பெண்கள் பாதுகாப்புக்கு கைப்பேசியில் நவீன வசதி

-

பெண்களின் பாதுகாப்பைக் கருத்தில் கொண்டு தில்லி
காவல் துறைக்காக பிரத்யேகமாக வடிவமைக்கப்பட்ட
"ஹிம்மத்' (துணிச்சல்) என்ற "ஆன்ட்ராயிட்' கைப்
பேசிகளுக்கான மென்பொருளை (அப்ளிகேஷன்) மத்திய
உள்துறை அமைச்சர் ராஜ்நாத் சிங் வியாழக்கிழமை
அறிமுகப்படுத்தினார்.

இதையொட்டி, தில்லி விஞ்ஞான் பவனில் நடைபெற்ற
நிகழ்ச்சியில் "ஹிம்மத்' சேவையை தொடங்கி வைத்து,
அதன் மூலம் புகார் பதிவு செய்த பெண்ணிடம் ராஜ்நாத் சிங்
பேசி குறைகளைக் கேட்டறிந்தார்.

இந்நிகழ்ச்சியில், தெருவோர வியாபாரிகள் புகார்
தெரிவிப்பதற்காக "1064' என்ற அவசர உதவி எண்
சேவையையும் அவர் தொடங்கி வைத்தார். இந்நிகழ்வில்
பங்கேற்ற சிறுமிகள், பெண்கள் ஆகியோருக்கு "மிளகு
ஸ்ப்ரே'வையும் அவர் வழங்கினார்.

பின்னர், நிகழ்ச்சியில் ராஜ்நாத் சிங் பேசியதாவது:
பெண்கள் பாதுகாப்பு விஷயத்தில் தில்லி காவல் துறை
மேற்கொள்ளும் நடவடிக்கைகள் பாராட்டுக்குரியவை.
தற்போது அறிமுகப்படுத்தப்பட்டுள்ள இந்த மொபைல்
அப்ளிகேஷன், ஆபத்துக் காலங்களின் போது காவல்
துறையை உடனடியாகத் தொடர்பு கொள்ள பெண்களுக்கு
உதவியாக இருக்கும்.
-
பெண்களுக்கு கூடுதல் இடஒதுக்கீடு:
பள்ளி, கல்லூரிகளில் படிக்கும் சிறுமிகள், இளம்பெண்கள்
என சுமார் பதினைந்தாயிரத்துக்கும் அதிகமானோருக்கு
தில்லி காவல் துறை சார்பில் தற்காப்புக் கலைப் பயிற்சி
அளிக்கப்படுகிறது.
-
இத்தகைய பயிற்சிகள் பெண்களிடையே தன்னம்பிக்கையை
அதிகரிக்க உதவும். மத்திய படைகளில் பெண்களுக்கு 1.5
சதவீதமாக உள்ள இட ஒதுக்கீட்டை 5 சதவீதமாக அதிகரிக்கத்
திட்டமிட்டுள்ளோம். மாநிலக் காவல் துறைகளில் பெண்களுக்கு
33 சதவீதம் இட ஒதுக்கீட்டை அமல்படுத்துவது குறித்து மத்திய
உள்துறை அமைச்சகம் அனைத்து மாநில அரசுகளிடமும்
கருத்துகளைக் கேட்டுள்ளது' என்றார் ராஜ்நாத் சிங்.
-
"ஹிம்மத்' பயன்படுத்தும் முறை: முன்னதாக நிகழ்ச்சியில்
தில்லி காவல் துறை ஆணையர் பி.எஸ்.பஸ்ஸி பேசியதாவது:
இந்தியாவிலேயே பெண்களின் பாதுகாப்புக்காக முதல் முறையாக
அமைக்கப்பட்டுள்ள ஒருங்கிணைந்த அப்ளிகேஷன் தொகுப்பாக
"ஹிம்மத்' திகழ்கிறது.

இந்த அப்ளிகேஷனை ஆன்ட்ராயிட் கைப்பேசியில் பதிவிறக்கம்
செய்து, தங்கள் தொலைபேசி எண், பெயர் ஆகியவற்றை
சம்பந்தப்பட்ட பெண் பதிவு செய்து கொள்ள வேண்டும். அதன்
பிறகு தில்லி காவல் துறையின் கட்டுப்பாட்டு அறையுடன்
எப்போது வேண்டுமானாலும் அந்த கைப்பேசி தொடர்பை
இணைக்க முடியும்.

அப்பெண்கள் செல்லுமிடங்களின் விவரமும் வரைபடமும்
10 விநாடிகளுக்கு ஒருமுறை காவல் கட்டுப்பாட்டு அறைக்கு
வரும்.

இதன்மூலம் ஆபத்துக் கால சூழ்நிலைகளைப் பெண்கள் சந்திக்க
நேரும் போது, உடனே கைப்பேசியில் உள்ள "பவர்' பட்டனை
இரண்டு முறை அழுத்தினாலோ, அசைத்தாலோ அவரது
கைப்பேசி விவரம் காவல் கட்டுப்பாட்டு அறையுடன்
இணைக்கப்படும். இதை வைத்து, அருகே உள்ள காவல் ரோந்து
வாகனங்களில் இருக்கும் போலீஸாருக்குத் தகவல் தெரிவிக்கப்பட்டு
அவர்கள் சம்பவ நடைபெற்ற பகுதிக்கு சென்று காப்பாற்ற முடியும்'
என்றார் பஸ்ஸி.

சிறுமிகளுக்கு திடீரென பிரதமர் வாழ்த்து

தில்லி காவல் துறையின் மொபைல் அப்ளிகேஷன் அறிமுக
நிகழ்வில் பங்கேற்க வந்த சிறுமிகளை பிரதமர் நரேந்திர மோடி
திடீரென நேரில் சந்தித்து புத்தாண்டு வாழ்த்து தெரிவித்தார்.

தில்லியில் வியாழக்கிழமை விஞ்ஞான் பவனில் நடைபெற்ற
நிகழ்வில் பங்கேற்ற பிறகு பள்ளிச் சிறுமிகள் வெளியே வந்து
கொண்டிருந்தனர். அப்போது குடியரசு துணைத் தலைவர்
ஹமீது அன்சாரியை சந்திக்க பலத்த பாதுகாப்புடன் காரில்
பிரதமர் நரேந்திர மோடி சென்றார்.

இந்நிலையில், நண்பகல் 12 மணியளவில் விஞ்ஞான் பவனுக்கு
வெளியே நின்றிருந்த சிறுமிகளைப் பார்த்த பிரதமர், தனது
காரை நிறுத்தச் செய்து கீழே இறங்கினார். பிரதமரைக் கண்டதும்
அங்கு குழுமியிருந்த சிறுமிகள் குதூகலம் அடைந்தனர்.
அப்போது, அனைவருக்கும் புத்தாண்டு வாழ்த்துத் தெரிவித்து
விட்டு அங்கிருந்து பிரதமர் புறப்பட்டுச் சென்றார்.
-
-------------------------------------------------
-தினமணி




"ஹிம்மத்' வசதிகள்