ஜாவா கடலில் விழுந்த ஏர் ஏசியா விமானத்தில் இருந்து 40 உடல்கள் மீட்பு: தேடும் பணி தீவிரம் :(

ஏர் ஏசியா விமானம் விழுந்து விபத்துக்குள்ளான ஜாவா கடலில் இருந்து 40க்கும் மேற்பட்ட உடல்கள் மீட்கப்பட்டுள்ளன.

இந்தோனேசியாவில் உள்ள சுரபயா நகரிலிருந்து 155 பணிகள் மற்றும் 7 விமான பணியாளர்களுடன் சிங்கப்பூருக்கு புறப்பட்ட ஏர் ஏசியா விமானம் (க்யூ.இசட்.8501) நேற்று முன்தினம் காணாமல் போனது. விமானத்தை தேடும் பணியில் ஈடுபட்ட ஆஸ்திரேலியாவின் ஓரியன் விமானம் நேற்று கடலில் மிதக்கும் சில பாகங்களை கண்டுபிடித்தது.

இந்தோனேசியாவின் மத்திய கலிமந்தன் மாகாணம், பங்காலன் பன்னிலிருந்து 160 கி.மீ தூரத்தில் உள்ள நங்கா தீவு அருகில் சந்தேகப்படும்படியான பாகங்கள் மிதப்பதை இந்த விமானம் கண்டுபிடித்து படம் பிடித்தது. எனினும் அது ஏர் ஏசியா விமானத்தின் பாகங்கள்தானா? என உறுதி செய்யப்படாமல் இருந்தது.

இன்று அந்த புகைப்படங்களை ஆய்வு செய்த இந்தோனேசிய அரசு, கடலில் மிதக்கும் பாகங்கள் காணாமல் போன ஏர் ஏசியா விமானத்தின் பாகங்கள்தான் என்று உறுதி செய்தது. இதையடுத்து சம்பவ இடத்திற்கு விரைந்த இந்தோனேசிய மீட்புக் குழுவினர், கடலில் மிதக்கும் உடல்களை மீட்டு வருகின்றனர்.

ஹெலிகாப்டரில் தாழ்வாகப் பறந்து சென்று, அங்கிருந்து கயிறு மூலம் மீட்புக்குழுவினர் உடல்களை மீட்டு கப்பலுக்கு கொண்டு வந்தனர். மாலை 4 மணி நிலவரப்படி 40-க்கும் மேற்பட்ட உடல்கள் மீட்கப்பட்டிருப்பதாக இந்தோனேசிய கடற்படை தெரிவித்துள்ளது.

விமானத்தில் பயணம் செய்த பயணிகள் உயிருடன் இருப்பார்கள் என்ற நம்பிக்கையில் காத்திருந்த அவரது உறவினர்கள், இன்று விமானத்தின் பாகங்கள் கிடைத்ததாக செய்தி வெளியானதும் கடும் அதிர்ச்சி அடைந்தனர். போர்னியோ கடற்பகுதியில் இருந்து உடல்களை மீட்கும் தகவல்கள் மற்றும் உடல்கள் கடலில் மிதக்கும் காட்சியை தொலைக்காட்சியில் நேரலையாகப் பார்த்த சிலர் மயங்கி விழுந்தனர். அவர்கள் உடனடியாக மருத்துவமனைக்கு கொண்டு செல்லப்பட்டனர்.

மாலைமலர்

என்னே சோகக்கதை.........கரணம் தப்பினால் மரணம் என்பது இதுதானோ...........