ஸ்ரீரங்கம் வைகுந்த ஏகாதசி விழா: ஜனவரி 1-இல் பரமபத வாசல் திறப்பு

-

ஸ்ரீரங்கம் அரங்கநாதர் கோயிலில் வைகுந்த ஏகாதசி விழா திருநெடுந்தாண்டகத்துடன் ஞாயிற்றுக்கிழமை (டிச.21) தொடங்குகிறது. முக்கிய நிகழ்ச்சியான பரமபத வாசல் ஜனவரி 1-ஆம் தேதி திறக்கப்படுகிறது.

வைணவத் திருத்தலங்களில் மிகவும் சிறப்பாக நடைபெறும் திருவிழா வைகுந்த ஏகாதசி விழா. இந்த விழா பகல் பத்து, இராப்பத்து என 21 நாள்கள் நடைபெறும். ஒவ்வோர் ஆண்டும் மார்கழி மாதத்தில் இந்த விழா தொடங்கும்.

இந்த விழா ஸ்ரீரங்கம் கோயிலில் ஞாயிற்றுக்கிழமை இரவு 7 மணிக்கு திருநெடுந்தாண்டகத்துடன் தொடங்குகிறது. இதற்காக நம்பெருமாள் மூலஸ்தானத்திலிருந்து புறப்பட்டு சந்தனு மண்டபத்தில் இரவு 7.45 மணி முதல் 9 மணி வரை திருநெடுந்தாண்டகம், அபிநயம், வியாக்யானம் கண்டருளுகிறார்.

9.30 மணிக்கு திருப்பணியாரம் அமுது செய்தல் நிகழ்ச்சியும், 10 மணிக்கு கோஷ்டியும், 10.30 மணிக்கு திருவாராதனமும், 11 மணிக்கு திருக்கொட்டாரத்தில் இருந்து சிறப்பு அலங்காரத்துடன் 11.30 மணிக்கு தீர்த்த கோஷ்டி கண்டருளுகிறார்.

வருகிற 22-ஆம் தேதி முதல் 31-ஆம் தேதி வரை பகல்பத்து விழா நடைபெறுகிறது. நம்பெருமாள் ஒவ்வொரு நாளும் பல்வேறு அலங்காரங்களுடன் பகல்பத்து மண்டபமான அர்ஜுன மண்டபத்தில் எழுந்தருளி பக்தர்களுக்கு சேவை சாதிப்பார்.

நாள்தோறும் அரையர்களால் பெரியாழ்வாரின் திருமொழி பாசுரங்கள் அபிநயத்துடன் வியாக்யானம் செய்யப்படும். பகல்பத்து விழாவின் கடைசி நாளான 31-ஆம் தேதி நம்பெருமாள் மோகினி அலங்காரத்தில் எழுந்தருளுகிறார்.

வைகுந்த ஏகாதசியின் முக்கிய நிகழ்ச்சியான பரமபத வாசல் (சொர்க்க வாசல்) திறப்பு ஜனவரி 1-ஆம் தேதி அதிகாலை 5 மணிக்கு நடைபெறுகிறது. இதில், பங்கேற்க பல்வேறு இடங்களிலிருந்து லட்சக்கணக்கான பக்தர்கள் வருகை தருவர். இதையொட்டி, கோயிலில் பக்தர்களுக்காக பல்வேறு சிறப்பு ஏற்பாடுகள் செய்யப்பட்டு வருகின்றன. பகல்பத்து தொடக்கத்திலிருந்து இராப்பத்து விழாவின் ஒன்பதாம் திருநாளான ஜனவரி 9-ஆம் தேதி வரை மூலவர் முத்தங்கி சேவையில் காட்சிதருகிறார்.

-

–தினமணி

ஏற்கனவே ஜனுவரி ,முதல் தேதி , ஆங்கில புத்தாண்டு ,
வைகுண்ட ஏகாதசி ,சேர்ந்தது . கூட்டம் எக்கச்சக்கம் ஆக இருக்கப்போகிறது .
தகுந்த பாதுகாப்பு ஏற்பாடுகள் செய்யப்படவேண்டும் .

ரமணியன்