பார்க்கிங் என்னும் பகல் கொள்ளை!

by **Powenraj** Thu Nov 27, 2014 11:55 am

நகரங்களில் நிலத்தின் மதிப்பு பன்மடங்கு அதிகரித்துவிட்டது. பார்க்கிங்கிற்கு என்று பெரிய இடத்தை ஒதுக்க வேண்டியிருப்பதால், அந்த இடத்தை வைத்து சம்பாதிக்க வேண்டிய தொகையை பார்க்கிங் கட்டணத்தின் மூலம் எடுக்க நினைக்கிறார்கள். இருந்தாலும் இதில் ஒரு நியாயம் இருக்க வேண்டும்.

சென்னை ராயப்பேட்டையில் உள்ள ஒரு மல்டிப்ளெக்ஸில் இரு சக்கர வாகனம் நிறுத்துவதற்கான குறைந்தபட்ச கட்டணம் 60 ரூபாய். இது இரண்டு மணி நேரத்துக்கானது. அடுத்த ஒவ்வொரு மணி நேரத்துக்கும் கூடுதலாக 10 ரூபாய். ஒரு சினிமா பார்த்துத் திரும்பினால் பார்க்கிங்கிற்கு மட்டும் 70 ரூபாய் செலவாகிறது. மற்ற மால்களில் இந்த தொகை சற்று கூட, குறையலாம். ஆனால் குறைந்தப்பட்சம் 30 ரூபாய் ஆகிறது. ஞாயிற்றுக்கிழமையில் இது இன்னும் 10 ரூபாய் கூடும்.

கார் வாடகையோ கிறுகிறுக்க வைக்கிறது. திங்கள்-சனி வார நாட்களில் முதல் மூன்று மணி நேரத்துக்கான கார் வாடகை 150 ரூபாய். அடுத்த ஒவ்வொரு மணி நேரத்துக்கும் 50 ரூபாய். இதுவே ஞாயிறு என்றால் இந்தத் தொகை 200 ரூபாய், 70 ரூபாய் என்று அதிகரிக்கும். மீட்டர் வட்டி மாதியே இருக்கிறது. கணவன், மனைவி, குழந்தை கொண்ட ஒரு குடும்பம் இத்தகைய மால்களுக்கு ஒருமுறை சென்றுவந்தால் 1,000 ரூபாய் காலி.

உண்மையில் நகரத்தின் நெருக்கடியான இடங்களில் இதுபோன்ற மால்களை கட்டுவதால் பெரும் போக்குவரத்து நெரிசல் ஏற்பட்டு மக்கள் தினசரி அவதிக்கு உள்ளாக்குகின்றனர். இனியேனும், நெரிசல் மிகுந்த பகுதிகளில் பல்லடுக்கு ஷாப்பிங் மால்களுக்கு அனுமதி வழங்குவதற்கு முன்பு இத்தகைய சிக்கல்கள் குறித்து அரசு கவனத்தில் கொள்ள வேண்டும்.

இந்த அளவுக்கு இல்லாமல் தொகை குறைவு என்றாலும் ரயில் நிலையம் மற்றும் பேருந்து நிலையங்களின் பார்க்கிங்கும் பதற வைப்பதாகத்தான் இருக்கிறது. இரவு 11.50க்கு வண்டியை வைத்துவிட்டு அடுத்த இரண்டு மணி நேரத்தில் எடுத்தாலும், இரண்டு நாள் கணக்குப் போட்டு பணம் கேட்கிறார்கள். கேட்டால் வண்டியை விடும்போது 25-ம் தேதி, எடுக்கும்போது 26-ம் தேதி என்று டெக்னிக்கலாக பேசுகிறார்கள்.

இவ்வளவு விவரமாக பேசும் இவர்கள் வண்டிகளை விடுவதற்கான ஷெட்டை கூட ஒழுங்காக வைத்திருப்பது இல்லை. அது உடைந்து, ஒழுகி, சகதிக்காடாக கிடக்கும். பல இடங்களில் ஷெட்டே இருப்பது இல்லை. வெட்டவெளியில் வண்டியை நிறுத்தி வைக்க நாம் பணம் தர வேண்டும்.

விகடனிலிருந்து...

by **ராஜா** Thu Nov 27, 2014 12:07 pm

பார்க்கிங் என்னும் பகல் கொள்ளை! 3838410834

இது போல பகல் கொள்ளைகளை தட்டிகேட்க முடியாது , நாமாக முன்வந்து புறக்கணிக்க வேண்டும். அப்போ தான் திருந்துவார்கள்.

இங்கும் City Center என்ற பெரிய shopping mall உள்ளது. நகரின் மத்தியில் இருப்பதாலோ என்னவோ எப்போ பார்த்தாலும் அங்கு வாகன நிறுத்துமிடம் முழுவதும் நிரம்பியே காணப்படும். காரணம் என்னவென்று பார்த்தால் அந்த பகுதியில் உள்ள மற்ற வணிகவளாகங்களில் உள்ள அலுவலகத்தில் பணிபுரியும் ஊழியர்கள் கூட தங்களது கார்களை பாதுகாப்பாக நிறுத்திகொள்வது கண்டுபிடிக்கப்பட்டது. உடனே இலவசமாக இருந்ததை கட்டண நிறுத்தமாக மாற்றினார்கள் (கட்டணம் சற்று அதிகம் தான்)

இருந்தாலும் அங்குள்ள carrefour மாலில் நாம் பொருட்கள் வாங்கிய பில்லையோ அல்லது தியேட்டர் அனுமதி சீட்டையோ காட்டி அதில் ரப்பர்ஸ்டாம்ப் அடித்துகொண்டோமானால் முதல் இரண்டு மணி நேரத்திற்கு கட்டணம் இலவசம். இது போல எங்கும் எதாவது பண்ணலாம்

by mbalasaravanan Thu Nov 27, 2014 12:09 pm

நாம் திருந்தனும் இலேன்னா இழப்புகள் நமக்கே

by **ayyasamy ram** Thu Nov 27, 2014 1:12 pm

பல பேருந்து நிலையங்களிலும், ரயில் நிலையங்களிலும்
டூ வீலர் நிறுத்துமிடம் மேற்கூரையில்லாத திறந்த வெளியாக
உள்ளது...
-
அரை லட்சம் செலவு பண்ணி வாங்கிய வண்டிகள்
மழையிலும் வெயிலிலிலும் நிற்க வேண்டிய பரிதாப நிலை
-
மேலும் ஏலம் எடுக்கும்போது கடைப்பிடிக்க வேண்டிய
கட்டண விகிதம் நிர்ணயித்திருப்பார்கள்....
அந்த கட்டண விகிதத்தை விட பன்மடங்கு கூடுதலாகத்தான்
வசூலிக்கிறார்கள்..
-
ட்ராபிக் ராமசாமி போல பொதுநல வழக்கு போடுவோர்
பெருகினால்தான் நாடு திருந்தும்...