காதல் தியானம் - மு.மேத்தா

* பாட்டியாகிவிட்டய் நீ...
தாத்தா ஆகிவிட்டேன்
நான்!
ஆனாலும்
இன்னும் இளமையாய்
வாழ்கிறது நம் காதல்!

* சில தேசங்கள்
எல்லைக் கோடுகளைத்
தாண்டித் தாண்டி
பக்கத்து நாடுகளைப்
பதற வைக்கும்...
உண்மையான காதலோ-
இதயத்தில் கிழித்த
எல்லைக்கோடுகளைக்
கடந்து வராமல்
காதலர்களை கௌரவிக்கும்!

* காசு பணங்களைத்
தூசாய் மதித்து
சாதி மதங்களை
மோதித் தகர்த்து
கம்பீரமாய் நடந்து வரும்
காதல்-
தன் கால்களால் மிதிபட்டுப்
பாசப் பயிர்கள்
நசுங்கி விடாமலும்
பார்த்துக் கொள்ளும்...
காலம் முழுவதும் கை
கோர்த்துச் செல்லும்.

* காதலின் உன்னதம்
கண்டவர் உண்டோ?
காதலுக்காகக்
காதலையே தியாகம் செய்யும்
"காதல்!'

* கைவிடும் காதலைக்
கண்டிக்கலாம்...
கைலுக்கிக் கொண்டே
பிரிந்து செல்லும்
கண்ணியமான காதலை
மன்னிக்கலாம்!

* உன் குடும்பத்திற்காகவே
உழைக்கிறாய் நீ...
என் குடும்பத்திற்காகவே
இயங்குகிறேன் நான்!
அவரவர் குடும்பத்தில்
அவரவர் அரசாங்கம்!
இருந்தாலும் -
ஐ.நா. சபை போல்
அவ்வப்போது நம்மைக்
கண்காணித்துக் கொள்கிறது
நம் காதல்!

* அழுவதற்கல்ல காதல் -
எழுவதற்கு
அழித்துக் கொள்வதற்கல்ல
காதல்...
விழித்துக் கொள்வதற்கு!

* சிலருடைய காதல்
புகைப்பட மாகலாம்...
நம்முடைய காதல்
படமாகவில்லை...
காதலர் மனனம் செய்யும்
பாடமாகிவிட்டது

* காதல் என்பது
இல்லத்தில்
ஒருவருடன் ஒருவர்
இருப்பது அல்ல-
இதயத்தில்
ஒருவருள் ஒருவராய்
இருப்பது...
அன்பு கொண்டவரின்
இதயமாகவே மாறித்
துடிப்பது!

* உன்
கணவனின் அன்பில்
நீ
என்னை நினைக்கலாம்...
என் மனைவியின்
ஆராதனையில்
நான்
உன்னை நினைக்கலாம்...
தூய்மையாய் நிமிர்ந்த
நினைவின் சிகரங்களில்
வாழும் நம் காதல் -
வயதாகாமலும்...
வழிமாறாமலும்..!
--
* பாட்டியாகிவிட்டாய் நீ...
தாத்தா ஆகிவிட்டேன்
நான்!
ஆனாலும்
இன்னும்
இளமையாய் வாழ்கிறது
நம் காதல்.

- கவிஞர் மு. மேத்தா.
நன்றி -  குமுதம்