கைகொடுத்த தென்மேற்கு பருவமழையால் தமிழகம்... தப்பியது !

கைகொடுத்த தென்மேற்கு பருவமழையால் தமிழகம்... தப்பியது இயல்பான அளவுக்கு பெய்ததால் நீங்கியது வறட்சி !



சென்னை :தென்மேற்கு பருவமழையால் அதிகபட்சமாக தமிழகம் உள்ளிட்ட தென் மாநிலங்களை உள்ளடக்கிய தெற்கு தீபகற்ப பகுதியில் 93 சதவீதம் (66.5 செ.மீ.) மழை கிடைத்துள்ளது.
கிட்டத்தட்ட இயல்பான அளவுக்கு மழை பொழிவு இருந்ததால் வறட்சியின் பிடியில் இருந்து தமிழகம் தப்பியது.ஆண்டு தோறும் ஜூன் முதல் செப்டம்பர் இறுதி வரை தென்மேற்கு பருவமழை காலம். இந்த காலகட்டத்தில் தமிழகத்திற்கு குறைந்த அளவே மழை கிடைக்கும்.அதேநேரத்தில் நாட்டின் பிற பகுதிகள் அதிகளவு மழையை பெறுகின்றன.
நாடு முழுவதும் இந்த காலகட்டத்தில் ஆண்டு சராசரியான 88 செ.மீ. மழையில் 88 சதவீத மழை கிடைக்கும்.இந்த ஆண்டும் அந்த அளவு தப்பவில்லை. செப்டம்பர் வரை முடிந்த பருவமழை கால நாட்காட்டி அளவில் 78 செ.மீ. அதாவது 88 சதவீத மழை கிடைத்துள்ளது.
மேலும் பகுதி அளவில் நோக்கும் போது தெற்கு தீபகற்பத்தில் அதிகபட்சமாக 93 சதவீதம் (66 செ.மீ.) மழை பெய்துள்ளது. அடுத்த இடத்தில் மத்திய பகுதி 90 (88 செ.மீ.); வடகிழக்கு 88 (127 செ.மீ.); வடமேற்கு 79 சதவீதம் (48 செ.மீ.) மழை கிடைத்துள்ளது.கடந்த இரண்டு ஆண்டுகளாக தமிழகத்தில் மழை பொழிவு போதுமான அளவு இல்லை.
சென்னை தவிர அனைத்து மாவட்டங்களும் வறட்சி மாவட்டங்கள் என அறிவிக்க வேண்டிய நிலை ஏற்பட்டது. தென் மேற்கு பருவமழை கைகொடுத்ததால் இந்த ஆண்டு வறட்சியின் பிடியில் இருந்து தமிழகம் தப்பியுள்ளது. வடகிழக்கு பருவமழையும் போதுமான அளவு பெய்தால் அடுத்த ஆண்டு குடிநீர் பிரச்னையும் இருக்காது.தென்மேற்கு பருவமழை கால நிகழ்வுகள்:
நாடு முழுவதும் உள்ள 36 வானிலை உட்கோட்டங்களில் நாட்டின் 67 சதவீத பகுதிகளை உள்ளடக்கிய 23 கோட்டங்கள் இயல்பளவு மழையையும்; 30 சதவீத பகுதிகளை உள்ளடக்கிய 12 கோட்டங்கள் பற்றாக்குறை மழையையும்; 3 சதவீத பகுதிகளை உள்ளடக்கிய தெற்கு உள் கர்நாடகாவில் உள்ள ஒரு கோட்டம் அதிக மழையையும் பெற்றுள்ளன.தென்மேற்கு பருவமழை காலம் அந்தமான் கடல் பகுதிகளில் வழக்கமான மே 20ம் தேதிக்கு இரு தினங்களுக்கு முன் துவங்கினாலும் கேரளா வில் ஜூன் 1ம் தேதிக்கு பதில் ஐந்து நாள் தாமதமாக நிலை பெற்றது.நாடு முழுவதும் இரண்டு நாள் தாமதமாக ஜூலை 17ம் தேதி நிலை பெற்றது.ஜூன் முதல் செப்டம்பர் வரை 'நாநவுக்' புயல்; இரண்டு காற்றழுத்த தாழ்வு மண்டலங்கள்; 10 காற்றழுத்த தாழ்வு பகுதிகள் உருவாகியுள்ளன. வழக்கமாக இந்த காலத்தில் 6 காற்றழுத்த தாழ்வு மண்டலங்கள் 6 காற்றழுத்த தாழ்வு பகுதிகள் உருவாகும்.
' ஹுட் ஹுட்' எந்த சீசன்!
மாத கணக்குப்படி, செப்டம்பருடன் தென்மேற்கு பருவமழை காலம் முடிந்துவிட்டது. ஆனால், அந்த சீசன் தற்போது வரை நீடிக்கிறது.வடகிழக்கு பருவமழை காலம், அக்டோபரில் துவங்கினாலும், பருவமழை அதற்குரிய நிகழ்வுகளின் போதே அறிவிக்கப்படுகிறது.இந்நிலையில், சமீபத்தில் உருவாகி, விசாகப்பட்டினத்தை தாக்கிய, ' ஹுட் ஹுட்' புயல் எந்த காலகட்டத்தைச் சேர்ந்தது என்ற சந்தேகம் எழுகிறது.
இதற்கு பதிலளித்த, சென்னை வானிலை ஆய்வு மைய இயக்குனர் ரமணன் கூறுகையில்,'' இந்த புயல் அக்டோபரில் உருவாகிய போதும், தென்மேற்கு பருவமழை சீசன் முடியாததால், ' ஹுட் ஹுட்' புயலும், இதில் தான் அடங்கும். ஆனால், இதன் மூலம் கிடைத்த மழை, வடகிழக்கு பருவமழை கணக்கில் வரும்,'' என்றார்.

தினமலர்

திருக்கார்த்திகை வரை மழை எதிர்பார்க்கலாம்...
-

எப்படியோ இயற்கை மக்களை கை விடவில்லை, மனிதன்தான் இயற்கையின் கையை வெட்டுகிறான்.