ராட்டையில் நூல் நூற்ற சீன அதிபர் !

ராட்டையில் நூல் நூற்ற சீன அதிபர் : மோடி அளித்த எளிய குறிப்புகள் !



குஜராத்தில் உள்ள மகாத்மா காந்தியின் சபர்மதி ஆசிரமத்தில் உள்ள ராட்டையில் சீன அதிபர் ஜீ ஜின்பிங் நூல் நூற்றார். அப்போது அவருடன் இருந்த மோடி, அவருக்கு நூல் நூற்க சில எளிய குறிப்புகளை அளித்தார்.

இந்தியாவில் 3 நாள் சுற்றுப்பயணம் மேற்கொண்டுள்ள சீன அதிபர் ஜீ ஜின்பிங், குஜராத்தில் உள்ள மகாத்மா காந்தியின் சபர்மதி ஆசிரமத்துக்கு புதன்கிழமை வருகை தந்தார்.

குஜராத் மாநிலம், ஆமதாபாதின் புறநகர்ப் பகுதியான சபர்மதியில் மகாத்மா காந்தியின் ஆசிரமம் அமைந்துள்ளது. இங்குதான், மகாத்மாவும், அவரது மனைவி கஸ்தூரிபாவும் 12 ஆண்டுகள் வசித்தனர்.

இந்த ஆசிரமத்துக்கு, பிரதமர் மோடி அன்பளிப்பாக அளித்திருந்த வெள்ளை நிற கதராடையை அணிந்துகொண்டு வந்தார் சீன அதிபர் ஜின்பிங். அவரை, சபர்மதி நதிக்கரையில் அமைந்துள்ள இந்த ஆசிரமத்தின் வாயிலில் பிரதமர் மோடியும், குஜராத் முதல்வர் ஆனந்தி பென் படேலும் வரவேற்றனர்.

ஜீ ஜின்பிங்கிற்கு அவர்கள் பருத்தி மாலைகளை அணிவித்தனர். ஆசிரமத்தின் பல்வேறு அறைகளையும் சுற்றிக் காண்பித்தனர். ஜின்பிங்கிற்கு மோடி பகவத் கீதை புத்தகத்தையும், நினைவுப் பரிசுகளையும் வழங்கினார்.

இந்த ஆசிரமம் குறித்தும், காந்தி எழுதிய புத்தகங்கள் குறித்தும் ஜின்பிங்கிடம் மோடி எடுத்துக் கூறினார்.

ஆசிரமத்தில் உள்ள ராட்டையில் ஜின்பிங் நூல் நூற்றார். அப்போது அவருக்கு மோடி உதவி செய்து, ராட்டையில் நூல் நூற்பதற்கு சில குறிப்புகளையும் அளித்தார். இருவரும் மகிழ்ச்சியாக நூல் நூற்றனர்.

பின்னர், ஆசிரமத்தில் உள்ள காந்தி சிலைக்கு அவர் மாலை அணிவித்து மரியாதை செலுத்தினார். ஆசிரமத்தில் உள்ள, "ஹிருதயகஞ்ச்' எனப்படும் காந்தியடிகளின் தனி அறைக்கும் ஜின்பிங் சென்று பார்வையிட்டார். அங்குள்ள காந்தியின் படத்துக்கு அவர் பருத்தி மாலை அணிவித்தார்.

அதைத் தொடர்ந்து, சபர்மதி நதிக்கரைக்கு ஜீ ஜின்பிங்கும், அவரது மனைவியும் சென்றனர். அப்போது பிரதமர் மோடியும் உடன் இருந்தார். அங்கு குஜராத் பாரம்பரிய இசை, நடன நிகழ்ச்சிகள் நடத்தப்பட்டன. அங்குள்ள ஊஞ்சலில் இரு தலைவர்களும் சிறிதுநேரம் அமர்ந்து பேசிக் கொண்டிருந்தனர். அதன்பின், சபர்மதி நதிக்கரையில் ஜின்பிங் தம்பதிக்கு பிரதமர் மோடி விருந்தளித்தார்.

நன்றி : தினமணி