சொத்து குவிப்பு வழக்கில் ஜெ., விடுதலையா????

சொத்து குவிப்பு வழக்கில் ஜெ., விடுதலையா? காஞ்சியில் வைத்த பதாகையால் பரபரப்பு !



காஞ்சிபுரம்: 'பெங்களூரில் நடைபெற்று வரும் சொத்துக் குவிப்பு வழக்கில் இருந்து ஜெயலலிதா விடுதலை' என, அ.தி.மு.க., கவுன்சிலர், காஞ்சிபுரத்தில் நேற்று காலை பதாகை வைத்ததால், பெரும் பரபரப்பு ஏற்பட்டது.

தரக்குறைவாக...:

கடந்த, 1991 - 1996 காலத்தில், ஜெயலலிதா முதல்வராக இருந்தபோது, வருமானத்திற்கு அதிகமாக சொத்து சேர்த்ததாக, அவர் மீது வழக்கு தொடரப்பட்டது. இந்த வழக்கு தற்போது, பெங்களூரு சிறப்பு நீதிமன்றத்தில் நடந்து வருகிறது. இதன் தீர்ப்பு, வரும் 27ம் தேதி நடைபெற உள்ளது. இந்நிலையில், காஞ்சிபுரத்தில் அ.தி.மு.க., நகராட்சி வார்டு உறுப்பினரும், காஞ்சி மேற்கு மாவட்ட அம்மா பேரவைச் செயலருமான பரிமளம், 'அம்மா வழக்கிலிருந்து விடுதலை' என, காஞ்சிபுரம், கம்மாளத்தெரு சந்திப்பில், நேற்று காலை பதாகை வைத்தார். இதனால், காலையிலேயே பரபரப்பு ஏற்பட்டது.மேலும், பதாகையில், தி.மு.க., தலைவர் கருணாநிதி, தே.மு.தி.க., தலைவர் விஜயகாந்த் ஆகியோரை பற்றி, தரக் குறைவாக குறிப்பிட்டுள்ளார். இதனால், ஆத்திரமடைந்த தி.மு.க.,வினர், அப்பகுதியில் கூடினர். சம்பவம் பற்றி அறிந்த சிவகாஞ்சி போலீசார், பதாகையை அகற்றினர்.

சட்டப்படி நடவடிக்கை:

விஜயகாந்த் குறித்து தரக் குறைவாக விமர்சித்து, பதாகை வைத்த, அ.தி.மு.க., பிரமுகர் மீது, சட்டப்படி நடவடிக்கை எடுக்க வலியுறுத்தி, தே.மு.தி.க.,வினர், சிவகாஞ்சி போலீசில் புகார் அளித்துள்ளனர்.நடந்து முடிந்த லோக்சபா தேர்தலின்போது, ஓட்டு எண்ணிக்கைக்கு முன்பே, காஞ்சிபுரம் தொகுதி அ.தி.மு.க., வேட்பாளர், ஒரு லட்சத்திற்கும் அதிகமான ஓட்டுகள் வித்தியாசத்தில் வெற்றி பெற்றார் என, காஞ்சிபுரத்தில் இரண்டு இடங்களில் பதாகை வைத்து, பெரும் சர்ச்சையை கிளப்பிய பரிமளம், மீண்டும் ஜெயலலிதா தொடர்பாக பதாகை வைத்து பரபரப்பை ஏற்படுத்தியுள்ளார்.அப்போது, அவர் மீது தேர்தல் ஆணையம் புகார் அளித்தது. பதாகை தயாரித்த கடைக்கு, 'சீல்' வைக்கப்பட்டது.

கடும் எதிர்ப்பு:

இந்த முறையும், வேண்டுமென்றே மீண்டும் சர்ச்சையை கிளப்பியதால், தி.மு.க., - தே.மு.தி.க.,வினர் கடும் எதிர்ப்பு தெரிவித்துள்ளனர்.
இதுகுறித்து, மாவட்ட எஸ்.பி., விஜயகுமார் கூறுகையில், ''பதாகை வைக்க நகராட்சியில் முறைப்படி அனுமதி பெற்றிருக்க வேண்டும். போலீசிடமும் தடையில்லா சான்று பெற்றிருக்க வேண்டும். அவ்வாறு செய்யவில்லை. இது சம்பந்தமாக நகராட்சி எங்களுக்கு புகார் கொடுத்தால், நடவடிக்கை எடுப்போம்,'' என்றார்.

நன்றி : தினமலர்

தீர்ப்பை விலைக்கு வாங்கிட்டாங்களோ? அவசரப்பட்டு வெளியிட்டு விட்டாரே.

நீதிபதியின் கையில் தான் நீதி உள்ளது. பொறுத்திருந்து பார்ப்போம்.

அதான் அந்த அம்மா ஒரு தினாவட்டா திரிஞ்சிகிட்டு இருக்கா?