“ஸ்ரீராமானுஜரின் வாழ்வில் 100 அற்புத நிகழ்ச்சிகள்’

**ayyasamy ram** · **ayyasamy ram** Mon Dec 15, 2014 9:31 am

-
ஸ்ரீபாஷ்யம் எழுத ஸ்ரீராமானுஜர் கூரத்தாழ்வாரைக் கூப்பிட்டு,
“நான் கூறுவதை நீ எழுத்தில் வடிப்பாயாக. உனக்கு
எவ்விடத்திலாவது சந்தேகம் தோன்றினாலோ அல்லது
தவறு என்று எண்ணினாலோ அப்போது எழுதுவதை
நிறுத்திக் கொள். அதைப் பார்த்துக் குறிப்பு அறிந்து மாற்றிக்
கொள்வேன்” என்றார்.

அதன்படியே ஸ்ரீராமானுஜர் சொல்லச் சொல்ல கூரத்தாழ்வார்
எழுதி வர ஸ்ரீபாஷ்யம் வளர்ந்து கொண்டிருந்தது.

ஒருநாள் ஸ்ரீராமானுஜர் கூறியதை எழுதாமல் அப்படியே
அமர்ந்திருந்தார் கூரத்தாழ்வார்.

ஜீவனின் நிஜ சொரூபம் பற்றிக் கூறும்போது, ஜீவன் பகவானுக்கு
அடிமையாகாது என்கிறார் ஸ்ரீராமானுஜர். இதைக் கேட்டதும்
கூரத்தாழ்வார் அதை எழுதவில்லை!

ஸ்ரீராமானுஜர், “என்ன கூரேசா, என்ன செய்து கொண்டிருக்கிறாய்?
நான் கூறுவதை எழுத மாட்டாயா?” என்றார் சற்றே சினத்துடன்.
அப்போதும் கூரத்தாழ்வார் அசையாமல் இருப்பதைக் கண்ட
ராமானுஜர், “”உம்முடைய கருத்து வேறாக இருந்தால் இனி
நீயே தொடர்ந்து பாஷ்யம் எழுதி விடு!” என்றார்.

ஸ்ரீராமானுஜரின் சினத்தைக் கண்டு கூரத்தாழ்வார் சிறிதும்
அசைந்து கொடுக்கவில்லை! உடனிருந்த சீடர்கள், “”பாஷ்யம்
எழுதத் துவங்கும் முன் ஆசார்யர் தான் கூறிய நிபந்தனையை
மறந்து விட்டாரோ?” என்று பேசிக் கொண்டார்கள். அப்போது
ராமானுஜருக்குத் “தான் கூறுவது தவறு என்று எண்ணினால்
எழுதுவதை நிறுத்திக் கொள்’ என்று சொன்னது நினைவுக்கு
வந்தது! உடனே “ஜீவனின் நிஜ சொரூபம்’ பற்றிக் கூறிய தம்
கருத்தை மாற்றிக் கொண்டு பின்வருமாறு பகர்ந்தார்:

“”ஜீவன் ஒருபோதும் சுதந்திரமானவன் அல்லன். அவன் எப்போதும்
பகவானுக்கு அடிமைப்பட்டவனே. பகவானுடைய இச்சை எதுவோ
அதன் வழி நடப்பவனே. எப்போதும் அவன் பகவானின் அடிமையே.
ஈஸ்வரனின் சிறு அம்சமே. ஆகையால் அவனுக்கு ஒருபோதும்
தன்னிச்சையாக நடக்கும் சுதந்திரம் கிடைக்காது. பகவான்
ஜீவனிடத்திலே திகழ்ந்து அவனை ஆதிக்கம் செலுத்தி நடத்துகிறார்.
பகவானைச் சார்ந்து நின்று பணிபுரிபவனே ஜீவன். அதனால் அவன்
ஞானமுடையவனும் ஆகிறான்” என்று ராமானுஜர் கூறியதை
கூரத்தாழ்வார் தடங்கல் இல்லாமல் எழுதினார்!

(இந்த ஒரே ஒரு கருத்தில்தான் கூரத்தாழ்வார் முரண்பட்டார்)
பின்பு ஸ்ரீராமானுஜரின் விசிஷ்டாத்வைத சித்தாந்தம் தழுவிய
ஸ்ரீபாஷ்யம் தொடர்ந்து எழுதப்பட்டு நிறைவடைந்தது.
-
————————————————–
“ஸ்ரீராமானுஜரின் வாழ்வில் 100 அற்புத நிகழ்ச்சிகள்’ என்ற நூலில்
கங்கா ராமமூர்த்தி.
--தினமணி கதிர்