பசுமைச் சூழல் நிதியை விரைந்து வழங்க இந்தியா வலியுறுத்தல்

by **ayyasamy ram** Tue Dec 09, 2014 8:20 am

வளரும் நாடுகளின் சுற்றுச்சூழல் திட்டங்களுக்காக உருவாக்கப்பட்டுள்ள 10,000 கோடி டாலர் (சுமார் ரூ.6.2 லட்சம் கோடி) பசுமைச் சூழல் நிதியை விரைந்து வழங்குமாறு வளர்ச்சியடைந்த நாடுகளை இந்தியா வலியுறுத்தியுள்ளது.

பருவ நிலை மாற்றத்தைக் கட்டுப்படுத்துவதற்கான ஒப்பந்தத்தை உருவாக்குவதற்காக, 190 ஐ.நா. உறுப்பு நாடுகள் பங்கேற்கும் மாநாடு பெரு நாட்டுத் தலைநகர் லீமாவில் கடந்த திங்கள்கிழமை முதல் நடைபெற்று வருகிறது.

இந்த மாநாட்டில் கலந்துகொள்வதற்காக லீமா நகருக்கு வந்துள்ள இந்திய சுற்றுச்சூழல் துறை அமைச்சர் பிரகாஷ் ஜாவடேகர், நிகழ்ச்சியொன்றில் திங்கள்கிழமை பேசியதாவது:

பருவ நிலை மாற்றத்தைக் கட்டுப்படுத்துவதற்கான திட்டங்களை நிறைவேற்ற உருவாக்கப்பட்டுள்ள பசுமைச் சூழல் நிதி, வளரும் நாடுகளுக்கு விரைந்து வழங்கப்பட வேண்டும்.

அந்த நிதிக்காக ஒதுக்கப்பட்டுள்ள 10,000 கோடி டாலரானது, ஆண்டுக்கு 1,000 கோடி டாலர் என்ற விகிதத்தில் வழங்கப்பட வேண்டும்.

பசுமைச் சூழல் நிதி, உண்மையிலேயே பயனுள்ள வகையில் அமைவதைப் பொருத்துதான் லீமாவின் தற்போது நடைபெற்று வரும் மாநாட்டின் வெற்றி அமையும் என்றார் அவர்.

சுற்றுச்சூழல் விவகாரத்தில், வளர்ச்சியடைந்த நாடுகள் தங்கள் வாக்குறுதிகளை நிறைவேற்றச் செய்வதில், வளரும் நாடுகளின் சார்பாக இந்தியா முன்னணியில் இருந்து செயல்பட்டு வருகிறது.
==========
--தினமணி