அஞ்சலகங்களை தொடர்பு கொண்டால் ஆம்புலன்ஸ் வரும்: புதிய திட்டம் விரைவில் அறிமுகம்

அவசரக் காலத்தில் பொதுமக்களுக்கு உதவிடும் வகையில், அஞ்சல் நிலையங்களில் ஆம்புலன்ஸ் சேவையைப் பெறும் புதிய திட்டம் விரைவில் அறிமுகம் செய்யப்பட உள்ளது.
-
இந்தப் புதிய திட்டத்தை டிசம்பர் மாதம் முதல் செயல்பாட்டுக்குக் கொண்டு வருவதற்கான ஆலோசனையில் தமிழக அஞ்சல் வட்ட அதிகாரிகள் ஈடுபட்டுள்ளனர்.
-
சந்தையில் நிலவி வரும் கடும் போட்டியைச் சமாளிக்கும் வகையில், இந்திய அஞ்சல் துறைப் பொதுமக்களுக்கு ஏராளமான சேவைகளை அறிமுகப்படுத்தி வருகிறது. அந்த வரிசையில், தமிழ்நாடு அஞ்சல் வட்டத்தில் அவசரக் காலத்தில் பொதுமக்களுக்கு உதவும் வகையில், அஞ்சல் நிலையங்களில் ஆம்புலன்ஸ் சேவை தொடங்கப்படவுள்ளது.
-
தமிழகத்தில் இந்தத் திட்டம் முதல் முறையாக நெடுஞ்சாலைகளுக்கு அருகாமையில் உள்ள அஞ்சல் நிலையங்களில் செயல்படுத்தப்பட உள்ளதாக அஞ்சல் துறை வட்டாரங்கள் தெரிவிக்கின்றன. இந்தப் புதிய திட்டத்தைச் செயல்படுத்துவது குறித்து, அஞ்சல் துறை அதிகாரிகள் தீவிர ஆலோசனை நடத்தி வருகின்றனர்.
-
இதுகுறித்து தமிழக அஞ்சல் வட்ட உயர் அதிகாரி ஒருவர் கூறியதாவது:
-
தமிழ்நாடு அஞ்சல் வட்டம், பொது மக்களுக்கான பல்வேறு முன்னோடி திட்டங்களை அறிவித்து வருகிறது. அஞ்சலகங்களில் பாரம்பரிய பணிகளான கடிதப் பட்டுவாடா மட்டுமின்றி, அஞ்சலக சேமிப்பு, இ-போஸ்ட், மீடியா போஸ்ட் என பல சேவைகள் அளிக்கப்பட்டு வருகின்றன.
-
அதேபோல் அஞ்சல் நிலையம் மூலமாக சர்வதேச நாடுகளுக்குப் பண பரிவர்த்தனை, பேருந்து, ரயில் டிக்கெட் முன்பதிவு, முன்னணி நிறுவனத் தயாரிப்புகள் விற்பனை போன்ற ஏராளமான சேவைகள் அளிக்கப்படுகின்றன. இந்தச் சேவைகளுக்கு பொதுமக்களிடையே நல்ல வரவேற்பு கிடைத்து வருகிறது. அந்த வரிசையில், பொது மக்களுக்கு அவசரக் காலங்களில் உதவும் விதமாக, குறிப்பிட்ட சில அஞ்சல் நிலையங்களில் ஆம்புலன்ஸ் சேவையை வழங்க முடிவு செய்துள்ளோம்.
-
இந்தச் சேவை நெடுஞ்சாலைகளுக்கு அருகிலுள்ள அஞ்சல் நிலையங்களில் முதல் கட்டமாகத் தொடங்கப்படவுள்ளது.
-
இந்தத் திட்டத்தில், சம்பந்தப்பட்ட அஞ்சல் நிலையங்களில் அரசு, தனியார் நிறுவனம், தன்னார்வ அமைப்புகள் ஆகியவற்றின் ஆம்புலன்ஸ்கள் நிறுத்தி வைக்கப்படும். அவசரக் காலத்தில் தேவைப்படும் நபர்களுக்கு, அங்கிருந்து உடனடியாக ஆம்புலன்ஸ் அனுப்பி வைக்கப்படும்.
-
ஆம்புலன்ஸ்களை நிறுத்தி வைப்பதற்கான இடவசதியை மட்டுமே அஞ்சல் துறை ஏற்படுத்தும். ஆம்புலன்ஸ் சேவையை அறிமுகப்படுத்தும் பணிகள் விரைவாக நடந்து வருகின்றன.
-
இந்தச் சேவையை வழங்கும் மையங்களுடன் அஞ்சல் துறை அதிகாரிகள் ஆலோசனை நடத்தி வருகின்றனர். இதற்கான அறிவிப்பு ஓரிரு வாரங்களில் வெளியிடப்படும். டிசம்பர் மாதம் முதல் இந்தச் சேவை தொடங்கப்படும் என்றார் அவர்.
-
–தினமணி