இந்தியாவுக்கான அமெரிக்க தூதராக அமெரிக்க இந்தியர் நியமனம்

-
வாஷிங்டன் : இந்தியாவிற்கான அமெரிக்க தூதராக இந்திய வம்சாவளியைச் சேர்ந்த ரிச்சர்ட் ராகுல் வர்மாவை நியமிக்க அமெரிக்க செனட் சபை ஒப்புதல் தெரிவித்துள்ளது. இந்தியாவுக்கான அமெரிக்க தூதராக நியமிக்கப்படும் முதல் அமெரிக்க இந்தியர் இவர் என்பது குறிப்பிடத்தக்கது.

அமெரிக்கா வாழ் இந்தியரான 46 வயதாகும் ரிச்சர்ட் ராகுல் வர்மா, இந்தியவுக்கான தூதராக நியமிக்கப்படுவதற்கு அமெரிக்க செனட் சபை, குரல் வாக்கெடுப்பின் மூலம் ஒப்புதல் தெரிவித்துள்ளது. விரைவில் இவர் தூதராக பதவியேற்றுக் கொள்வார் என எதிர்பார்க்கப்படுகிறது. மேலும் 2015ம் ஆண்டு இந்திய குடியரசு தினத்தில் சிறப்பு விருந்தினராக கலந்து கொள்ள உள்ள அமெரிக்க அதிபர் ஒபாமாவுடன் ரிச்சர்ட் ராகுல் வர்மாவும் இந்தியா வர உள்ளார்.

இந்தியாவிற்கான அமெரிக்க தூதராக நியமிக்கப்பட 50 பேருக்கும் மேலானவர்களின் பெயர்கள் அமெரிக்க செனட் சபையில் பரிந்துரைக்கப்பட்டுள்ளது. இது தொடர்பாக நடத்தப்பட்ட குரல் வாக்கெடுப்பில், இந்திய-அமெரிக்க உறவிற்கு ஆதரவு தெரிவித்து வகையில் பெரும்பாலான உறுப்பினர்கள் ரிச்சர்ட் ராகுலுக்கு ஆதரவாக குரல் கொடுத்தனர்.

ரிச்சர்ட் ராகுல் வர்மா, 2009ம் ஆண்டு முதல் 2011ம் ஆண்டு வரை அமெரிக்க நிர்வாகத்தின் மாகாண சட்டமன்ற விவகாரத்துறை துணைச் செயலாளராக பணியாற்றி வந்துள்ளார். தற்போது, சட்டத்துறை ஆலோசகர் குழு உறுப்பினராக இருந்து வருகிறார்.

இந்தியாவுக்கான அமெரிக்க தூதராக இருந்த நான்சி போவெல், மார்ச் மாதம் தனது பதவியை ராஜினாமா செய்தார். இந்திய தூதரக அதிகாரியாக இருந்த தேவயானி கோப்ரகடே விவகாரத்தில் நான்சியின் தலையீடு அதிகமாக இருந்ததாக எழுந்த சர்ச்சையை தொடர்ந்து அவர் தனது பதவியை ராஜினாமா செய்தார். இதனையடுத்து புதிய தூதரை தேர்வு செய்யும் பணியில் அமெரிக்க செனட் சபை இறங்கியது.
===
--தினமலர்