தண்ணி காட்டிய ஷாஜி... கண்ணி வைத்த காவல்துறை! தாய்லாந்து டு தாய்நாடு

'எழும்பூரில் அரசு குழந்தைகள் நல மருத்துவமனை அருகில் நடைபாதையில் தூங்கிய குடும்பத்தினர் மீது கடந்த 22-ம் தேதி நள்​ளிரவில் காரை ஏற்றியதில் முனிராஜ் என்ற 13 வயதுச் சிறுவன் பரிதாபமாக இறந்தான்.; நான்கு பேருக்கு பலத்தகாயம். 'வேகமாகக் காரை ஓட்டியதால் விபரீதம்’ என்றுதான் முதலில் தகவல் வெளியானது. போக்குவரத்து போலீஸாரும் அப்படித்தான் வழக்குப்பதிவு செய்திருந்தனர்.

ஆனால், தொழில் அதிபர் புருஷோத்​தமனின் மகன் ஷாஜி தாறுமாறாகக் காரை ஓட்டிச் சென்றதே இந்தக் கோர விபத்​துக்குக் காரணம் என்பது போலீஸ் உயர் அதிகாரிகளுக்குத் தெரியவந்த பிறகு, வழக்கில் சூடு பிடித்தது. கொலை வழக்குக்கு இணையான 304 (2) என்ற கடுமையான சட்டப் பிரிவில் வழக்குப் பதிவுசெய்யப்பட்டது. இதை அறிந்த ஷாஜி வெளிநாட்டுக்குத் தப்பிச்சென்றார். அவரது முன்ஜாமின் மனுக்களும் தள்ளுபடிசெய்யப்பட்டன. இது பற்றி கடந்த 5-6-13 தேதியிட்ட இதழில் விரிவாக எழுதியுள்ளோம்.

இந்த நிலையில், ஷாஜியுடன் காரில் சென்ற குமார், அன்வர், அனிஸ்ராவ் ஆகியோர் போலீஸாரிடம் சிக்கினர். புழல் சிறையில் அடைக்கப்பட்டுள்ள இவர்களுக்கு இன்னும் ஜாமின் கிடைக்கவில்லை. 20 நாட்களாக போலீஸுக்குத் தண்ணி காட்டிக்கொண்டிருந்த ஷாஜியைப் பிடிக்க போலீஸார் மேற்கொண்ட முயற்சிக்குப் பலன் கிடைக்கவில்லை. இந்த நிலையில், அவரைத் தேடப்படும் குற்றவாளியாக அறிவிக்கக் கோரி, நீதிமன்றத்தை நாடியது காவல் துறை.

எழும்பூர் பெருநகர மாஜிஸ்திரேட் எல்.ஆபிரகாம் லிங்கன், 'கார் விபத்து வழக்கில் ஷாஜி தேடப்படும் குற்றவாளி’ என கடந்த 12-ம் தேதி அறிவித்தார். 'மே 19-ம் தேதி காலை 10 மணிக்குள் ஷாஜியை கோர்ட்டில் ஆஜர்படுத்த வேண்டும்’ என்றும் அவர் உத்தரவிட்டார். இதையடுத்து, தாய்லாந்தில் தலைமறைவாக இருந்த ஷாஜியைக் கைதுசெய்ய சர்வதேச போலீஸ் உதவியை நாட சென்னை போலீஸார் சட்டரீதியான நடவடிக்கையில் இறங்கினர்.

இந்த நிலையில், ஷாஜியின் தந்தை புருஷோத்தமன், வழக்கை விசாரிக்கும் அண்ணா நகர் போலீஸ் உயர் அதிகாரிகளைக் கடந்த வாரம் சந்தித்து, ''சிறுவன் முனிராஜ் இறந்த விபத்துகுறித்து நாங்கள் மிகவும் கவலை அடைந்துள்ளோம். விபத்தில் பாதிக்கப்பட்ட குழந்தைகள் குணமடைய அனைத்து உதவிகளையும் செய்துள்ளேன். எனது மகனை உடனே சரணடையச் சொல்கிறேன்'' என்று அதிர்ச்சியாகக் கூறினாராம்.

ஷாஜி, மே 13-ம் தேதி தாய்லாந்தில் இருந்து விமானத்தில் கொச்சி வந்தார். சரண் அடைவதற்கு முன்னதாக அவரைக் கைதுசெய்ய நினைத்தது போலீஸ். ஷாஜியின் செல்போன் நடவடிக்கைகளைக் கண்காணித்துவந்த போலீஸார், அவர் கொச்சி வருவதை அறிந்து அங்கேயே கைதுசெய்தனர்.

பாதிக்கப்பட்ட குடும்பத்துக்கு இறுதி வரை நீதி கிடைக்க வேண்டும். இதே வேகத்தைதான் எல்லா வழக்குகளிலும் எதிர்பார்க்கிறோம்.

- எஸ்.முத்துகிருஷ்ணன்
விகடன்.காம்

சல்மான் கான் இன்னும் வெளியில் தானே இருக்கிறார்

இதே குற்றம் தான் - இவர்களை என்று உள்ளே வைப்பார்களோ தெரியவில்லை?

விஐபி கள் செய்யும் குற்றத்திற்குதான் உடனடி தண்டணை கிடைக்க வேண்டும்....
விஐபி கள் செய்த நல்லது ரீச் ஆவது போல் அவர்கள் பெற்ற தண்டணையும் ரீச் ஆகும்...
தவறிழைப்பவர்களுக்கு பயமிருக்கும்...