பள்ளிக்கட்டு சபரிமலை பாடலின் தந்தை வீரமணி சோமு !

கடந்த வாரம் சென்னை சைதாப்பேட்டை பெருமாள் கோவில் முன்பு ஐயப்பபூஜை பிரம்மாண்டமாக நடந்து கொண்டிருந்தது.
இந்த விழாவின் சிறப்பம்சமாக சாய் அமுருதவர்ஷினி குழுவினரின் ஐயப்ப பாடல் இசைக்கச்சேரி நடந்து கொண்டிருந்தது.

கச்சேரியில் மையமாக அமர்ந்து பாடிக்கொண்டிருந்தார் ஒரு பெரியவர்
பெயர் வீரமணி சோமு வயது 83

வீரமணி சோமு என்ற உடனேயே உங்களில் சிலர் எந்த சோமு என கேட்பீர்கள்.

கடந்த 50 ஆண்டுகளுக்கு மேலாக ஐயப்ப பக்தர்களின் விருப்ப பாடலாக இருக்கும் பள்ளிக்கட்டு சபரிமலைக்கு...,மலையாம் மலையாம் சபரிமலையாம்...இருமுடிதாங்கி...இருமுடிகட்டு...சரணம் விழித்தால்...சாமிமார்களே...உள்ளீட்ட இன்று கேட்கப்படும் நூற்றுக்கணக்கான ஐயப்ப பாடல்களை இயற்றி இசை அமைத்தவர் இவர் இவரே.

பேரன் தீபக்கிருஷ்ணா கீபோர்டு வாசிக்க மகள் உஷா பாலாஜி பிரதான கச்சேரி செய்ய இவர் அவர்களுக்கு துணையாக இருந்து சில பாடல்களை பாடினார். பாடி முடித்ததும் கையோடு அவரை பாரட்டிவிட்டு சிறிது நேரம் பேசிக்கொண்டிருந்த போது பல பழைய கதைகள் சொன்னார்.
எனது கொள்ளுத்தாத்தா கவிக்குஞ்சர பாரதி மற்றும் தாத்தா கோடீஸ்வரர் ஆகிய இசைமேதைகள் வாழ்ந்த குடும்பத்தில்தான் நானும் பிறந்தேன்.இதனால் சிறு வயது முதலே இசை என்னோடு ஓட்டிக்கொண்டது.

நினைத்த நேரத்தில் பாடல் இயற்றி இசை அமைத்துவிடுவேன் அப்படி இசை அமைத்த பாடல்களை எனது தம்பி காந்தர்வ ஜோதி என அனைவராலும் பாராட்டப்பெற்ற கே.வீரமணி அருமையாக பாடி விடுவார்.

அப்படிப்பாடப்பெற்றதுதான் பள்ளிக்கட்டு சபரிமலைக்கு உள்ளீட்ட பல பாடல்கள்.கடந்த 60 வருடமாக சபரிமலைக்கு மாலை போட்டு போய்வருகிறேன் அந்த அனுபவத்தாலும் ஐயப்பனின் அருளாலும் அந்த பாடல்கள் எல்லாம் மிகவும் பிரபலமாகிவிட்டது.

ஆனால் அந்த பாடல்களை பிரபலமாக்க நிறையவே உழைத்தோம்.

அந்த காலத்தில் ஐயப்பபாடல் கச்சேரிக்கு 130 ரூபாய் வாங்கியிருக்கிறோம் குழுவினருக்கு பிரித்தது கொடுத்தது போக கடைசியாக எனக்கு பத்து ரூபாய் கிடைக்கும் சில நேரம் அதுவும் கிடைக்காது ஆனால் பணத்தைப்பற்றி அப்போது பெரிதாக எண்ணியது இல்லை இப்போதும் பெரிதாக எண்ணுவது இல்லை.இருக்கும் வரை இறைவன் பெயரைப் பாடணும்.

ஐயப்ப பாடல்கள் போலவே ஜெய ஜெய தேவி,செல்லத்தா செல்ல மாரியத்தா உள்ளீட்ட பல அம்மன் பாடல்களும் உப்பிலியப்பன் கல்யாணம் அஷ்ட லட்சுமி பாடல்கள் என்று கணக்கிலடங்காத பாடல்களை இயற்றி இசை அமைத்துள்ளேன்.

எனது இசை அமைப்பில் எல்ஆர்ஈஸ்வரி எஸ்பிபாலசுப்பிரமணியம் உள்ளீட்ட பல பிரபலங்கள் பாடியுள்ளனர்.அந்த பாடல்கள் எல்லாம் டேப்பாகவும் சிடியாகவும் இப்போது வலம் வருகின்றன.

எனது தம்பி வீரமணி ராஜூ திடீர் மறைவுக்கு பிறகு ரொம்பவே சோர்ந்து போய்விட்டேன் அதன்பிறகு பாடல் இயற்றுவது இசை அமைப்பது என்பதில் பெரிய இடைவெளி ஏற்பட்டுவிட்டது.இப்போது வயது 83 ஆகிவிட்டது இந்த வயதில் ஆரோக்கியமாக சந்தோஷமாக இருப்பதே ஐயப்பன் அருள்.

எனது மகன் வீரமணி ராஜீ, மகள் உஷா பாலாஜி ஆகியோர் இப்போது பக்தி பாடல் இசைக்கச்சேரி செய்து வருகின்றனர்.நான் பாடலாசிரியனே தவிர பாடகன் அல்ல. தவிர வீரமணியின் கம்பீர கானத்தை யாராலும் தரமுடியாது நான் எனது மகளுக்கு துணையாக கச்சேரிகளுக்கு சென்று வருகிறேன்,போகும் இடத்தில் நானும் சில பாடல்களை பாடுகிறேன். நீங்கள் மேடையில் இருந்தாலே எங்களுக்கு பெருமை என்று சொல்வதால் நான் மேடையில் இருந்து அவர்களுக்கு துணையாக குரல் கொடுப்பேன் இசைக்கருவிகளை இசைப்பேன் சில பாடல்கள் மட்டும் பாடுவேன் ஐயப்பன் இஷ்டப்படும் வரை இப்படி பாடிக்கொண்டே இருப்பேன் என்று சொல்லி முடித்தார்.

எல்.முருகராஜ்