5 புலிகள் தப்பிவிடாமல் தடுக்க மயக்க ஊசி போட்டு பிடிப்பு: பூங்கா அதிகாரி தகவல்

சென்னையை அடுத்த வண்டலூரில் உள்ள அறிஞர் அண்ணா உயிரியல்பூங்காவில் பல்வேறு வகையான விலங்குகள் மற்றும் பறவைகள் உள்ளன. இவற்றை தினமும் ஏராளமான சுற்றுலா பயணிகள் வந்து பார்த்து செல்கின்றனர்.

இந்த நிலையில், மழையின் காரணமாக, வண்டலூர் பூங்காவில் புலிகள் அடைத்து வைக்கப்பட்டுள்ள பகுதியை சுற்றியுள்ள சுமார் 8 அடி உயர கருங்கால் சுற்றுசுவர் நேற்று காலை 100 அடி நீளத்திற்கு திடீரென இடிந்து விழுந்தது. இதைப்பார்த்த பூங்கா ஊழியர் உடனே பூங்கா உயர் அதிகாரிகளுக்கு தகவல் தெரிவித்தார்.

உடனே அங்கு விரைந்து வந்த பூங்கா அதிகாரிகள், மருத்துவர்கள், ஊழியர்கள், துரிதமாக செயல்பட்டு அங்கு இருந்த புலிகள் தப்பி விடாமல் இருக்க அவற்றுக்கு மயக்க ஊசி செலுத்தி பிடித்து வேறுவேறு கூண்டுகளுக்குள் அடைத்தனர்.

இதனை தொடர்ந்து, சுவர் இடிந்து விழுந்த பகுதியில் தங்காலிகமாக வெல்டிங் மூலம் இரும்பு முள்வேலி அமைக்கும் பணி தீவிரமாக நடைபெற்றது.

இதற்கிடையே சுற்றுச்சுவர் இடிந்து விழுந்த போது அங்கு இருந்த 5 புலிகளில் 2 புலிகள் தப்பித்து பூங்காவிற்குள் உள்ள காட்டுப்பகுதியில் சென்று பதுங்கிவிட்டதாக பூங்காவை ஒட்டியுள்ள ஓட்டேரி, நெடுங்குன்றம், ஊனைமாஞ்சேரி ஆகிய பகுதிகளில் வதந்தி பரவியது. இதனால் கிராம மக்கள் பீதி அடைந்தனர்.

ஆனால் இந்த தகவலை பூங்கா அதிகாரி ஒருவர் மறுத்தார்.

அவர் ‘தினத்தந்தி’ நிருபரிடம் கூறியதாவது:-

வண்டலூர் பகுதியில் கடந்த 2 நாட்கள் பெய்த தொடர் மழையின் காரணமாக புலி கூண்டின் பாதுகாப்பு சுற்றுச்சுவர் திடீரென இடிந்து விழுந்தது. இதனை பூங்கா ஊழியர்கள் பார்த்தவுடன் எங்களுக்கு தகவல் தந்தனர். உடனே விரைந்து சென்ற நாங்கள் அங்கு இருந்த 5 புலிகளையும் பத்திரமாக மீட்டு வெவ்வேறு கூண்டிற்குள் அடைத்து பாதுகாப்பான இடத்தில் வைத்தோம். பூங்கா ஊழியர் உடனே தகவல் தெரிவிக்காமல் இருந்தால் பெரும் அசம்பாவிதம் நடந்து இருக்கும். ஆனால் நல்ல வேளையாக அப்படி எதுவும் நடக்கவில்லை.

சுவர் இடிந்த விழுந்த இடத்தில் தற்போது தற்காலிகமாக வெல்டிங் மூலம் இரும்பு கம்பி முள்வேலி அமைக்கப்பட்டு உள்ளது. ஆனால் 2 புலிகள் தப்பியதாக கூறப்படும் தகவல் தவறானது. இது போன்ற வதந்தியை யாரும் நம்பவேண்டாம். சனிக்கிழமை (இன்று) பூங்கா வழக்கம் போல் இயங்கும்.

-maalaimalar

உடனடியாக செயல்பட்ட பூங்கா ஊழியர்களுக்கு மிக்க நன்றி

நல்லவேளை

உரிய நேரத்தில் செயல் பட்ட ஊழியர்களுக்கு தான் நன்றி கூற வேண்டும்...

புலிகள் தப்பி விட்டதாக கிலி ஏற்படுத்தும் வதந்திகளை
பரப்பிய நபர்களை கண்டு பிடித்து தண்டிக்க வேண்டும்...
-