்.

தாக்குதல் நடத்தப்பட்டிருக்கும் சார்லி ஹெப்டோ பத்திரிகை சமீபத்தில் ஐ.எஸ். பயங்கரவாத அமைப்பு தலைவர் அபு பக்கர் அல்-பாக்தாதியை கேலி செய்யும் விதமான கருத்துச் சித்திரித்தை தனது ட்விட்டர் பக்கத்தில் வெளியிட்டிருந்தது.

துப்பாக்கிச்சூடு சம்பவத்தை தொடர்ந்து ஃப்ரான்ஸ் அதிபர் ஃப்ரான்சிஸ் ஹாலண்டே அமைச்சரவைக் கூட்டத்தை அவசரநிலையில் கூட்டி பாதுகாப்பு ஏற்பாடுகள் குறித்து ஆலோசித்து வருகிறார்.

இந்த பத்திரிகை இதற்கு முன்பாக நடப்பு விவகாரங்கள் தொடர்பாக சில பொறுப்பற்ற செய்திகளை வெளியிட்டதாக சர்ச்சையில் சிக்கியது. முன்னதாக கடந்த 2011-ஆம் ஆண்டு நபிகள் நாயகம் குறித்து கருத்துச் சித்திரம் வெளியிட்ட இந்த பத்திரிகை மீது குண்டுவீசி தாக்குதல் நடத்தப்பட்டது குறிப்பிடத்தக்கது.
-
------------------------------------------------
தமிழ் தி இந்து.காம்