உணவில் மாற்றம் உடல் சூட்டைக் குறைக்கும்!

'எனக்கு 20 வயது. என் உடல் காய்ச்சல் வந்ததுபோல் எப்போதும் சூடாகவே இருக்கிறது. இத்தனைக்கும் வாரம் தவறாமல் தலைக்கு எண்ணெய் தேய்த்துக் குளிக்கிறேன். உடல் எப்போதும் சூடாக இருக்க என்ன காரணம்? இதைத் தவிர்க்க நான் என்ன செய்யவேண்டும்?'

டாக்டர் வேலாயுதம், சித்த மருத்துவர், சென்னை

'மனித சரீரத்தை சித்தர்கள் வாதம், பித்தம், கபம் என மூன்று வகையாகப் பிரித்துள்ளார்கள். இதில், நீங்கள் பித்த உடம்புக்காரராக இருக்கலாம். எண்ணெய் தேய்த்துக் குளிப்பதால் மட்டுமே உடல் சூடு தணிந்துவிடாது. அது ஒரு வழி மட்டுமே. உங்கள் தினசரி உணவுப் பழக்கவழக்கம் பற்றி எதுவும் தெரிவிக்க வில்லை. பொதுவாக உடல் சூட்டைத் தணிக்க உணவுப் பழக்கத்தில் மாற்றம் தேவை. புளிப்பு, கார்ப்புச் சுவைகளைத் தவிர்த்துவிட்டு இனிப்பு, துவர்ப்புச் சுவைகளை அதிகம் எடுத்துக் கொள்ள வேண்டும். மோர், இளநீர், பழச்சாறு ஆகியவற்றை அடிக்கடி சேர்த்துக்கொண்டால், உடல்சூடு தணியும். சின்ன வெங்காயம், வெள்ளரிக்காய், வெண்பூசணி, சுரைக்காய், வெண்டைக்காய், வாழைத்தண்டு, வாழைப்பூ ஆகியவற்றை உணவில் அதிகளவு சேர்க்க வேண்டும். தினந்தோறும் காலை, மாலை என இருவேளையும் குளிக்க வேண்டும். எண்ணெய் தேய்த்துக் குளிக்கும்போது அரக்கு தைலம், சந்தனாதி தைலம் போன்ற சூடு தணிக்கும் தைலங்களைப் பயன்படுத்தினால், அதிக நன்மை கிடைக்கும். எண்ணெய் தேய்த்துக் குளிக்கும்போது உச்சந்தலை, கட்டை விரல், தொப்புள் பகுதியில் எண்ணெய் வைத்துக் குளிக்க வேண்டும். கறுப்பு நிற ஆடைகளைத் தவிர்த்து, வெள்ளை நிற அல்லது வெளிர் நிற ஆடைகளை அணிதல் நல்லது. மேலும், உங்கள் உடலுக்கான பிரத்யேகத் தீர்வைப் பெற உங்கள் அருகில் உள்ள சித்த மருத்துவரை அணுகி ஆலோசனை ெபறுங்கள்.'

பி.சந்துரு, தர்மபுரி

'வெளிநாடுகளில் இருந்து இறக்குமதியாகும் அவகேடோ (பட்டர் ஃப்ரூட்) பழத்தில் நிறைய சத்துகள் இருக்கின்றன என்று என் அம்மா, அடிக்கடி ஜூஸ் செய்து கொடுக்கிறார். அவகேடோவில் உள்ள சத்துக்கள் என்ன? அதன் பலன்களைச் சொல்லுங்களேன்?'

நபநிதா சாகா, ஊட்டச்சத்து நிபுணர், பெங்களூரு

'அவகேடோ எனப்படும் பட்டர் ஃப்ரூட் ஜூஸில் கலோரியின் அளவு மிக அதிகம். அதனால் இந்த ஜூஸைக் குடித்தவுடன் வயிறு நிரம்பி விடும். இதில், உடலுக்கு நன்மை பயக்கும் 18 வகை அமினோ அமிலங்கள் மற்றும் வைட்டமின் பி, சி, கே ஆகியவை அதிக அளவில் உள்ளன. கொழுப்பை நல்லது, கெட்டது, மிக மோசமானது என்று மூன்றாகப் பிரிப்போம். நல்ல கொழுப்பில் ஒற்றை நிறைவுறாக் கொழுப்பு (Monounsaturated Fat) அமிலம் உள்ளது. இது கெட்ட கொழுப்பின் அளவைக் குறைத்து நல்ல கொழுப்பின் அளவை அதிகரிக்க உதவும். அவகேடோவில் இந்த ஒற்றை நிறைவுறாக் கொழுப்பு உள்ளது. இதனால் கெட்ட கொழுப்பின் அளவு குறைவதுடன் இதயத்தின் ரத்த ஓட்டம் சீராகும். மேலும், இதில் அதிக அளவு தாது உப்புக்கள் மற்றும் புரதச் சத்துகள் உள்ளன. உடலுக்குக் கேடு விளைவிக்கும் துரித உணவுகள், நொறுக்குத்தீனி சாப்பிடுவதைவிட, பட்டர் ஃப்ரூட்டை எடுத்துக்கொள்வது மிகவும் நல்லது. இதில் சர்க்கரையின் அளவு குறைவே என்றாலும் சர்க்கரை நோயாளிகள் குறைந்த அளவிலேயே எடுத்துக்கொள்ள வேண்டும். பொட்டாசியம் அதிகளவில் இருப்பதால் சிறுநீரகக் கோளாறு உள்ளவர்கள் தவிர்த்து விடவும். இதில் அதிக கலோரிகள் இருப்பதால், வெளியில் சென்று அதிகம் விளையாடாத, உடல் பருமனான குழந்தைகள் தவிர்க்கலாம். அவகேடோ ஜூஸ் சாப்பிட்டதும் அதில் உள்ள கலோரிகளை எரிக்கும் அளவுக்கு குழந்தைகள் ஓடியாடி விளையாட வேண்டும். இல்லையென்றால், அது தேவையற்ற கொழுப்பாக மாறி உடலில் சேர்ந்துவிட வாய்ப்பு உண்டு.'

நல்ல பதிவு நன்றி

நல்ல பதிவு ! நன்றி நேசன்