போலி ஆப்ஸ் ஆபத்துகள்!

செல்போனுக்கு ரீசார்ஜ் செய்வது துவங்கி வங்கிக் கணக்குகளைப் பராமரிப்பது, ஹெல்த் செக்கப் என அனைத்துக்கும் இன்று ஆப்ஸ்கள் வந்துவிட்டன. இப்படி நமது தேவைகளுக்குப் பயன்படும் ஆப்ஸ்களுக்கு பின்னால் அதிர்ச்சியளிக்கும் விஷயமும் உள்ளது... நாம் பயன்படுத்தும் ஆப்ஸ்கள் போலி எனில், நம்மைப் பற்றிய விவரங்கள் திருடப்பட வாய்ப்பு இருக்கிறது.

போலி ஆப்ஸ்கள் என்பவை, நாம் பயன்படுத்தும் ஆப்ஸ்களை போன்ற வடிவமைப்பில் சிறிய மாற்றங்களுடன் உருவாக்கப்படுபவை. உதாரணமாக, ஃபேஸ்புக் ஆப்ஸ் போன்ற அமைப்பிலேயே பல ஃபேஸ்புக் ஆப்ஸ்கள் நமது ஆப்ஸ் ஸ்டோரில் இருக்கும். இவையெல்லாமே ஒரிஜினல்தானா என்றால், இல்லை. அந்த ஆப்ஸ் மூலம் லாக் இன் செய்யும்போது நமது கணக்குக்குள் செல்லும். ஆனால், அதேசமயம் வேறு ஒரு இடத்தில் நமது கணக்கு விவரங்கள் பதியப்பட்டு திருடப்பட வாய்ப்புள்ளது.

சமூக வலைதளம் மட்டுமல்ல... வங்கி தொடர்புடைய ஆப்ஸ்களோ, பெண்கள் தங்கள் உடல் ஆரோக்கியம் சார்ந்த தகவல்கள், பெர்சனல் விஷயங்களைப் பதிவு செய்திருக்கும் ஆப்ஸ்களோ போலிகளாக இருந்தால்... பெர்சனல் விஷயங்களின் திருட்டு விபரீதமாகும். இன்னொருபுறம், நம் விவரங்கள் விளம்பரங்களுக்காகவும் விற்கப்படலாம். அதாவது, என்றோ ஒரு ஹெல்த் செக்கப் ஆப்ஸில் நம் மின்னஞ்சல் முகவரியை அளித்திருப்போம். சில நாட்களில், ஒரு ட்ரெட்மில் இயந்திர நிறுவனத்திடம் இருந்து நமக்கு வரும் மின்னஞ்சல். காரணம், திருடப்பட்ட நம் விவரங்கள் அந்த நிறுவனத்துக்கு விற்கப்பட்டிருக்கும்.

தப்பிக்க என்ன வழி?

பாதுகாப்பற்ற ஆப்ஸ்களில் உங்கள் பெர்சனல் விவரங்கள் பதிவாகாமல், அங்கீகரிக்கப்பட்ட சரியான ஆப்ஸ்களைப் பயன்படுத்துவதுதான் சிறந்தது.

பயன்படுத்தும் ஆப்ஸ் ஒரிஜினல் நிறுவனத்தினுடையது தானா என்பதை, ஆப்ஸ் ஸ்டோரில் அந்த ஆப்ஸின் கீழ் கொடுக்கப்பட்டிருக்கும் நிறுவனத்தின் பெயர் மூலம் சரிபார்த்து, பின் டவுன்லோடு செய்யுங்கள்.

ஹெல்த் செக்கப் ஆப்ஸ் பயன்படுத்தும்போது, அதனை தயாரித்த நிறுவனம் உண்மையாகவே மருத்துவத்துறை சார்ந்ததுதானா என்பதை செக் செய்வது அவசியம்.

சில ஆப்ஸ்ளைப் பற்றிய தகவல்கள் தெரியவில்லை... ஆனால், அது அவசியம் எனும்போது, அதில் வழங்கப்பட்டிருக்கும் ரேட்டிங்கை பார்த்து, அதற்கு வந்திருக்கும் இணையதள விமர்சனங்களைப் படித்துவிட்டு டவுன்லோடு செய்வது நல்லது.

முடிந்தவரை, ஆஃப்லைனில் இயங்கும் ஆப்ஸ்களைப் பயன்படுத்துவது நல்லது. ஆன்லைனில் பயன் படுத்தும் ஆப்ஸ்களில்தான் தகவல்கள் பகிரப்பட அதிக வாய்ப்புள்ளது.

ஆல் இன் ஒன் வுமன் ஸ்டோர்!

'வுமன் ஸ்டோர்’ எனும் ஆப்ஸ் பெண்களுக்குத் தேவையான அனைத்து ஷாப்பிங் இணையதளங்களையும் இணைத்து ஒரு ஆப்ஸை உருவாக்கியுள்ளது. அது மட்டுமின்றி குழந்தை பாதுகாப்பு, உணவு, பயணங்களுக்கான டிக்கெட் முன்பதிவு போன்றவற்றுக்கு பயன்படும் அனைத்து வசதிகளையும் இந்த ஆப்ஸில் வழங்கியுள்ளது. பெண்கள் தினம், அன்னை யர் தினம் போன்ற சிறப்பு தினங்களுக்கு ஆஃபர்களையும் வழங்குகிறது இந்த ஆப்ஸ். கூகுள் ப்ளே ஸ்டோரில் இலவசமாக கிடைக்கும் இந்த ஆப்ஸை பின்வரும் இணையதள முகவரியில் டவுன்லோடு செய்யலாம்... https://play.google.com/store/apps/details?id=com.wTheWomensStore&hl=en

விகடனிலிருந்து...

பயன்மிகு சிறந்த பகிர்வு நன்றி பவுன் ராஜ் அண்ணா