பிரதமர் மோடி பிறந்தநாள் விழா துவக்கம்: முதல் நிகழ்ச்சியாக தாயிடம் ஆசி பெற்றார்!

ஆமதாபாத்: பிரதமர் நரேந்திரமோடி தனது 64வது பிறந்தநாள் விழாவை இன்று எளிமையாக கொண்டாடுகிறார். முதல் நிகழ்ச்சியாக, இன்று அதிகாலை காந்திநகரில் உள்ள தனது தாயிடம் ஆசி பெற்றார்.



பிரதமர் நரேந்திரமோடியின் 64வது பிறந்தநாள் விழா இன்று நாடு முழுவதும் சிறப்பாக கொண்டாட பா.ஜ., ஏற்பாடு செய்திருந்தது. காஷ்மீர் வௌ்ளத்தால் பலர் பாதிக்கப்பட்டுள்ள நிலையில், தனது பிறந்தநாள் விழாவை விமர்சையாக கொண்டாட வேண்டாம் என்று மோடி கட்சி தொண்டர்களை கேட்டுக் கொண்டார். மேலும், காஷ்மீர் நிவாரணப் பணிகளுக்கு நன்கொடைகள் வழங்குமாறும் அழைப்பு விடுத்தார்.

தாயிடம் ஆசி:

பிறந்தநாள் அன்று, குஜராத் மாநிலம் காந்திநகரில் உள்ள தனது தாயார் ஹிராபென்னிடம் ஆசி வாங்கும் வழக்கத்தை மோடி கொண்டுள்ளார். அதன்படி, இன்று காந்திநகர் சென்ற மோடி, தாயிடம் ஆசி பெற்றார். மோடிக்கு இனிப்பு ஊட்டி மகிழ்ந்த ஹிராபென், காஷ்மீர் வௌ்ள நிவாரண நிதியாக 5 ஆயிரம் ரூபாயை மோடியிடம் வழங்கினார். பிரதமர் மோடி தாயை பார்க்க சென்றபோது, வழக்கமான தனது பாதுகாப்பு நடைமுறைகளை அகற்றிவிட்டு, தனி காரில் தாயை சந்தித்தார் என்பது குறிப்பிடத்தக்கது.

சிறப்பு விருந்தனர்:

பிரதமர் நரேந்திரமோடியின் பிறந்தநாள் விழாவில், சிறப்பு விருந்தினராக சீன அதிபர் ஜிங் ஜின்பிங் கலந்து கொள்கிறார். இதற்காக இன்று மதியம் அவர் ஆமதாபாத் வருகிறார். பிறந்தநாள் விருந்து, ஆமதாபாத் நகரின், சபர்மதி நதிக்கரையில் உள்ள ஸ்விஸ் டெண்ட்டில் நடக்கிறது. இந்த விருந்தில் குஜராத் வகை உணவுகள் சீன அதிபர் மற்றும் அவரது குழுவுக்கு அளிக்கப்பட உள்ளன. இந்த விருந்தின் ஒரு பகுதியாக, இந்திய, சீன உறவுகள் குறித்து இரு தலைவர்களும் பேச்சுவார்த்தை நடத்த உள்ளனர்.

தலைவர்கள் வாழ்த்து


இன்று பிறந்தநாள் கொண்டாடும் நரேந்திரமோடிக்கு, இந்திய ஜனாதிபதி பிரணாப் முகர்ஜி தனது வாழ்த்துக்களை தெரிவித்துக் கொண்டார். மேலும், ஜப்பான் பிரதமர் ஜின்ஜோ அபேயும் மோடிக்கு வாழ்த்து கூறி உள்ளார்.