அதிகாரப்பிச்சை

by karaumalaithamizhazhan Wed 17 Sep 2014 - 13:49

அதிகாரப்பிச்சை
பாவலர் கருமலைத்தமிழாழன்

வீட்டின்முன் கையேந்தும் பிச்சைக் காரன்
விடுக்கின்ற குரலினிலே பசியின் ஏக்கம்
காட்சியாகத் தெரிகின்ற முகத்தின் கண்ணில்
கவலையொடு இயலாமை தோய்ந்த பார்வை!
சாட்சியாக நிற்கின்ற உடல்வ ளைந்து
சாம்புகின்ற இரக்கத்தில் பணிவுத் தோற்றம்
மீட்சியென நாம்கரத்தில் கொடுக்கும் காசால்
மிளிர்ந்துமனம் நிறைந்துவிடும் அவரின் வாழ்த்தால்!

அரசாங்க அலுவலக அறையின் உள்ளே
அமர்ந்தபடி இருக்கின்ற பிச்சைக் காரர்
வரம்கொடுக்கும் கடவுளென்னும் தோற்றத் தோடு
வருவோர்க்குத் காட்சியினைத் தருகின் றார்கள்
குரலினிலோ அதிகாரம் மிரட்டும் கண்கள்
குறிப்பிட்ட தொகைதன்னை உறையில் போட்டுக்
கரங்களிலே கொடுத்தால்தான் நகரும் கோப்பு
கட்டாயம் பிச்சையினால் கொதிக்கும் நெஞ்சு!

உடற்குறைவால் உழைப்பதற்கே இயலா ராக
உள்ளவர்க்குக் கொடுப்பதுவோ மனித நேயம்!
உடல்நல்மாய் உள்ளபோதும் உழைப்ப தற்கே
ஊதியத்தைப் பெற்றபோதும் கையூட் டாகத்
தடம்மாறிக் கேட்கின்ற கயவர் கட்குத்
தண்டனையைக் கொடுப்பதுவே கடமை யாகும்
அடற்காட்டுப் பாம்புகளாய் வீற்றி ருக்கும்
அதிகாரப் பிச்சையரின் பல்லெ டுப்போம்!

******************

by **krishnaamma** Wed 17 Sep 2014 - 13:57

//உடற்குறைவால் உழைப்பதற்கே இயலா ராக
உள்ளவர்க்குக் கொடுப்பதுவோ மனித நேயம்!
உடல்நல்மாய் உள்ளபோதும் உழைப்ப தற்கே
ஊதியத்தைப் பெற்றபோதும் கையூட் டாகத்
தடம்மாறிக் கேட்கின்ற கயவர் கட்குத்
தண்டனையைக் கொடுப்பதுவே கடமை யாகும்
அடற்காட்டுப் பாம்புகளாய் வீற்றி ருக்கும்
அதிகாரப் பிச்சையரின் பல்லெ டுப்போம்!//

எஸ்..............எஸ்.............எஸ்...............அருமையாக இருக்கு ஐயா புன்னகை