பாலியல் தொழிலுக்கு சட்டப்பூர்வ அங்கீகாரம் கூடாது: மகளிர் அமைப்புகள் கடும் எதிர்ப்பு

புதுடில்லி: 'பாலியல் தொழிலை சட்டப்பூர்வ தொழிலாக அங்கீகரித்து விடலாம்' என, தேசிய மகளிர் ஆணையத்தின் தலைவர், லலிதா குமாரமங்கலம், சமீபத்தில் கருத்து தெரிவித்த நிலையில், மகளிர் அமைப்புகள் அதற்கு எதிர்ப்பு தெரிவித்துள்ளன.

பெண்கள் பாதிப்பு:

பாலியல் தொழிலில் ஈடுபடுவது சட்ட விரோதம்; அது, தண்டனைக்குரிய குற்றம். இதனால், அந்த தொழிலில் மறைமுகமாக ஈடுபடுவோர், போலீஸ் மற்றும் பிற துறையினரால் துன்புறுத்தலுக்கு ஆளாகுகின்றனர்; இதனால், அப்பாவி பெண்கள் பாதிக்கப்பட்டுள்ளனர்.அவர்களின் நலனை கருத்தில் கொண்டு, பாலியல்தை சட்டப்பூர்வ தொழிலாக அறிவித்து விடலாம் என, தேசிய மகளிர் ஆணையத்தின் தலைவர், தமிழகத்தை சேர்ந்த லலிதா குமாரமங்கலம், சமீபத்தில் கருத்து தெரிவித்திருந்தார்.

இந்நிலையில், பாலியல் தொழிலை சட்டப்பூர்வ தொழிலாக அங்கீகரிக்கலாமா என்பது குறித்து முடிவெடுக்கக் கோரி, மூன்றாண்டுகளுக்கு முன், சுப்ரீம் கோர்ட்டில் தொடரப்பட்ட வழக்கில், சுப்ரீம் கோர்ட், ஒரு கமிட்டியை அமைத்துள்ளது.அந்த கமிட்டி, அனைத்து தரப்பினரிடமும் கருத்து கேட்டு வருகிறது. அதில், வரும் 8ம் தேதி, மகளிர் தேசிய கமிஷன், தன் தரப்பு கருத்தை வைக்க உள்ளது. அதில், பாலியல் தொழிலை சட்டப்பூர்வ தொழிலாக அங்கீகரிக்கலாம் என, தெரிவிக்க உள்ளது. அந்த குழு அளிக்கும் பரிந்துரையை ஆராயும் சுப்ரீம் கோர்ட், இதற்கான உத்தரவை பின்னர் வெளியிட உள்ளது.

இந்நிலையில், பெண்கள் நல அமைப்புகள், மகளிர் ஆணையத்தின் முடிவுக்கு எதிர்ப்பு தெரிவித்துள்ளன.

ஏ.ஐ.பி.டபிள்யு.ஏ., என்ற அமைப்பின் தலைவி, கவிதா கிருஷ்ணன் கூறும் போது, ''பாலியல் தொழிலை சட்டப்பூர்வமான தொழில் என அங்கீகரிக்கப்பட்டால், அதில் ஈடுபடுவது தவறில்லை என்ற மனநிலை பெண்களுக்கு ஏற்பட்டு விடும்; எனவே, அந்த உத்தரவை கவனமாக வெளியிட வேண்டும். பாலியல் தொழிலில் ஈடுபட்டுள்ள பெண்களுக்கு மட்டும், அந்த அங்கீகாரம் பாதுகாப்பு அளிக்க வேண்டும்,'' என்றார்.

கொடுமை:

அது போல, சி.எஸ்.ஆர்., என்ற அமைப்பின் தலைவி, ரஞ்சனா குமாரி, ''பாலியல் தொழிலுக்கு அங்கீகாரம் அளித்தால், தொழிலாளர் சட்டங்களில் திருத்தம் செய்ய வேண்டும். நேர்மையான, கண்ணியமான தொழில்கள் தான், தொழில்களாக கருதப்படும். இது போன்ற கொடுமைகளுக்கு, தொழில் என்ற அந்தஸ்து வழங்கப்பட்டால், நாட்டின் மொத்த உள்நாட்டு உற்பத்தியை கணக்கிடும் போது, பாலியல் தொழில் மூலம் கிடைக்கும் வருமானமும் கணக்கில் எடுத்துக் கொள்ளப்படுமா என்பதை அரசு விளக்க வேண்டும்,'' என்றார்.

மகிழ்ச்சி இல்லை:

சக்தி வாஹினி என்ற அமைப்பின் நிர்வாகி, ரவி காந்த் கூறும் போது, ''பாலியல் தொழிலில் ஈடுபடும் பெண்கள், அதை மகிழ்ச்சியாக செய்வதில்லை; ஏதாவது ஒரு நிர்பந்தத்தால் அவ்வாறு செய்கின்றனர். அத்தகையவர்கள், போலீஸ் மற்றும் பிற துறையினரின் கெடுபிடிகளுக்கு ஆளாகும் போது, தங்கள் தொழிலும் சட்டப்பூர்வமாக அறிவிக்கப்பட வேண்டும் என விரும்புகின்றனர். அவர்கள் ஒரு போதும், இந்த மோசமான தொழிலுக்கு சட்டப்பூர்வ அங்கீகாரம் வேண்டும் என விரும்புவதில்லை,'' என்றார்.

மதுபான கடைகளுக்கு சட்ட அங்கீகாரம் கொடுத்திருப்பதை விட பாலியல் தொழிலுக்கு சட்ட அங்கீகாரம் கொடுப்பது ஒன்றும் கெடுதலானது இல்லையே.