தமிழில் உலகத்தைப் பார்க்கலாம்!

'ஆஸம் ஆஸம்’, 'ஃபென் டாஸ்ட்டிக் பெர்ஃபார்மென்ஸ்’ 'யூ கய்ஸ் ராக்’ என்றெல்லாம் தமிழ் சேனல்கள் ஆங்கிலத்தில் வெளுத்துக் கட்டும்போது, ''இப்போ இந்தக் கூம்பு வடிவத் தக்கையை மிதக்கவிட்டுதான் நான் அமேஸான் காட்டிலிருந்து தப்பிப் பிழைக்கப்போகிறேன்'' என்று தமிழில் பேசுகிறார் மேன் வெர்சஸ் வைல்டு நிகழ்ச்சியின் நாயகன் பியர் க்ரில்ஸ். இது எப்படி சாத்தியமானது என டிஸ்கவரி சேனலின் தெற்கு ஆசியாபசிபிக் பிராந்தியத்தின் துணைத் தலைவர் ராகுல் ஜோரியிடம் கேட்டதில்...

''டிஸ்கவரி சேனல் உலகின் நம்பர் ஒன் கட்டண சேனலாக இருக்கிறது. உலகின் 220 நாடுகளில் 2.5 பில்லியன் மக்களால் பார்க்கப்படும் இந்த சேனலை அடுத்த கட்டத்துக்கு நகர்த்தும் முனைப்போடுதான் தெற்கு ஆசியாவில் காலடித்தடம் பதித்தது. பார்வையாளர்களின் வசதிக்கேற்ப டி.எல்.சி, அனிமல் பிளானெட், இன்வெஸ்டிகேஷன் டிஸ்கவரி அண்ட் சயின்ஸ், டிஸ்கவரி டர்போ மற்றும் டிஸ்கவரி கிட்ஸ் என சேனல்களைப் பிரித்து அளித்து வந்தோம். தமிழ், தெலுங்கு மற்றும் இந்தியில் முழு முயற்சியாக ஒளிபரப்பலாம் என 2011ல் தொடங்க உத்தேசித்து குறிப்பிட்ட பிராந்தியங்களில் ப்ரைம் டைம் நேரத்தில் மட்டும் ஆங்கிலத்துக்குப் பதில் அந்தந்த மொழிகளில் அளித்து வந்தோம்.

அதற்குக் கிடைத்த வரவேற்பை வைத்து டிஸ்கவரி சேனலை பிராந்திய மொழிகளில் அளிக்க மும்பையிலும் குர்கவானிலும் விசேஷமாக ஸ்டுடியோவை உருவாக்கி ஒளிபரப்பைத் தொடங்கினோம். தமிழில் நாங்கள் எதிர்பார்த்ததைவிட நல்ல வரவேற்பு கிடைத்தது. காரணம் நாங்கள் ஆரம்பத்தில் தீர்மானித்த விஷயம், உலகை அவர்கள் மொழியில் காட்ட வேண்டும் என்பதுதான். உலகின் நம்பர் ஒன் ஆராய்ச்சியாளர் ஸ்டீபன் ஹாக்கிங் பேசும் பிரபஞ்சம் குறித்த பார்வை தமிழில் வந்ததையும் பியர்ல் க்ரில்ஸ் காடு, பாலைவனம், கடல் பிராந்தியத்தில் தமிழ் மொழி பேசித் திரிவதையும் வெகுவாக ரசித்தார்கள். இப்போது, 'ஹவ் டூ தே டூ இட்?’ எனப்படும் அன்றாடம் நாம் பயன்படுத்தப்படும் பொருட்கள் எப்படித் தொழிற்சாலைகளில்தயாரிக்கப்படுகிறது என்ற நிகழ்ச்சிக்கும் ஏக வரவேற்பு. டிஸ்கவரி தமிழ் எங்களுக்கே ஆச்சர்யம் கலந்த சந்தோஷம். அடுத்த கட்டத்துக்கு கொண்டுசெல்லும் விதமாக இன்னும் கூடுதலான புதுப்புது வீடியோக்களை எங்களது பிரத்யேக லைப்ரரிக்கு உலகின் பல பாகங்களில் இருந்தும் தருவிக்கிறோம். அதை மும்பையில் இருக்கும் எங்கள் ஸ்டுடியோவில் அழகான தமிழில் தர மெனக்கெடுகிறோம். டப்பிங் ஆர்ட்டிஸ்ட்கள், ஸ்க்ரிப்ட் ரைட்டர்கள் எல்லோரும் பல கட்டத் தேர்வுக்கு உட்படுத்தப்பட்டு தேர்ந்தெடுக்கப்படுகிறார்கள். சில நேரங்களில் அவுட் சோர்ஸிங் முறையில் ஆட்களை வைத்து மொழியாக்கம் செய்கிறோம். சென்னைக்கு வராமலே சென்னையைத் தொடாமலே மொழி மாற்றம் இப்படித்தான் சாத்தியமாகிறது. சென்னையில் இருந்தும்கூட ஸ்கைப் வழியாக சமயங்களில் டப்பிங் செய்து வாங்கிய சம்பவங்கள் முன்பு நடந்தன.

எங்கள் நிகழ்ச்சிகள் ரிப்பீட் ஆனால், தமிழ் ரசிகர்கள் சேனல் மாற்றி விடுவார்கள் என்பது நன்கு தெரியும். அதேபோல பிடித்துப்போனால் அவர்களை எந்த சக்தியாலும் ரிமோட்டிலிருந்து மாற்ற முடியாது என்றும் நம்புகிறோம். அண்மையில் இந்திய அம்சங்களோடு பல நிகழ்ச்சிகளைத் தமிழில் வழங்கியதற்கு நல்ல ஆதரவு. 'காஷ்மீர்: லைன் ஆஃப் கன்ட்ரோல்’ மற்றும் 'எப்படி இந்தியாவில் தேர்தல் நடத்தப்பட்டது?’ என்ற இரண்டு நிகழ்ச்சிகளும் வரவேற்பைப் பெற்றதால் அடுத்து என்ன மாதிரியான நிகழ்ச்சிகளை இந்திய ரசிகர்களுக்காகத் தரலாம் என யோசித்து வருகிறோம்'' என்கிறார் உற்சாகமாக!

நன்றி:டைம்பாஸ்

மலேசியாவில் அஸ்ட்ரோவில் ஒளிபரப்பாகும் Nat Geo Wild சேனலில் ஆங்கிலம், தமிழ், சீனம், மலாய் மொழிகளில் எதை வேண்டுமானாலும் தேர்ந்தெடுத்துக் கொள்ளும் வாய்ப்பை வழங்கியுள்ளார்கள்!

இதில் வரும் தமிழ் இந்தியாவில் மொழிபெயர்க்கப்பட்டது தான்! ஒருவேளை இவர்களது நிகழ்ச்சியை வாங்கி இங்கு ஒளிபரப்புகிறார்கள் என நினைக்கிறேன்!