வரலட்சுமி என் பொக்கிஷம்!” செம்ம ஃபீல் விஷால் .....

விஷால், பேக் டு ஃபார்ம்; 'ஆம்பள’, 'சண்டக்கோழி-2’ எனத் திமிறுகிறார். சரத்தோடு நடிகர் சங்க சண்டை, வரலட்சுமியோடு காதல்(!) என விஷாலைச் சுற்றி எத்தனை சர்ச்சைகள். அவரிடமே கேட்டுவிடலாமே...

'' 'பாண்டிய நாடு’, 'நான் சிகப்பு மனிதன்’னு கான்செப்ட் சினிமா பண்ணீங்க. இப்போ திரும்ப ஃபார்முலா கமர்ஷியலுக்கே வந்துட்டீங்களா?''

''ரெண்டுக்கும் கதாபாத்திரம்தான் வித்தியாசம். 'பாண்டிய நாடு’ நான் பண்ணாத கேரக்டர்; 'நான் சிகப்பு மனிதன்’ யாருமே பண்ணாத கேரக்டர்; 'பூஜை’யில் பக்கத்து வீட்டுப் பையன் கேரக்டர்... அவ்வளவுதான் வித்தியாசம். மத்தபடி எல்லா படங்களும் எனக்கு கமர்ஷியல்தான்.''

''நடிகர் சங்கக் கட்டடத்துக்காக உங்க ஃப்ரெண்ட்ஸ் நாலு பேரோடு சேர்ந்து நடிக்கிறேன்னு சொல்லியிருந்தீங்களே... என்னாச்சு?''

''நாங்க இப்பவும் ரெடி. நாங்க சேர்ந்து நடிச்சா படம் நல்லா வரும்; நல்ல வசூல் கிடைக்கும். அதான் அப்படி ஒரு ஐடியா கொடுத்தோம். ஆனா, நடிகர் சங்கத் தலைவர்தான் இறுதி முடிவு எடுக்கணும்.''

''நடிகர் சங்கத் தலைவர் தேர்தலில் நிற்கத் தயங்குறீங்களோ?''

''தயக்கம் இல்லை. அதுக்கு அனுபவம், நேரம் எல்லாம் கூடி வரணும்ல. என்னைவிடவும் நாசர் சார், பொன்வண்ணன் சார், ராஜேஷ் சார்னு எத்தனையோ சீனியர் நடிகர்கள் இருக்காங்க. அவங்களோட ஒப்பிடும்போது, நான் ஒண்ணுமே பண்ணலை. தலைவராகப் போட்டியிட அவங்களுக்குத்தான் உண்மையான தகுதி இருக்கு. ஆனா, நடிகர் சங்கத் தேர்தலில் ஏதாவது ஒரு பதவிக்குக் கண்டிப்பா நிப்பேன்.''

''நடிகர் சங்க விவகாரத்தில் நாசரை முன்னிலைப்படுத்தி ஒரு அணியா செயல்படுறீங்கனு சொல்றாங்களே... உண்மையா?''

''நாங்க அணியா எப்பவுமே செயல்படலை. 'விஷால் அணி, சரத்குமார் அணியைக் கேள்வி கேக்கிறாங்க’னு எல்லாரும் தப்பா நினைக்கிறாங்க. ஆனா, நாங்க எப்பவும் ஒரே குடும்பம்தான். குடும்பத்துக்குள் சர்ச்சை, சண்டை வந்தா... அதில் கேள்விகேட்கலாம்தானே! அப்படித்தான் நாங்க கேள்வி கேக்கிறோம். இது இயல்பான விஷயம். ஆனா, கேள்விகேக்கிறதே தப்புனு சொன்னா... அது வேற சூழ்நிலை. சரத்குமார் சார் 'விஷால் மறுபடியும் நடிகர் சங்கத்தைப் பத்தி தப்பாகப் பேசுனா, சங்கத்துல இருந்து நீக்கிடுவேன்’னு சொல்லியிருக்கார். நான் மறுபடியும் இல்லை. முதல் தடவை எப்போ தப்பா பேசினேன்னே புரியலை. அப்படிப் பேசினதா ஏதாவது ஆதாரம் காட்டினா, நானே சங்கத்துல இருந்து விலகிடுறேன். எல்லார் மேலயும் எனக்கு மரியாதை உண்டு. ஆனா, அதுக்காக நடிகர் சங்கத்துக்கு பில்டிங் கட்டாம வேடிக்கை காட்டிக்கிட்டே இருந்தா, பார்த்துட்டு சும்மா இருக்க முடியுமா?''

''உங்களுக்கும் சரத்துக்கும் சண்டை வர அவர் பொண்ணு வரலட்சுமியும் ஒரு காரணம்னு சொல்றாங்களே?''

''அப்படி எல்லாம் யார் சொல்றாங்கனு தெரியலை. அப்படிச் சொன்னா, அது முட்டாள்தனம். நான் அவ்வளவு கீழ்த்தரமானவன் இல்லை.''



''காரைக்குடியில் ஒரே ஒரு கடையில் ரெய்டு அடிச்சா, திருட்டு டி.வி.டி-யை ஒழிச்சுட முடியுமா, நிரந்தரத் தீர்வு யோசிக்க மாட்டீங்களா?''

''திருட்டு டி.வி.டி-யைப் பொறுத்தவரைக்கும் எங்கே இருந்து காப்பி பண்றாங்கன்னு சோர்ஸ் கண்டுபிடிச்சிட்டோம். திருட்டு டி.வி.டி-க்கு எதிரா எல்லா அமைப்புகளும் சேர்ந்து ஒரு முடிவெடுத்திருக்கோம். ஆறு மாசத்துக்குள்ள அது நடைமுறைக்கு வந்திரும். எந்தத் தியேட்டர்லயாவது திருட்டு டி.வி.டி தயாரிக்க உதவுறாங்கன்னு தெரிஞ்சா, அந்தத் தியேட்டரை நிரந்தரமா தடை செய்யப்போறோம். வெளிநாட்டுக்கான எஃப்.எம்.எஸ் ப்ரின்ட்ல இருந்து திருட்டு டி.வி.டி வருதுனு சொன்னாங்க. ஆனா, அது உண்மை இல்லை. இப்போ தமிழ்த் தயாரிப்பாளர்களைவிட திருட்டு டி.வி.டி தயாரிக்கிறவங்கதான் அதிகம் சம்பாதிக்கிறாங்க. தமிழ் சினிமாவுக்கு 500 கோடி வருமானம் கிடைக்குதுன்னா, திருட்டு டி.வி.டி மூலமா 1,500 கோடி வருமானம் கிடைக்குது. திருட்டு டி.வி.டி-யை இனிமேலும் விட்டுவைக்கிறது ரொம்பத் தப்பு.''

''ஜாலி விஷால் திடீர்னு இமயமலை போய் அமைதியாகிடுறாரே... ஏன்?''

''நான் ஸ்பிளிட் பெர்சனாலிட்டினுகூடச் சொல்லலாம். திடீர்னு போன் பேசப் பிடிக்காமப் போயிரும். அப்போ தனி அறையில் மணிக்கணக்காக உட்கார்ந்து யோசிக்க ஆரம்பிச்சிருவேன். வீட்ல உள்ளவங்களுக்கு என்னைப் பத்தி தெரியும். அதனால கண்டுக்க மாட்டாங்க. நண்பர்கள்தான் நாலைஞ்சு நாளா பேசலைனா, திமிர் பிடிச்சவன்னு திட்டுவாங்க. இதுதான் நிஜம். இதை உங்ககிட்ட சொல்லலாமானுகூடத் தெரியலை.''

''உண்மையைச் சொல்லுங்க. வரலட்சுமியைத்தான் கல்யாணம் பண்ணிக்கப்போறீங்களா?''



''வரலட்சுமி என் நெருங்கிய தோழி. சின்ன வயசுல இருந்து எங்களுக்குள் நல்ல நட்பு இருக்கு. எனக்கு ரொம்பப் பிடிச்ச பொண்ணு. என் நல்லது, கெட்டதுகளில் கூடவே இருந்த பொண்ணு. சுருக்கமா சொல்லணும்னா, அவ எனக்கு பொக்கிஷம். ஆனா, கல்யாணம் பத்தி இப்போ எதுவும் சொல்ல முடியாது.''

''இவ்வளவு ஓப்பனா பேசுறீங்க... ஏன் கல்யாணம்னா மட்டும் தயங்குறீங்க?''

''தயக்கம்னு இல்லை. சில விஷயங்கள் நடக்க, கொஞ்சம் பொறுமை அவசியம். ஒரு படம் ஆரம்பிச்சா இந்தத் தேதியில் ஆரம்பிக்கிறோம்னு உறுதியா சொல்லலாம். ஆனா, எல்லா விஷயமும் அப்படி இல்லையே. எனக்கு இப்போ 37 வயசு. கல்யாணம்கிறது வாழ்க்கையில் ரொம்ப முக்கியமான ஒரு முடிவு. பெர்சனலா, அது பெரிய முடிவு. அதை நான் சரியா எடுக்கணும். இப்போ நான் ஒண்ணு சொல்லி, அப்புறம் அப்படி இல்லைனு மழுப்பினா அது தப்பு... அப்படி நடக்கக் கூடாது. அதான் சொல்றேன். அந்த நேரம் வரும்போது நானே சொல்றேன்!''

நன்றி:ஆனந்தவிகடன்

-

லக்ஷ்மி என்றாலே பொக்கிஷம் தான்
வர லக்ஷ்மி என்றால் வரமாக கிடைத்த பொக்கிஷம் .

ரமணியன்