உடல் விற்பவள்...!! -Mano Red

by Mano Red Mon Jan 05, 2015 11:12 pm

அது விசித்திரமான
தொழில் தான்,
அவளும் ஒரு சித்திரம் தான்..!!
பழக்கப்பட்ட அவளும்
கண்ணீர் சிந்தியிருப்பாள்,
கசங்கிய ரூபாய்க்குள்
கதைகள் ஆயிரம் வைத்திருப்பாள்..!!

கேடு கெட்டவர்களின் முன்
கொஞ்சம் விசேஷமானவள் அவள்..!!
அவள் தெருக்களில் சுற்றியே
வாய்ப்பைக் கவர்கிறாள்,
அவள் எங்கோ இருந்துகொண்டே
தன்னைக் கூவி விற்கிறாள்,
இன்னும் அவள் வேறு எங்கெங்கோ
காத்துக் கிடக்கிறாள்...!!

அவளை வசைபாடும்
உங்களில் யார்தான்
யோக்கியம் இங்கே...??
உடலை விற்பதும்
ஒரு கலைதான் என்பதோடு
சிரமமானதும் கூட...
ஆச்சரியம் தருகிறது
அவள் எப்படி கவர்கிறாள்..!!

நன்றாக இருக்கிறது
நாசமாப்போன நீதி,நியாயங்கள்....
ஆணுக்கும் பெண்ணுக்கும்
கற்பு பொதுவென்று
கற்பித்தான் மீசைக்காரன்,
அது நியாயமெனில்
அவள் மட்டுமா முறை தவறியவள்..??

நல்லவனே நீ கொஞ்சம்
வாயை மூடு,
சத்தியம் செய்யலாம்
அவளாக வந்திருக்க மாட்டாள்..!!
யாரோ ஒருவன் அவளை
காதல் ஆசை அது இது என
மோசம் செய்திருப்பான்,
யாரோ ஒருவன் அவளை
கடத்திச் சென்று
ஏமாற்றி விற்று இருப்பான்..!!

ருத்திராட்ச பூனைகளுக்கு
எங்கே தெரியும்..?
அவள் இளமையானவளும் அல்ல,
வயதானவளும் அல்ல,
ஆனால் வெளிப்படையானவள்...
அவள் மரக்கிளையும் அல்ல,
மரத்தண்டும் அல்ல,
ஆனால் மரத்துப் போனவள்...

எப்படிச் சொல்லி முடிப்பது..?
தேம்பித் தேம்பி அழுது
சாயம் போன அவளின்
கண்ணீரின் நாட்களை
முற்றுப் புள்ளி வைக்கத் தெரியாமலே
முடிக்கப் போகிறேன்,
அவளாவது தொடர்கதையாகாமல்
விரைவில் முடியட்டும்,
அவளுக்கும்
மெல்லிய இதயம் இருக்குமே...!!

by **விமந்தனி** Tue Jan 06, 2015 12:05 am

அவளை வசைபாடும்
உங்களில் யார்தான்
யோக்கியம் இங்கே...??

நன்றாக இருக்கிறது
நாசமாப்போன நீதி,நியாயங்கள்....
ஆணுக்கும் பெண்ணுக்கும்
கற்பு பொதுவென்று
கற்பித்தான் மீசைக்காரன்,
அது நியாயமெனில்
அவள் மட்டுமா முறை தவறியவள்..??

by Mano Red Tue Jan 06, 2015 8:19 am

நடிக்கும் நல்லவர்களை விட அவள் நல்லவள் தான் ..நன்றி அக்கா

by **ayyasamy ram** Tue Jan 06, 2015 2:12 pm

by Mano Red Tue Jan 06, 2015 2:16 pm

நன்றி சார்.... உடல் விற்பவள்...!! -Mano Red 1571444738

by **முனைவர் ம.ரமேஷ்** Tue Jan 06, 2015 2:31 pm

நற் கருத்து... பாராட்டுகள்...

இதற்கு முரணாக நான் எழுதிய கவிதை ஒன்று

• விபச்சாரியின் வாக்குமூலம்...

இருபத்து மூன்றில்
ஒன்று...
இரண்டு...
மூன்றென...
ஒரு நாளைக்குத் தொடங்கியது
பணத்தாசையோடு
உடற்சுகமும் சேர
இருபத்தைந்தில்
நான்காகிப்போனது...
இப்படியே
வயதும் ஐம்பதாகிப்போனது!
இப்போழுதாவது
உண்மையை ஒப்புகொள்கிறேன்.
இல்லை என்றாள்
நான்
மனசாட்சியைக் கொன்றவளாகி விடுவேன்.
“உடலை மட்டுமே விற்கிறேன்
கற்பை அல்ல” என்றால்
அது பொய்.
எத்தனை ஆயிரம் பேரிடம்
உடற்சுகம் கண்டு
கற்பை இழந்திருக்கிறேன்!
“கணவனோடு இருக்கப் பட்டவளுக்கு
ஒரு கற்பு.
என்னைப் போன்றவளுக்கு
படுத்தெழும் போதெல்லாம்
புதிது புதிதாய் ஒரு கற்பு.”