தங்காமல் போன தங்க நிமிடங்கள்...

Pmnatarajan · Pmnatarajan Mon Nov 24, 2014 1:53 am

தங்காமல் போன -அந்தத்
தங்க நிமிடங்களை
என்
கவிதைநோட்டின்
கடிகாரங்கள் காட்டிகொண்டேயிருக்கின்றன!

என்
விட்டத்தில் காற்றாடியோடு
பட்டம்விட்டுக் கொண்டிருந்த - உன்
பார்வைப் பறவைகள்
பறந்துகொண்டே...

உன்
விழி பெய்த
பார்வைப் பேய்மழையில்
நனைந்தது நான்.
தலைதுவட்டியது காதல்..
தும்மியது தூக்கம்..
இருமியது கனவு..
காய்ச்சல் கண்டது கவிதைநோட்டு..

உன்
கொலுசுகளின் கும்மிப்பாட்டு கேட்டு
கரகம் ஆடிய கற்பனைகள்
பரதம் ஆடிய பரவசங்கள்
பதம் மாறாமல் பத்திரமாகவே..

"எதிர்காலத்தில் எனக்காக
முத்தக்காசுகளைச் செலவழிக்கவா
இதழ் வங்கிகள்??"
கனவில் கவிதை சொன்னபோது
"ஒருசில சில்லறைகளை
உடனே செலவழிக்கலாமா?" -என்ற
உன் ஒருகண் சிமிட்டல்..உயிரோடே..

வெட்கம் வரும்போதெல்லாம்
விழுந்துவிட்ட உன்
விரல்களின் கோபுரங்கள்!-ஆம்
உன்
நாணச் சிவப்பிடம்
தோற்றுப்போன
நகச் சிவப்பு .. ஞாபகத்திலேயே...

என்விரல்களுக்காக
நீ
வளர்த்த கூந்தலை
காற்று கலைத்துப்போட்டது
அழகு!
நம்மிருவருக்காக
நான்வளர்த்த காதலை
காலம் கலைத்துப்போட்டது!
அழுகை!

இப்படியாக
என் திருவாங்கூர் பொக்கிஷத்தின்
திறக்கப்படாத அறைகளில்
ஏகப்பட்ட நினைவுவைரங்கள் - இவற்றோடு
என் காதலும்....
காலம் திறக்காது!
கவிதைகள் மட்டும் முயன்றுகொண்டே...

-Natarajan Mariappan
Yogi Ramsuratkumara Jayagururaaya

**T.N.Balasubramanian** · **T.N.Balasubramanian** Mon Nov 24, 2014 12:31 pm

முதல் பதிவே நன்றாக இருக்கிறது , நடராஜன் அவர்களே .
தொடருங்கள் அன்பு மலர்

உங்கள் வரவு நல்வரவாகட்டும் :நல்வரவு:

அறிமுக பகுதி சென்று தங்களை அறிமுகப்படுத்திக் கொள்ளுங்கள் .
விதி முறைகளை படித்து பின்பற்றுங்கள் .

நீங்கள் பதிவிட்டது , உங்கள் சொந்த கவிதை போல் தெரிகிறது .
அப்பிடி எனில் , சொந்த கவிதைக்கு மாற்றி விடுகிறேன் .

ரமணியன்