வழக்கிலிருந்து ஜெயலலிதா மீண்டு வருவார்: காங்கிரஸ் எம்.பி.கண்ணன்

by **ayyasamy ram** Tue Sep 30, 2014 6:37 am

-
சொத்துக் குவிப்பு வழக்கில் இருந்து அதிமுக பொதுச் செயலாளர் ஜெயலலிதா மீண்டு வருவார் என்று காங்கிரஸ் மாநிலங்களவை உறுப்பினர் பி.கண்ணன் கூறினார்.

இதுகுறித்து, புதுச்சேரியில் செய்தியாளர்களிடம் திங்கள்கிழமை அவர் கூறியது:

சொத்துக் குவிப்பு வழக்கில் அதிமுக பொதுச் செயலாளர் ஜெயலலிதாவுக்கு 4 ஆண்டுகள் சிறைத் தண்டனை விதிக்கப்பட்டுள்ளது. நீதிமன்றத்தின் தீர்ப்பை நான் விமர்சிக்க விரும்பவில்லை.

ஆனால், இத்தீர்ப்பால் அவருக்கு மக்களிடம் அனுதாபமும், ஆதரவும் பெருகி உள்ளது. இச்சூழலில் அதிமுக தொண்டர்கள் அப்பாவி மக்களுக்கு எவ்விதத் தொந்தரவும் தரக் கூடாது. அப்படி செய்தால், அது அரசியல் எதிரிகளுக்குத் தான் லாபம்.

நான் அதிமுகவில் இணைவதற்காக அவரை ஆதரித்துப் பேசவில்லை. நான் நியாயத்தைத்தான் பேசுவேன். கட்சி மாறுகிற பழக்கம் எனக்கில்லை.
-

ஜெயலலிதாவுக்கு தார்மிக ஆதரவு: வழக்கு நிலை எப்படி இருந்தாலும் ஜெயலலிதாவுக்கு எனது தார்மிக ஆதரவு உண்டு. அவசியம் ஏற்பட்டால் ஜெயலலிதாவை எப்போது வேண்டுமானாலும் சந்திப்பேன்.

நான் தான் காங்கிரஸ்: நான் இன்றும் காங்கிரஸ் கட்சியில்தான் உள்ளேன். நான் இருக்கும் இடம்தான் காங்கிரஸ். 2ஜி ஊழல், ஊழல் அல்ல; பெரும் கொள்ளை. இதுபோன்ற ஊழல் உலகில் வேறெங்கும் நடந்திருக்க முடியாது. மத்திய பாஜக அரசு, சிபிஐ, அனைத்துத் துறைகளும் சரியாக நடவடிக்கை எடுத்தால் பல பேர் சிறைக்குச் செல்வர்.

இந்த ஊழலில் மன்மோகனை கருவியாகப் பயன்படுத்தியுள்ளனர். அவர் நேர்மையான மனிதர். இதில் சம்பந்தப்பட்டவர்களின் பெயர்களை காலம் வரும்போது சொல்வேன். விரைவில் நான் மோடியையும் சந்தித்துப் பேசுவேன் என்றார் கண்ணன்.