நிலங்களில் பண்ணைக்குட்டை அமைப்பது எப்போது? மழை நீரை அறுவடை செய்வதில் சுணக்கம்

திருப்பூர் : தேசிய ஊரக வேலை உறுதி திட்டத்தில், முறையான ஒருங்கிணைப்பு இல்லாததால், சிறு குறு விவசாய நிலங்களில் அரசு மானியத்துடன் பண்ணைக்குட்டை அமைப்பது கேள்விக்குறியாகி உள்ளது. இது விஷயத்தில், மாவட்ட நிர்வாகம் கூடுதல் கவனம் செலுத்த வேண்டும் என, கோரிக்கை விடுக்கப்பட்டுள்ளது.

தேசிய ஊரக வேலை உறுதி திட்டத்தில், சிறு குறு மற்றும் நடுத்தர விவசாயிகள் பயனடையும் வகையில், நில மேம்பாடு மற்றும் மரம் வளர்ப்பு பணிகளை மேற்கொள்ள அரசு உத்தரவிட்டிருந்தது. முதல் கட்டமாக, மாவட்டம் வாரியாக சிறு, குறு மற்றும் நடுத்தர விவசாயிகளை கண்டறிய கணக்கெடுப்பு நடத்தப்பட்டு, வறுமைக்கோட்டுக்கு கீழ் வசிக்கும் விவசாயிகளின் பட்டியல் தயாரிக்கப்பட்டுள் ளது. மாவட்ட அளவில், வறுமைக்கோட்டுக்கு கீழ் வசிக்கும் 21 ஆயிரத்துக்கும் அதிகமான விவ சாயிகள், பண்ணைக்குட்டை அமைக்கும் திட்ட பயனாளிகளாக தேர்வு செய்யப்பட்டனர்.தேசிய ஊரக வேலை உறுதி திட்ட தொழிலாளர்களை பயன்படுத்தி, சிறு குறு விவசாயிகளின் நிலங்களில் பண்ணைக்குட்டை அமைக்கப்பட்டு வருகிறது. இது, 100 மீட்டர் நீளம், 50 முதல் 100 மீட்டர் அகலம், இரண்டு மீட்டர் ஆழம் என்ற அளவில் உள்ளது.

மாவட்டத்தில், கடந்த நிதியாண்டில், தலா 1.50 லட்சம் ரூபாய் மதிப்பீட்டில் 1,000 பண்ணைக்குட்டைகள் அமைக்க திட்டமிடப்பட்டது. மழைப்பொழிவு குறைவாக இருந்ததால், கூடுதல் பண்ணைக்குட்டை அமைக்க, மாவட்ட நிர்வாகம் அனுமதி தந்தது. அதன்படி 1,500 பண்ணைக்குட்டைகள் அமைக்க, 22.50 கோடி ரூபாய் நிதி ஒதுக்கீடு செய்யப்பட்டது.இத்திட்டம் குறித்து விவசாயிகள் இடையே விழிப்புணர்வு இல்லாததாலும், சரியான ஒருங்கிணைப்பு இல்லாமலும், பண்ணைக்குட்டை பணிகள் திட்டமிட்டபடி நடைபெறவில்லை. திட்ட தொழிலாளர்கள் பணிக்கு செல்ல முனைப்புடன் இருந்தும், சிறு குறு விவசாயிகளை ஒருங்கிணைத்து, பண்ணைக்குட்டைகள் அமைப்பதில், மாவட்ட நிர்வாகம் கூடுதல் கவனம் செலுத்தவில்லை.இதனால், 1,500 பண்ணைக்குட்டைகளுக்கு நிதி ஒதுக்கீடு செய்திருந்தும், மாவட்ட அளவில் இதுவரை 400 மட்டுமே அமைக்கப்பட்டுள்ளன. கடந்த மாதம் பெய்த மழையால், விளைநிலங்களில் அமைக்கப்பட்ட பண்ணைக்குட்டைகளில் தண்ணீர் தேங்கியுள்ளது.கடந்த ஆண்டு இலக்கே எட்டப்படாததால், நடப்பு ஆண்டில் புதிதாக இலக்கு நிர்ணயம் செய்யப்படவில்லை. மாறாக, கடந்த ஆண்டில் விடுபட்ட பணிகளை தொடர உத்தரவிடப்பட்டுள்ளது. அதன்படி, மாவட்ட அள வில் 1,100 பண்ணைக்குட்டைகளை, நடப்பு ஆண்டில் அமைக்க முடிவு செய்யப்பட்டுள்ளது.

மாவட்ட ஊரக வளர்ச்சி முகமை திட்ட இயக்குனர் திரவியம் கூறுகையில், ""கடந்த ஆண்டு சிறு, குறு விவசாயிகள் ஆர்வம் காட்டாததால், 400 பண்ணைக்குட்டைகள் மட்டும் அமைக்கப்பட்டன. தேசிய வேலை உறுதி திட்ட பணியாளர்களை கொண்டு, இந்தாண்டு 1,100 இடங்களில் பண்ணைக்குட்டை அமைக்க, மாவட்ட நிர்வாகம் உத்தரவிட்டுள்ளது. விளைநிலங்களில் மழைநீரை தேக்கி, நீர்வளத்தையும், மண் வளத்தையும் பாதுகாக்க விரும்பும் விவசாயிகள், அந்தந்த வேளாண்துறை உதவி இயக்குனர் அலுவலகத்தில் விண்ணப்பிக்கலாம்,'' என்றார்.