வருமானத்துக்காக மதுக்கடைகளை திறந்து இளைய சமுதாயத்தை சீரழிக்கிறார்கள்: வைகோ பேச்சு

கோவை சுந்தராபுரம் ம.தி.மு.க. சார்பாக மதுவிலக்கு மராத்தான் பந்தயம் மதுக்கரை ரோடு உழவர் சந்தை முன்பு இன்று காலை நடந்தது.

மாநில இளைஞர் அணி செயலாளர் ஈஸ்வரன் தலைமை தாங்கினார். மாநகர் மாவட்ட செயலாளர் மோகன்குமார், திருப்பூர் மாவட்ட செயலாளர் மாரியப்பன், அவைத்தலைவர் துரைசாமி ஆகியோர் முன்னிலை வகித்தனர்.

போட்டி 3 பிரிவாக நடத்தப்பட்டது. உழவர் சந்தை முன்பு தொடங்கிய போட்டி மதுக்கரை மார்க்கெட்டில் முடிந்தது. போட்டிகளை தொடங்கி வைத்த ம.தி.மு.க. பொதுச்செயலாளர் வைகோ பேசியதாவது:–

மதுவிலக்குக்கு எதிரான மராத்தான் பந்தயத்தில் மாணவ–மாணவிகள் அதிக அளவில் பங்கேற்றது மகிழ்ச்சி அளிக்கிறது. தமிழகத்தில் தற்போது கலாசார சீரழிவு ஏற்பட்டுள்ளது.

காமராஜர் காலத்திலும், அண்ணா காலத்திலும் தமிழகத்தில் மது இல்லை. ஆனால் அதற்கு பிறகு வந்த அரசுகள் வருமானத்துக்காக மதுக்கடைகளை திறந்து இளைஞர் சமுதாயத்தை சீரழித்து வருகின்றன. மாணவர்கள் தங்கள் வீட்டில் உள்ள பெரியவர்களை மதுகுடிக்க விடாதீர்கள்.

அலெக்சாண்டர் பெரிய வீரன். அவன் தனது 12 வயதில் முரட்டுக்குதிரையை அடக்கினான். ஆனால் மதுவுக்கு அடிமையான பின்னர் 34 வயதில் மாண்டு போனான். மக்களின் உயிருக்கு உலைவைக்கும் மதுவுக்கு எதிராக நாம் போராட வேண்டும். நான் மதுவை ஒழிப்பதற்காக 2 தடவை 1200 கி.மீ. தூரம் நடை பயணம் மேற்கொண்டேன். செல்லும் வழியில் எல்லாம் பொதுமக்களை சந்தித்து விழிப்புணர்வு ஏற்படுத்தினேன்.

இப்போது முதன் முறையாக கோவையில் மராத்தான் பந்தயம் நடத்தப்பட்டுள்ளது. இதேபோல் சென்னை மற்றும் தமிழகத்தின் ஒவ்வொரு பகுதிகளிலும் மதுவுக்கு எதிராக மாணவர் சமுதாயத்தை திரட்டி போராட்டம் நடத்துவோம்.

மேற்கண்டவாறு வைகோ பேசினார்.

அதைத்தொடர்ந்து அவர் ‘ஒழிப்போம், ஒழிப்போம் மதுக்கடைகளை ஒழிப்போம்’ என்று கோஷம் எழுப்பினார். மராத்தானில் கலந்து கொள்ள வந்தவர்களும் கோஷம் எழுப்பினர். பந்தயத்தை தொடங்கி வைத்த வைகோவும் போட்டியில் கலந்து கொண்டார்.
-maalaimalar

வாழ்த்துகள் வைக்கோ அவர்களே ,

உங்கள் கருத்துக்களை நானும் ஆமோதிக்கிறேன்

-