சீனாவின் பியோனி பியூட்டி!

சமீபத்தில் இந்தியாவில் சுற்றுப்பயணம் மேற்கொண்ட சீன அதிபர் ஜி ஜின்பிங் பற்றிய செய்திகள் தேசிய சென்சேஷன். ஆனால், சீனாவில் ஜின்பிங்கின் மனைவி பெங் லியுயான்தான் செம செலிபிரட்டி. ஜி ஜின்பிங் சீனாவின் அதிபராகத் தேர்ந்தெடுக்கப்படும் சூழல் கனிந்தபோது அத்தனை வெளிநாட்டுப் பத்திரிகைகளும், 'சீனாவின் அடுத்த அதிபர் ஜி ஜின்பிங். யார் இந்த ஜின்பிங்? பாடகி பெங் லியுயானின் கணவர்!’ என்றே உலகத்துக்கு அவரை அறிமுகப்படுத்தின. அந்த அளவுக்கு சீனர்களிடையே பெங் லியுயானுக்குச் செல்ல செல்வாக்கு!

சீனாவில் அனைவருக்கும் ராணுவப் பயிற்சி கட்டாயம். 18 வயதில் சீன ராணுவத்தின் பெண்கள் படைப் பிரிவில் சேர்ந்தார் பெங். சீன ராணுவம் நாட்டைச் சுற்றியுள்ள முக்கிய எல்லைகளில் சுற்றுப்பயணம் மேற்கொண்டு பாதுகாப்பை உறுதிப்படுத்தும் (அப்படிச் சொல்லிக்கொண்டு அண்டைநாட்டு எல்லைக்குள் அத்துமீறவும் செய்யும்)! அப்படி ஒரு மிலிட்டரி டூரின்போது, சக வீரர்களை மகிழ்விக்க பாட்டுப் பாடியதில் ராணுவ வட்டாரத்தில் பிரபலம் ஆனார் பெங்.

நம்ம ஆக்ஷன் ஹீரோ அர்ஜுனுக்கு இந்தியா எவ்வளவு பிடிக்குமோ, அதைவிட பெங்கிற்கு சீனாவைப் பிடிக்கும். சீனா-வியட்நாம் போரின்போது வீரர்களை உற்சாகப்படுத்தவும், எழுச்சியூட்டவும் போர்க்களத்துக்கே சென்று பாட்டுப் பாடினார் பெங். இதற்கிடையில் சீன தேசியத் தொலைகாட்சியில் பெங்கிற்கு பாடல் பாட வாய்ப்புக் கிடைக்க, 'பொண்ணு பின்னுதேப்பா’ என மொத்த சீனர்களும் சிலிர்த்தனர். பேரும் புகழுமாக ராணுவத்தில் படிப்படியாக முன்னேறி, மேஜராகப் பதவி உயர்வு பெற்றார் பெங்.

ஜி ஜின்பிங்கின் முதல் திருமணம் விவாகரத்து ஆகியிருந்த நிலையில், 1986-ல் பெங் லியுயானுடன் ஏற்பட்ட பழக்கம் காதலாக மலர, கல்யாணமும் நடந்தது. தங்கள் மனம் கவர்ந்த ஹீரோயின் கல்யாணம் முடித்ததும், அவரை டெலீட்டிவிட்டு அடுத்த ஹீரோயினுக்கு 'ஃபேன் ரெக்வஸ்ட்’ கொடுக்கும் 'இந்திய ரசிகன் மனப்பான்மை’ சீனர்களுக்கு இல்லை. திருமணத்துக்குப் பிறகும் பெங்கிற்கு அமோக ஆதரவுதான் சீனாவில். அவரை சீனாவின் அழகான பூக்களில் ஒன்றான பியோனியுடன் ஒப்பிட்டு, 'பியோனி பியூட்டி’ எனக் கொண்டாடினார்கள். தேசபக்திப் பாடல்கள் பாடிக்கொண்டிருந்த பெங், சீன நாட்டுப்புறப் பாடல்களையும் பாடத் தொடங்க, சீனாவின் சந்துபொந்துகளில் எல்லாம் பிரபலம் ஆனார். ஒருகட்டத்தில் பெங்கின் பாடல் இன்றி எந்தப் பெரிய நிகழ்ச்சியும் நடக்காது எனும் அளவுக்கு, சீனாவின் சென்சேஷன் பியூட்டி ஆனார்.



2013-ல் சீனாவின் அதிபராக ஜின்பிங் தேர்வுபெற்றார். அதன் பிறகு தம்பதி சமேதராகச் செல்லும்போது தன் கணவரைக் காட்டிலும் தன் மீதே ஊடக வெளிச்சம் பொழிவதைப் பார்த்து, அவரோடு செல்வதையே தவிர்க்கத் தொடங்கினார் பெங். எனினும் 'தம்பதி சமேதராக வாங்க...’ என்று அழைப்பு வரும்போது கணவரோடு சென்று கலந்துகொள்வார். ஆனால், அப்போது ஜின்பிங் படத்தை வெட்டிவிட்டு, பெங் படத்தை மட்டுமே பிரசுரித்தன பத்திரிகைகள். மாடலிங்கில் அசத்தும் பெங், 'பெர்ஃபெக்ட் ஃபிட்’ ஆடைகள் மூலம், உலகின் மாடலிங் பத்திரிகைகள் பெரும்பாலானவற்றில் இடம்பிடித்தார். அமெரிக்காவின் மிச்சேல் ஒபாமாவுக்கு அடுத்து 'உலகில் அதிமானோரால் விரும்பப்படும் அரசியல் தலைவர் வீட்டுப் பெண்’ என்ற அந்தஸ்து பெங் வசம். ஃபோர்ப்ஸ் வெளியிட்ட உலகின் சக்திவாய்ந்த 100 பெண்களின் பட்டியலில் பெங்கிற்கு 57-வது இடம்.

பாட்டு, இசை, அழகு, தேசப்பற்று, புகழ்... எல்லாம் சரி. சமூகத்துக்கு ஏதாவது செய்தாரா பெங்? உலக சுகாதார நிறுவனத்தின் ஹெச்.ஐ.வி மற்றும் காசநோய் பற்றிய விழிப்பு உணர்வுக்கான நல்லெண்ணத் தூதராக நியமிக்கப்பட்டுள்ள பெங், அதற்கான நிகழ்ச்சிகளிலும், நிதி திரட்டும் முயற்சியிலும் ஈடுபட்டு, அந்த வட்டாரத்திலும் 'லட்ச லைக்ஸ்’ குவித்திருக்கிறார்.

சீன அதிபர் பயணச் செய்தி, இந்தியாவில் பரபரப்பு கிளப்பியிருக்கலாம். ஆனால், இந்தியக் குழந்தைகளுடன் பெங் ஆடிப் பாடியதுதான் சீனாவில் சென்சேஷன் செய்தி!