தமிழக எல்லைப் பகுதியில் தீவிரவாதிகளின் நடமாட்டம் குறித்து கண்காணிப்பு

-
தீவிரவாதத் தடுப்புக் கண்காணிப்பு சிறப்பு போலீஸார்
பொதுமக்களிடம் வழங்கிய சிமி தீவிரவாதிகளின்
புகைப்படம்.
----------------------------------
தமிழக எல்லைப் பகுதிகளில் தீவிரவாதிகளின் நடமாட்டம் குறித்து உளவுத் துறை அளித்த தகவலின்படி கடந்த சில நாள்களாக கண்காணிப்புப் பணியும் பொதுமக்களிடம் தகவல் தெரிவிக்கும் பணியும் நடைபெற்று வருகிறது.

கடந்த 2013-ஆம் ஆண்டு அக்டோபர் மாதம் மத்தியப்பிரதேச மாநிலம், போபால் அருகே உள்ள கண்ட்வா சிறையில் இருந்து 5 சிமி இயக்க தீவரவாதிகள் தப்பிச் சென்றனர்.

அது முதல் பல்வேறு மாநிலங்களில் அவர்களை தேடும் பணியில் அந்தந்த மாநில போலீஸார் ஈடுபட்டு வருகின்றனர்.

இந்தநிலையில், கடந்த சில நாள்களுக்கு முன்பு பெங்களூருவில் நடைபெற்ற குண்டு வெடிப்புக்கும், இவர்களுக்கும் தொடர்பு இருக்கலாம் என்ற உளவுத் துறை சந்தேகித்து

வரும் நிலையில் தமிழக எல்லைப் பகுதியில் தீவிரவாதிகள் பதுங்கி இருக்கலாம் என்ற உளவுத் துறை தீவிரவாதத் தடுப்புச் சிறப்புப் பிரிவு கூடுதல் காவல் துணைக் கண்காணிப்பாளர் திருநாவுக்கரசு ஆலோசனையின் பேரில் கும்மிடிப்பூண்டி, ஊத்துக்கோட்டை, திருத்தணி சரகத்தில் ஒவ்வொரு காவல் நிலையத்தில் இருந்து இரண்டு போலீஸார் என தனிக் குழு

அமைக்கப்பட்டு எல்லைப் பகுதியில் கண்காணிப்புப் பணி நடைபெற்று வருகிறது.

இந்தக் குழு, எல்லைப் பகுதியைச் சேர்ந்த கிராமங்களில் மட்டுமல்லாது தமிழக எல்லையை ஒட்டிய ஆந்திரப் பகுதியில் உள்ள கிராமங்களிலும் மேற்கண்ட 5 சிமி இயக்க தீவிரவாதிகளின் புகைப்படத்தைக் காட்டி இவர்களை கண்டால் அருகில் உள்ள காவல் நிலையத்துக்கு தகவல் தரும்படியும், ஊருக்குள் புதிய நபர்களின் நடமாட்டம் இருந்தால் அவர்கள் குறித்தும் தகவல் தரும்படியும் பொதுமக்களிடம் கேட்டுக் கொண்டு வருகின்றனர். இந்தநிலையில், ஆந்திரப் பகுதியான இருக்கம் பகுதியில் பழவேற்காடு ஏரியில் புதன்கிழமை இளைஞர் ஒருவர் தனியாக படகில் வருவதைக் கண்டு பீதியடைந்த மீனவர்கள் ஆந்திர போலீஸாருக்கு தகவல் அளித்தனர்.

தொடர்ந்து போலீஸார் பழவேற்காடு ஏரிக்குச் சென்று அந்த நபரை கைது செய்து விசாரித்ததில் அவரது பெயர் வம்சி என்றும், ஆந்திர மாநிலம், விசாகப்பட்டினத்தைச் சேர்ந்த கல்லூரி மாணவர் என்றும் தகவல் வந்தது.

மேலும், அவரிடம் ஆதார் அட்டை உள்ளிட்ட ஆவணங்கள் பெறப்பட்ட நிலையில் அவர் விடுவிக்கப்பட்டார்.

இதனிடையே, கடந்த ஞாயிற்றுக்கிழமை நள்ளிரவு தமிழக எல்லையை அடுத்த ஆந்திரப் பகுதியான பூண்டியில் சரக்குப் பெட்டக லாரியில் மறைந்திருந்து தப்பியோடிய மர்ம நபர்களுக்கும் தீவிரவாத கும்பலுக்கும் தொடர்பு இல்லை.

அவர்கள் செம்மரக் கடத்தல் கும்பல் என தடா போலீஸார் தெரிவித்துள்ளனர்.
=============
-தினமணி