உடல் நலத்தின் மீது அக்கறையால் சைக்கிள் விற்பனை சூடுபிடிக்கிறது !

புதுடெல்லி: உலகம் முழுவதிலும் உடல் பருமன் பெரும் அச்சத்தை ஏற்படுத்தியுள்ளது. நவீன வாழ்க்கைக்கு ஏற்ப உணவு பழக்கவழக்கங்களும் மாறியதால், உடல் பருமனுக்கு ஆளாவோர் எண்ணிக்கையும் அதிகரித்து வருகிறது. இது நோய்களுக்கு வாயிலாக இருக்கிறது. எனவே, உடல் நலத்தின் மீதான அக்கறை அதிகரிப்பு காரணமாக, கட்டுக்கோப்பாக உடலை வைப்பதற்கும், கொழுப்பு சதையை கரைக்கவம் உணவு கட்டுப்பாடு மற்றும் பயிற்சிகளில் ஈடுபட்டு வருகின்றனர். சைக்கிள் ஓட்டுவதால் உடல் பருமன் குறையும் என்பதால், சைக்கிளுக்கு மவுசு அதிகரித்து வருகிறது.சைக்கிள் உற்பத்தியாளர்கள் ஒவ்வொரு ஆண்டும் சுமார் 1.5 கோடி சைக்கிள்களை தயாரித்து விற்பனைக்கு அனுப்புகின்றனர். இவற்றில் 60 சதவீத சைக்கிள்கள் சாதாரண மாடலாகவும், 40 சதவீதம் பிரிமியம் ரக சைக்கிள்களாகவும் உள்ளன. பிரிமியம் ரக சைக்கிள்கள் 8,000, 12,000 என அதிக விலை கொண்டவை. இவற்றை அதிக வருவாய் பிரிவினர் விரும்பி வாங்க தொடங்கியுள்ளனர். இதுதவிர, கவர்ச்சிகரமான வடிவமைப்பு காரணமாக சிறுவர்கள், இளைஞர்கள் மத்தியிலும் இத்தகைய சைக்கிள்கள் வரவேற்பு பெறுகின்றன.

இதனால் சாதாரண சைக்கிள்கள் விற்பனை ஓராண்டில் 3% முதல் 5 % வரை சரிந்துள்ளது. சாதாரண சைக்கிள்கள் பெரும்பா லும் அரசின் இலவச திட்டங்களுக்காகவே வாங்கப்படுகின்றன என்று சைக்கிள் உற்பத்தியாளர்கள் சிலர் தெரிவிக்கின்றனர். சைக்கிள் தயாரிப்பு நிறுவன அதிகாரி ஒருவர் கூறுகையில், ‘‘சைக்கிள் சந்தையின் ஒட்டுமொத்த விற்பனை சரிந்திருந்தாலும், மக்கள் சாதாரண சைக்கிள்களில் இருந்து நவீன மாடல்களில் வரும் பிரிமியம் சைக்கிள்களுக்கு மாறத்தொடங்கி விட்டனர். இவ்வாறு நவீன மாடல் சைக்கிள்களை கட்டுக்கோப் பான உடலை விரும்புவோர், சிறுவர்கள் என இரண்டு பிரிவினர் விரும்புகின்றனர்’’ என்றார்.

மற்றொரு உற்பத்தியாளர் கூறுகையில், ‘‘ஒரு காலத்தில் சைக்கிள் என்பது அன்றாட வேலைக்கு பயன்படுத்தப்பட்டு வந்தது. ஆனால், இன்று சைக்கிள் வாங்குவோரின் நோக்கம் வேலைக்கு செல்வதற்கு அல்லாமல் உடற்பயிற்சிக்காக என்பதே பிரதானமாக உள்ளது’’ என்றார். பிரபல சைக்கிள் நிறுவன இயக்குனர் கூறுகையில், ‘‘12 ஆண்டுகளுக்கு முன்பு நாள் ஒன்றுக்கு 100 சைக்கிள்கள் தயாரித்தோம். இதில் 70 சாதாரண சைக்கிள்கள், 30 சாதாரண சைக்கிள்கள். இன்று நாள் ஒன்றுக்கு 3,000 சைக்கிள்கள் தயாரிக்கிறோம். இதில் 70 சதவீதம் பிரிமியம் ரக பேன்சி சைக்கிள்கள்தான்’’ என்றார்.

நன்றி : தினகரன்

ஏதோ ஹெல்தி யாக இருந்தால் சரி இங்கு பெங்களூரில், இன்போசிஸ் இல் அவர்களின் campus உள்ளே இன்னும் அங்கும் போய் வருவதற்காக சைக்கிள் தான் பயன் படுத்துகிறார்கள்.