முன்னாள் ரயில்வே அமைச்சர் படுகொலை: 40 ஆண்டுகளுக்குப் பிறகு 4 பேர் குற்றவாளி எனத் தீர்ப்பு

-

கடந்த 1975-ஆம் ஆண்டில் அப்போதைய ரயில்வே அமைச்சர் எல்.என். மிஸ்ரா படுகொலை செய்யப்பட்ட வழக்கில், ஒரு வழக்குரைஞர் உள்பட நான்கு பேர் குற்றவாளிகள் என தில்லி நீதிமன்றம் திங்கள்கிழமை தீர்ப்பளித்தது.

அவர்களுக்கான தண்டனை குறித்து, வழக்குரைஞர்களின் வாதம் வருகிற 15-ஆம் தேதி நடைபெற உள்ளது.

பிகார் மாநிலத்தில் சமஸ்திபூர் ரயில் நிலையத்தில் நடைபெற்ற விழாவின் போது நிகழ்த்தப்பட்ட குண்டு வெடிப்பில் மிஸ்ரா கொல்லப்பட்டார்.

அதுதொடர்பாக நடைபெற்று வந்த வழக்கில், 40 ஆண்டுகளுக்குப் பிறகு தற்போது தீர்ப்பளிக்கப்பட்டுள்ளது.

குற்றம்சாட்டப்பட்ட வழக்குரைஞர் ரஞ்சன் துவிவேதி, சந்தோஷானந்த அவதூதா, சுதேவானந்த அவதூதா, கோபால்ஜி ஆகிய நால்வரையும் குற்றச் சதி, கொலை உள்ளிட்ட இந்திய தண்டனைச் சட்டத்தின் பிரிவுகளின் கீழும், வெடிமருந்துப் பொருள் சட்டப் பிரிவுகளின் கீழும் குற்றவாளிகள் என மாவட்ட நீதிபதி வினோத் கோயல் தீர்ப்பளித்தார்.

ஜாமீனில் இருந்த அந்த நால்வரையும் நீதிமன்றக் காவலில் வைக்கும்படி நீதிபதி உத்தரவிட்டார். நால்வருக்கும் மரண தண்டனை அல்லது ஆயுள் சிறைத் தண்டனை விதிக்கப்படலாம் என்று தெரிகிறது.

பிறகு செய்தியாளர்களிடம் பேசுகையில், "தீர்ப்பை எதிர்த்து மேல்முறையீடு செய்ய உள்ளதாக' நால்வரின் வழக்குரைஞர்கள் தெரிவித்தனர்.

இந்த வழக்கில், 5 பேர் மீது குற்றம்சாட்டப்பட்டிருந்தது. அவர்களில் ஒருவர் இறந்துவிட்டார். அரசுத்தரப்பில் 161 சாட்சிகளும், குற்றம்சாட்டப்பட்டவர்கள் தரப்பில் 40-க்கும் மேற்பட்ட சாட்சிகளும் விசாரிக்கப்பட்டனர்.

பின்னணி: கடந்த 1975-ஆம் ஆண்டு, ஜனவரி 2ஆம் தேதி சமஸ்திபூரில் நடைபெற்ற விழாவின்போது நிகழ்த்தப்பட்ட குண்டு வெடிப்பில் பலத்தகாயமடைந்த

எல்.என். மிஸ்ரா,   மறுநாள் உயிரிழந்தார். மிஸ்ராவைத் தவிர, மேலும் இருவரும் அச்சம்பவத்தில் உயிரிழந்தனர். ஏழு பேர் காயமடைந்தனர்.

இந்த வழக்கு தொடர்பாக, 1977-ஆம் ஆண்டு பாட்னா சிபிஐ நீதிமன்றத்தில் குற்றப்பத்திரிகை தாக்கல் செய்யப்பட்டது. அதையடுத்து, 1979-ஆம் ஆண்டு, இந்த வழக்கை தில்லிக்கு மாற்ற அப்போதைய அட்டார்னி ஜெனரல் கோரியதையடுத்து, தில்லி நீதிமன்றத்துக்கு வழக்கை மாற்றி உச்ச நீதிமன்றம் உத்தரவிட்டது.
-------------
--தினமணி