மருத்துவர்களுக்கு 2 இருதயம் வேண்டும்: கலாம் பேச்சு

-
சொற்பொழிவின் சிறப்பு பதக்கத்தை அணிவிக்கும் மூத்த நரம்பியல் அறுவைச் சிகிச்சை நிபுணர் ஆர். நாராயணன்.  உடன் (இடமிருந்து) மருத்துவமனையின் கெüரவச் செயலர் டாக்டர் எஸ்.சுரேஷ், மருத்துவமனையின் நரம்பியல் அறுவைச் சிகிச்சைத் துறைத் தலைவர் டாக்டர் எம்.சி.வாசுதேவன், மருத்துவமனையின் தலைவர் எம்.எஸ்.சுவாமிநாதன்.
-

நோயாளிகளுக்கு மருத்துவம் பார்க்கும் மருத்துவர்களுக்கு இரண்டு இருதயம் வேண்டும் என்று குடியரசு முன்னாள் தலைவர் அப்துல் கலாம் கூறினார்.

சென்னை தரமணியில் உள்ள வி.எச்.எஸ். மருத்துவமனையின் டாக்டர் ஏ.லட்சுமிபதி நரம்பியல் அறுவைச் சிகிச்சை மையத்தின் 19-ஆவது ஆண்டு சொற்பொழிவு நிகழ்ச்சி செவ்வாய்க்கிழமை நடைபெற்றது.

நிகழ்ச்சியில் அப்துல் கலாம் பேசியது:

நான் அமெரிக்காவில் கடந்த 2010-ஆம் ஆண்டில் 72 மாணவர்களுக்குப் பாடம் நடத்திக் கொண்டிருந்தேன். அப்போது அவர்களில் ஒரு மாணவி உங்கள் செயல்பாடுகளிலேயே பேரின்பம் கொடுத்தது எது என்று கேட்டார். நானும் பல்வேறு சம்பவங்களை நினைவுகூர்ந்து மாணவியிடம் கூறினேன். நான் கூறிய பதில்களில் எல்லாம் அவருக்கு நிறைவு ஏற்படவேயில்லை. பேரின்பம் கொடுத்து எது என்று தொடர்ந்து கேட்டுக்கொண்டே இருந்தார்.

நான் ஹைதராபாதில் மத்திய பாதுகாப்பு ஆராய்ச்சி, மேம்பாட்டு நிறுவனத்தில் பணியாற்றிக் கொண்டிருந்தபோது ஏவுகணைகளை வெப்பநிலைகளில் இருந்து பாதுகாக்க உலோகக் கவசம் போன்ற ஒன்றை கண்டுபிடித்தோம். அந்தக் கவசம் மெல்லியதாகவும், மிகவும் குறைந்த எடையிலும் இருந்தது. அந்தச் சமயம் ஒருநாள் என்னைச் சந்திக்க வந்த முடநீக்கியல் மருத்துவ நிபுணர் ஒருவர், மருத்துவமனைக்கு என்னை அழைத்துச் சென்றார். அந்த மூடநீக்கியல் வார்டில் போலியோவால் பாதிக்கப்பட்ட சிறுவர்கள் 15 பேர் சிகிச்சை பெற்று வந்தனர். நாங்கள் பார்வையிடச் சென்றபோது, மருத்துவரைக் கண்டவுடன் அந்தச் சிறுவர்கள் தங்கள் கால்களுக்கான உலோகக் காலணிகளை எடுத்து வேகவேகமாகப் பொருத்திக் கொண்டார்கள். உலோகக் காலணிகளின் எடையைத் தாங்க முடியாமல் சிறுவர்கள் அவற்றை அணிவதே இல்லை என்று மருத்துவர்கள் தெரிவித்தனர். இந்தச் சிறுவர்களுக்கு ஏதாவது செய்ய முடியுமா என்று என்னிடம் கேட்டனர்.

அதன் பின்பு ஏவுகணைக்காக உருவாக்கப்பட்ட உலோகக் கவசத்தைக் கொண்டு அந்தச் சிறுவர்களுக்கான காலணிகளைத் தயாரித்தோம். நான்கு கிலோவில் இருந்த அந்தக் காலணிகளின் எடை 400 கிராமாகக் குறைந்தது. எடை குறைந்த காலணிகளைச் சிறுவர்கள் அணிந்தவுடன் சந்தோஷத்துடன் எழுந்து ஓட ஆரம்பித்தனர். தங்கள் பிள்ளைகள் நடமாடுவதைப் பார்த்த தாய்மார்களின் கண்களில் கண்ணீர் வடிந்தது. அதுதான் நான் பெற்ற பேரின்பம் என்று பதிலளித்தேன் அந்த மாணவிக்கு.

ஏழை மக்களுக்கு சிகிச்சையளிக்கும் மருத்துவர்களுக்கு இரண்டு இருதயம் வேண்டும். ஒன்று உயிர் வாழ்வதற்குத் தேவையான இருதயம், மற்றொன்று நோயாளிகளுக்குப் பரிவுடன் சிகிச்சை அளிக்கும் கருணை இருதயம். பெருந்தன்மை, அறநெறி, சகிப்புத்தன்மை, விடாமுயற்சி, அதிகக் கவனம், புத்திக்கூர்மை ஆகிய ஆறு பண்புகளும் மருத்துவர்களுக்கு அவசியம் என்று அவர்
கூறினார்.
-
--தினமணி