நன்றி கூலியோ..??

Bknaginikaruppasamy · Bknaginikaruppasamy Thu Sep 25, 2014 3:28 pm

நன்றி கூலியோ??

நாளெல்லாம் கால் கடுக்க நின்று
வயலில் இறங்கி
முதுகெலும்பு முறிய வளைந்து
குனிந்து நாற்று நட்டு
களை பறித்து
நெல் கதிர் அறுத்து
கட்டுக்களாய் கட்டி தலையில் சுமந்து
நெல் அடிக்கும் இடத்தில் குவித்து
அடிபட்டு கதிரிலிருந்து பிரிந்த நெல்மணிகளை
அள்ளி அளந்து சாக்குப்பையில்
கொட்டி குவித்து மூட்டைகளாக்கி
மூட்டை தனை தைத்து
பாரம் சுமந்து வண்டியில் ஏற்றி
வியாபாரத்திற்கு வழி அனுப்பும்
உழைப்பாளியின் சொற்ப கூலி பற்றி
பேச நான் வரவில்லை!!

உழைத்துக் களைத்த உழைப்பாளி
தன் வயிறு நிரப்ப....
கால் கடுக்க வரிசையில் நின்று
மலிவு விலை எனும் பெயரில்
புழுத்த வாடையுடன்
புழு மலிந்து நெளியும்
அரிசி தனை வாங்கி உண்ணும் அவலம் தான்
உடல் உழைப்பிற்கு காட்டும்
நன்றி கூலியோ??
யோசிக்க வேண்டிய விஷயம் என
யோசிக்க யாசிக்கிறேன்!!

---- நாகினி