மாதக் கடைசி: பணப் பிரச்னையைத் தீர்க்க சில வழிகள்!

by பாலாஜி Thu Nov 13, 2014 11:32 am

மாத சம்பளம் வாங்குபவர்களுக்கு முதல் வாரத்தில் எப்படியும் சம்பளம் கிடைத்துவிடும். சம்பளம் கிடைத்த 20 நாட்கள் எந்த விதமான பிரச்னையும் இல்லாமல் நாட்கள் நகரும். 20 ஆம் தேதிக்குப் பிறகுதான் பிரச்னை ஆரம்பிக்கும்.

இருசக்கர வாகனத்துக்கு பெட்ரோல் போடுவதற்கு என்ன செய்வது என்பதில் ஆரம்பித்து, அன்றாடத் தேவைகளை நிறைவேற்றிக்கொள்வது கூட சிரமமாக இருக்கும். இருவர் வேலைக்குப் போகும் வீடுகளிலும் இந்தப் பிரச்னை இருக்கும்.

மாதக் கடைசி: பணப் பிரச்னையைத் தீர்க்க சில வழிகள்! Untitled%2013(97)

மாதக் கடைசி: பணப் பிரச்னையைத் தீர்க்க சில வழிகள்! Untitled%2013(97)

இந்தப் பிரச்னையில் சிக்காதவர்களை விரல்விட்டு எண்ணிவிடலாம். ஒவ்வொரு மாதமும் இந்தப் பிரச்னை வரும்போதெல்லாம் அடுத்த மாதம் சம்பளம் வந்ததும் குறிப்பிட்ட தொகையைத் தனியாக எடுத்துவைத்துவிட வேண்டும் என சபதம் எடுப்போம். ஆனால், அதை ஒருபோதும் செய்யமாட்டோம். சபதம் எல்லாம் காற்றில் பறந்துபோகும். இந்தப் பிரச்னையிலிருந்து விடுபடுவதற்கு ஒரேவழி திட்டமிடல்தான்.

* சம்பளம் கைக்குக் கிடைத்ததும் குறிப்பிட்ட தொகையை எடுத்து தனியாக வைத்துவிட வேண்டும். அதேபோல, சேமிப்பு அல்லது ஏதாவது கடனுக்காக இ.சி.எஸ். கொடுத்திருந்தால் அந்தத் தொகை போக மீதமுள்ள தொகையில் அந்த மாத செலவுக்கான பட்ஜெட்டை திட்டமிடுவது நல்லது.

*பட்ஜெட் போடும்போது செலவுகளை இரண்டு வகையாகப் பிரித்துக்கொள்வது நல்லது. அதாவது, தேவையான செலவு, தேவையில்லாத செலவு என பிரித்து பட்ஜெட் போடலாம். இதில் தேவையான செலவுகளுக்கு அதிக முக்கியத்துவமும், தேவையில்லாத செலவுகளை முடிந்தவரை தவிர்ப்பதும் நல்லது.

* ஹோட்டல், ஷாப்பிங், அவுட்டிங் போன்ற செலவுகளை டெபிட் அல்லது கிரெடிட் கார்டு மூலமாகச் செய்வது நல்லது. கிரெடிட் கார்டு பில்லை சரியாகத் திரும்பச் செலுத்துபவர்கள் அதைப் பயன்படுத்தலாம். இல்லையெனில், டெபிட் கார்டை பயன்படுத்துவது புத்திசாலித்தனமாக இருக்கும். ஏனெனில், கார்டு மூலமாக செலவு செய்யும்போது எந்த தேதியில் என்ன செலவு செய்தோம் என்பதைத் தெரிந்துகொள்ள முடியும். மேலும், ஒரு மாதத்தில் 2, 3 முறை ஹோட்டலுக்குப் போயிருந்தால் அதை எளிதாகக் கண்டுபிடித்து குறைக்க முடியும்.

* பார்த்த பொருட்களை எல்லாம் வாங்கும் மனநிலைக் கொண்டவர்கள், ஷாப்பிங் செல்லும்போது என்ன பொருள் வாங்கப் போகிறோம், அதற்கு எவ்வளவு பணம் தேவை என்பதைத் திட்டமிட்டு அதற்குத் தேவையான பணத்தை மட்டும் கையில் எடுத்துச் செல்வது நல்ல பழக்கமாக இருக்கும்.

*சம்பளம் வந்தவுடனேயே கிரெடிட் கார்டு பில், மின்சாரக் கட்டணம் போன்ற கட்டணங்களைச் செலுத்திவிடுவது நல்லது. இல்லையெனில் இன்றைக்கு, நாளைக்கு என கடைசியில், கட்டணத்தைச் செலுத்த கடன் வாங்க வேண்டிய நிலை உருவாகும்.

*மாத கடைசியில் பிரச்னைகளைச் சமாளிக்க எடுத்து வைக்கும் தொகையை வங்கிக் கணக்கு அல்லது ஆர்.டி.யில் சேமித்து வைப்பது நல்லது. இந்த வங்கி கணக்குக்கான டெபிட் கார்டை தேவையானபோது மட்டும் பயன்படுத்துவது நல்லது. எப்போதுமே இந்த கார்டை கையில் வைத்திருந்தால், அது செலவு செய்வதற்கான வழியை ஏற்படுத்த வாய்ப்புள்ளது.

*நண்பர்கள் அல்லது உடன் வேலைபார்ப்பவர்களிடம் கடன் வாங்கி எந்தப் பொருளையும் வாங்கக் கூடாது. ஏனெனில், இந்தப் பழக்கம் தொடர்ந்தால் அதிகக் கடன் வாங்க வைக்கும். இதுவும் ஒருவகையில் செலவை அதிகரிக்கும்.

* எல்லா செலவுகளுக்கும் ஒரு வரையறை வைத்துக்கொள்வது நல்லது. செலவுகளை முன்கூட்டியே திட்டமிட்டு அதற்கு எவ்வளவு தொகை வேண்டும் என்பதையும் திட்டமிட்டு அதற்குள் செலவை வைத்துக்கொள்வது நல்லது.

இதையெல்லாம் சரியாகச் செய்தாலே மாதக் கடைசியிலும் மகிழ்ச்சியாக இருக்கலாம்.

- இரா.ரூபாவதி

--முக நூல்
-ந.விகடன்

by **ஜாஹீதாபானு** Thu Nov 13, 2014 12:56 pm

நல்ல தகவல் நன்றி பாலாஜி

தேவைப்படும்போது வாங்கிக்குறேனு சொல்லி நான் என் பொண்ணுகிட்ட குடுத்து வைப்பேன் . ஆனா 2 நாளில் திரும்பவும் வாங்கிடுவேன்.

அப்புறம் எதுக்குமா குடுக்குறனு திட்டுவா சோகம்

by **T.N.Balasubramanian** Thu Nov 13, 2014 1:51 pm

ரொக்கமாக கொடுக்கவேண்டிய செலவுகளை மாத முதலில் செய்து விட்டு ,பின்பு உபயோகப்படுத்தக்கூடிய இடங்களில் கார்டை தேய்க்கலாம் . (பெட்ரோல் உள்பட). கண்மூடித்தனமாக செலவு செய்வதை தவிர்த்தாலே ,
மாதக்கடைசி தட்டுப்பாடு வரவே வராது .
சிறு வயது முதலே நான் கற்றுக்கொண்ட பாடம் . வரவுக்கு தக்க செலவு செய்யவே ஆசைபடுவேன் .
பணம் இல்லாததால் ,வாங்கவில்லை என்ற கவலை அடைந்ததே இல்லை .

ரமணியன்