இரவு-பகல் சுழற்சிப் பணி செய்தால் இருதய நோய்க்கான வாய்ப்பு

by **ayyasamy ram** Tue Jan 06, 2015 4:14 am

இரவிலும், பகலிலும் சுழற்சி முறையில் பணியாற்றுபவர்களுக்கு இருதய நோய்களும், நுரையீரல் புற்று நோயும் தாக்குவதற்கான வாய்ப்புகள் அதிகம் என அமெரிக்காவில் நடத்தப்பட்ட ஒரு ஆய்வில் தெரிய வந்துள்ளது.
-
இரவு நேரப் பணியாற்றுபவர்களை புற்று நோய் தாக்கும் வாய்ப்பு அதிகம் என உலக சுகாதார அமைப்பு 2007-ஆம் ஆண்டு தெரிவித்திருந்தது.
-
இந்நிலையில், பகல் அல்லது மாலை நேரப் பணியுடன், மாதமொன்றுக்கு குறைந்தது 3 இரவுகளாவது பணியாற்றுபவர்களின் உடல் நிலை குறித்து சர்வதேச ஆய்வுக் குழு அண்மையில் ஆய்வு நடத்தியது. அமெரிக்காவில் 15 ஆண்டுகளுக்கு மேல் சுழற்சி முறையில் பணியாற்றிய 74,862 செவிலியர்கள் குறித்த 22 ஆண்டு காலப் பதிவுகள் ஆய்வுக்கு உட்படுத்தப்பட்டன.
-
இந்த ஆய்வில், இரவு நேரப் பணியாளர்கள் குறித்த முந்தைய ஆய்வு முடிவுகளில் கூறப்பட்ட பாதிப்புகள் மட்டுமன்றி, சுழற்சி முறையில் இரவுப் பணியாற்றுபவர்களுக்கு கூடுதலாக இருதயம், ரத்தக் குழாய்கள் தொடர்பான நோய்கள் தாக்கும் அபாயம் இருப்பதாகத் தெரிய வந்துள்ளது.
-
மேலும், இரவுப் பணியாற்றுபவர்களுக்கு பல்வேறு புற்று நோய்கள் வருவதற்கான வாய்ப்புகள் அதிகம் என்று முன்பு கூறப்பட்ட நிலையில், சுழற்சி முறையில் இரவுப் பணியாற்றுபவர்களை நுரையீரல் புற்று நோய் மட்டுமே தாக்கியுள்ளதாக இந்த ஆய்வில் தெரிய வந்துள்ளது.
-
"அமெரிக்கன் ஜர்னல் ஆஃப் பிரிவென்டிவ் மெடிசின்' மருத்தவ ஆய்வு மாத இதழில் இந்தத் தகவல் வெளியாகியுள்ளது.
-
------------------------------------------
-தினமணி

by idigiti Wed Jan 07, 2015 5:53 am

நானும் இருபத்து ஐந்து ஆண்டுகள் சுழற்சி பணி புரிந்து விட்டேன். சுழற்சி பணி புரிபர்களுளுக்கு கூடுதல் மெடிக்கல் மற்றும் மெடிக்கல் செக்கிங் இன்றி அமையாதது