"சர்க்கரை நோயாளிகள் 3 மாதங்களுக்கு ஒரு முறை கண் பரிசோதனை செய்வது அவசியம்'

by **ayyasamy ram** Fri Oct 10, 2014 6:18 am

-
சர்க்கரை நோயாளிகள் மூன்று மாதங்களுக்கு ஒரு முறை
தங்கள் கண்களைப் பரிசோதித்துக் கொள்ள வேண்டியது
அவசியம் என, எழும்பூர் அரசு கண் மருத்துவமனையின்
இயக்குநர் டாக்டர் நமிதா புவனேஸ்வரி தெரிவித்தார்.

உலக கண் பார்வை தினத்தை முன்னிட்டு சர்க்கரை
நோயாளிகளுக்கான பார்வை இழப்பு குறித்த விழிப்புணர்வு
நிகழ்ச்சி சென்னை மருத்துவக் கல்லூரியில் வியாழக்கிழமை
நடைபெற்றது.

நிகழ்ச்சியில் டாக்டர் நமிதா புவனேஸ்வரி பேசியது:

சர்க்கரை நோயாளிகளுக்கு கண்களில் உள்ள ரத்த
நாளங்களில் பாதிப்பு ஏற்படுதல், விழித்திரை பாதிக்கப்படுதல்,
ரத்தக் கசிவு ஆகிய காரணங்களால் பார்வை பாதிப்பு ஏற்படலாம்.

மங்கலான பார்வை, பார்க்கும்போது கரும் புள்ளிகள்,
கருப்புக் கோடுகள் தெரிதல், திடீர் பார்வைக் குறைவு
இவை அனைத்தும் சர்க்கரை நோயாளிகளுக்கு கண்களில்
பார்வைக் குறைபாடு ஏற்பட்டுள்ளதற்கான அறிகுறிகள் ஆகும்.
சர்க்கரை நோயாளிகள் மற்ற உறுப்புகளைப் போன்றே
கண்களையும் மிக கவனமாகப் பராமரிக்க வேண்டும்.

3 மாதங்களுக்கு ஒரு முறை கண்களைப் பரிசோதிப்பதன்
மூலம் இந்தப் பிரச்னைகளை ஆரம்ப நிலையிலேயே
கண்டறியலாம். ஆரம்ப நிலையில் கண்டறிந்தால் இந்தப்
பிரச்னைகளை எளிதில் குணமாக்கலாம். அறிகுறிகள் தென்
பட்டால் அவற்றை அலட்சியப்படுத்தாமல் உடனே மருத்துவரை
அணுக வேண்டும் என்று அவர் தெரிவித்தார்.
-
----------------------------------
--தினமணி