சூடு பிடிக்கிறது 'பழைய கார்கள்' வியாபாரம் :)

புதுடெல்லி: சொந்த வீடு, கார் ஆகிய இரண்டும் நடுத்தர மக்களின் கனவாக இருக்கிறது. பொதுபோக்குவரத்து வசதி குறைவு, சவுகரியமான பயணம் ஆகியவற்றை கருத்தில் கொண்டு டூவீலரில் இருந்த நடுத்தர குடும்பங்களின் கவனம் கார்களின் பக்கம் திரும்பியுள்ளது. அடிக்கடி ஆட்டோ, டாக்சிக்கு அதிகம் செலவு செய்பவர்கள் சொந்த கார் வாங்கி விட்டால் பிரச்னை இல்லை என்று நினைக்கின்றனர். இவர்களை குறிவைத்துதான் சிறிய ரக கார்கள் களம் இறக்கப்படுகின்றன. இருப்பினும் ஏர்பேக், ஏபிஎஸ் ஆகிய பாதுகாப்பு அம்சங்களை கட்டாயம் கடைப்பிடிக்க வேண்டும் என்று கார் நிறுவனங்களுக்கு விதிக்கப்பட்ட நிபந்தனைகள், சிறிய ரக கார்களின் விலையை ரூ.40 ஆயிரம் வரை அதிகரிக்க செய்யும் என்று கார் நிறுவனங்கள் தெரிவிக்கின்றன. இந்நிலையில், புதிய டூ வீலர் வாங்குவதை விட சற்று அதிக விலையில் பழைய கார்களை வாங்குவதற்கான வாய்ப்பு ஏராளம் உள்ளது. எனவேதான், புதிய கார்களுக்கு இஎம்ஐ, ஆண்டுதோறும் இன்சூரன்ஸ் போன்றவற்றை கருத்தில் கொள்ளும் நடுத்தர வருவாய் பிரிவினர் பழைய கார்கள் வாங்குவதே சிறந்தது என்ற முடிவுக்கு வந்து விடுகின்றனர்.

அதிலும், பழைய கார்களுக்கு சில வங்கிகளும், வங்கி சாரா நிதி நிறுவனங்களும் கடன் வழங்க முன்வருவதால் நடுத்தர மக்களின் கார் கனவு எளிதாக நிறைவேறி விடுகிறது. இதன் காரணமாக, புதிய கார் விற்பனைக்கு நிகராக பழைய கார் விற்பனை இருக்கிறது என இத்துறையில் உள்ளவர்கள் தெரிவிக்கின்றனர். அதுமட்டுமின்றி, எக்ஸ் சேஞ்ச் முறையில் புதியகார்கள் வாங்கும் போக்கும் அதிகரித்துள்ளது. கார் லோன் வழங்கும் நிறுவன அதிகாரி ஒருவர் கூறுகையில் ‘‘நடப்பு ஆண்டில் புதிய கார்களுக்கு லோன் கேட்டு வந்த விண்ணப்பங்கள் 20 சதவீதமாக உள்ள நிலையில், பழைய கார்களுக்கு லோன் கேட்டு 40 சதவீத விண்ணப்பங்கள் வந்துள்ளன என்றார். பழைய கார்களுக்கு இருக்கும் வரவேற்பு காரணமாக மாருதி சுசூகி, மகிந்திரா ஆகிய கார் தயாரிப்பு நிறுவனங்களே பழைய கார் ஷோரூம்களை நடத்தி வருகின்றன. டாடா சபாசி, மகிந்திரா ஸ்கார்பியோ, போர்டு எண்டேவர், ஹோண்டா சிஆர்வி, ஆல்டோ, ஐ10, டாடா மன்ஜா, டொயோட்டா கரோலா ஆகியவை வாகன தயாரிப்பு வருடம், வாகனத்தின் தற்போதைய நிலை போன்றவற்றை பொருத்து ரூ.50,000 முதல் ரூ.15 லட்சம் வரை விற்கப்படுகின்றன.

சில பைனான்ஸ் நிறுவனங்கள் புதிய கார்களுக்கு 11 முதல் 12% வட்டியில் கடன் வழங்கும்போது, பழைய கார்களுக்கு 16% வரையிலான வட்டியில் கடன்கள் அளிக்கின்றன. இதனால் இஎம்ஐ தொகை அதிகரித்தாலும், குறைந்த விலைக்கு கார் கிடைக்கிறது என்பதற்காக நடுத்தர மக்கள் பலர் வட்டி உயர்வை பொருட்படுத்துவதில்லை. ஆனால் இந்த லோன் வசதி தனி நபரிடம் வாங்கும்போது கிடைப்பதில்லை. பழைய கார் விற்பதற்கென்றே முறைப்படுத்தப்பட்டு இயங்கும் நிறுவனங்களில் கார் வாங்கும்போது லோன் வழங்க பெரும்பாலான வங்கிகளும், பைனான்ஸ் நிறுவனங்களும் முன்வருகின்றன. பழைய கார்களுக்கு உள்ள வரவேற்பும், புதிய கார் உற்பத்தி குறைவும் இதற்கு காரணமாக இருப்பதாக கருதப்படுகிறது.

மாருதி நிறுவனம் மாருதி ட்ரூ வேல்யூ என்ற பெயரில் நாடு முழுவதும் 550 நகரங்களில் 750 பழைய கார் ஷோரூம்களை வைத்துள்ளது. இதுபோல் மகிந்திரா நிறுவனம் மகிந்திரா பர்ஸ்ட் சாய்ஸ் என்ற பெயரில் 220 நகரங்களில் 400 ஷோரூம்களை திறந்துள்ளது. இதுபோல் போர்டு நிறுவனம் போர்டு அஷ்யூர்டு என்ற பெயரில் பழைய கார்களை விற்கிறது. இதற்கென 30 நகரங்களில் 51 டீலர்களை கொண்டுள்ளது.

தினகரன்

கார் பார்க்கிங்க் உடன் வீடு வைத்திருப்பவர்களுக்கு
பயன்படும் தகவல்...
-