சிறைக் கூடத்தை கலைக் கூடமாக்கிய கைதி

-
தான் வரைந்த ஓவியத்துடன் குரு.கலைக்கண்ணன்.
==============
கடலூர் மத்திய சிறையில் ஒரு கைதி உருவாக்கியுள்ள சிற்பங்கள், ஓவியங்களால் சிறை வளாகமே கலைக் கூடமாக மிளிர்கிறது.

கடலூர் மத்திய சிறை கடந்த 1865-ஆம் ஆண்டு ஆங்கிலேயரால் கேப்பர்மலையில் உருவாக்கப்பட்டது. இது 178 ஏக்கர் பரப்பில் பரந்து விரிந்துள்ளது. இங்கு தண்டனைக் கைதிகள், விசாரணைக் கைதிகள் என 707 பேர் அடைக்கப்பட்டுள்ளனர்.

சுதந்திரப் போராட்ட காலத்தில் இந்த சிறையில்தான் மகாகவி பாரதியார் அடைக்கப்பட்டிருந்தார். அதன் நினைவாக சிறையின் முகப்பில் பாரதியாருக்கு சிலை வைக்கப்பட்டுள்ளது.

இப்பெருமையுடன் தற்போது மேலும் ஒரு பெருமையையும் கடலூர் மத்திய சிறை பெற்றுள்ளது. அது சிறை வளாகத்தில் அமைக்கப்பட்டுள்ள திருவள்ளுவர், மகாத்மா காந்தியின் சிலைகள். குற்ற வழக்கில் சிறை தண்டனை விதிக்கப்பட்ட ஒரு கைதியின் கைவண்ணத்தில் அச்சிலைகள் உருவாகி இருப்பது மேலும் அவற்றுக்கு சிறப்புச் சேர்க்கிறது.

கடலூர் மாவட்டம், திட்டக்குடியைச் சேர்ந்தவர் குரு.கலைக்கண்ணன் (31). மனைவியைக் கொன்ற வழக்கில் ஆயுள் தண்டனை பெற்று சிறையில் அடைக்கப்பட்டுள்ளார். இவரது குடும்பத்தினர் கோயில் கோபுரங்களில் சுதை சிற்பம் செய்பவர்கள்.

அந்த வழியில் வந்த கலைக்கண்ணனது திறமையைப் புரிந்து கொண்ட சிறைக் கண்காணிப்பாளர் ஆ.முருகேசன், அத்திறமையை வெளிக்கொணர முடிவு செய்தார்.

முதல்கட்டமாக சிறையில் உள்ள அரங்கத்தை ஓவியங்களால் அலங்கரிக்க கலைக்கண்ணனைக் கேட்டுக்கொண்டார். அதை திறம்பட செய்து முடித்ததும், அதில் திருப்தி அடைந்த சிறைக் கண்காணிப்பாளர், தமிழுக்கு உரமேற்றிய திருவள்ளுவரின் சிலையை வடிக்கக் கேட்டுக் கொண்டார்.

இதையடுத்து, கலைக்கண்ணன், திருவள்ளுவர் சிலையை வடிக்கும் பணியில் ஈடுபட்டார். சுமார் 3 மாத உழைப்புக்குப் பின்னர் கடலூர் மத்திய சிறை வளாகத்தில் திருவள்ளுவர் உருப்பெற்றார். 9 அடி பீடத்துடன், மூன்றரை அடியில் உள்ள இந்த சிலைகள் சிறை அதிகாரிகளையும், கைதிகளையும் வியக்க வைத்தது.

அடுத்த கட்டமாக மகாத்மா காந்திக்கு சிலை வடிக்கும் பொறுப்பும் கலைக்கண்ணனிடம் ஒப்படைக்கப்பட்டது. 11 அடியில் கோபுரக் கலசங்களுடன் 2 அடி உயர காந்தியின் மார்பளவு சிலை அங்கே உருப்பெற்றது. சுதந்திர தினம், குடியரசு தினம், காந்தி ஜயந்தி, காந்தி நினைவு தினம் ஆகிய நாள்களில் இந்த சிலைதான் கெüரவிக்கப்படுகிறது.

இதுகுறித்து குரு.கலைக்கண்ணன் கூறியபோது, ஆயுள் தண்டனைக் கைதியாக 7 ஆண்டுகளைக் கழித்து விட்டேன். எனது கலைத்திறனை மேம்படுத்த உதவியது சிறைக் கண்காணிப்பாளர்தான். அவர் தொடர்ந்து உற்சாகம் கொடுத்ததால்தான் எனது திறமை எனக்கே தெரிய வந்தது. சிறையில் இதுபோன்ற பணிகளை செய்யும் பொழுது மனது மிகவும் லேசாகிறது. பழைய நினைவுகளை மறக்க முடிகிறது என்றார்.

8-ஆம் வகுப்பு வரை மட்டுமே படித்துள்ள கலைக்கண்ணன் தற்போது டிப்ளமோ இன் ஹவுசிங் எலக்ட்ரீஷியன், ஐடிஐ சான்றிதழ் படிப்பு முடித்துள்ளார்.

சிறைக் கண்காணிப்பாளர் ஆ.முருகேசன் கூறுகையில், ஒவ்வொரு சிறைவாசியிடமும் ஒரு திறமை உள்ளது. அதனைக் கண்டுபிடித்து அவர்களை நல்வழிப்படுத்தும் ஒரு முயற்சிதான் இது. இதற்காக அவர்களை நல்ல புத்தகங்கள், கவிதை, கதைகளை படிக்க வைத்தல், பாரதியார் கவின் கலை மூலமாக ஓவியம் உள்ளிட்ட பயிற்சிகள் அளித்தல், சிவா ரிதம்ஸ் மூலமாக இசைப்பயிற்சி அளித்தல், தமிழ்நாடு திறந்த நிலை பல்கலைக்கழகம் மூலமாக பட்டப்படிப்பு படிக்க வைத்தல் போன்ற ஏற்பாடுகளை செய்துள்ளோம் என்றார்.
=========
--தினமணி