பெண் குற்றவாளி ...!! -Mano Red

by Mano Red Sun Nov 02, 2014 8:29 am

ஆமா,
ஏதோ ஒன்னு நெனச்சா
ஏதோ ஒன்னு நடக்குது,
நடந்த ஒன்ன நெனச்சா
நெஞ்சுல உசுரு இல்ல,
இறைவன் இருக்கையில
யார குத்தம் சொல்ல..?

ஊற வச்ச அரிசி போல
ஈரமாத்தான் மனசிருக்கு,
பக்குவம் தான் இன்னும் வரல
பாசம் வைக்க ஆச இருக்கு,
பழச நெனச்சு என்ன செய்ய
எல்லாமே முடிஞ்சுருச்சு..!!

பாவிப்பய அவனுக்கு
சூடு சொரண ஏதுமில்ல,
வெக்கங்கெட்ட அவனுக்கு
வேலவெட்டி ஒன்னுமில்ல,
குடிக்க மட்டும் காசு கேப்பான்
தர மறுத்தா சூடு வைப்பான்..!!

குடிகார புருசனுக்கு
குடும்பம் ஒரு கேடு,
குடிக்க அவன் கேட்டது
குடியிருந்த ஒரு வீடு,
சொல்லி சொல்லி
அலுத்துப் போச்சு,
சொத்தெல்லாம்
அடகுல அழிஞ்சு போச்சு...!!

போனா போகுதுன்னு
தாலி வித்து
தண்ணி அடிக்க
காசு கொடுத்தேன்,
திருட்டுப் பய அவன்
பெத்த புள்ளய வித்து
காசு பாக்க பொறப்பட்டானே....!!

பூவுக்கும் பொட்டுக்கும்
ஆசப்பட்டா
புள்ள உசுரு போயிருக்குமே,
தாய்ப்பாசம் தடுத்துருச்சு
தாலியும் விழுந்துருச்சு,
அவன் கழுத்த அறுத்து
புள்ள அழுகும் போது
புருசன் தல கவுந்துடுச்சு...!!

எனக்கொன்னும் கவல இல்ல
காலத்த கழிச்சுடுவேன்,
ஜெயிலு கம்பி எண்ணி
ஜென்மத்த முடிச்சுடுவேன்,
என் கவல ஒன்னுதான்
புள்ள வளந்தா என்னாகுமோ
அப்பன போல தப்பாகுமோ..??

பெண் குற்றவாளி ...!! -Mano Red TbWBgaqNThyf9EQFInDy+womens_prison_14